● Ora s'accosta la bramata ura

chi nasciari volia lu Verbu Eternu,

Giuseppi ccu 'Maria facianu strata,
ppe' Bettilemmi, allu forti 'e du viernu.

Si scrissi la seconda e la chiamata

secreta, nnicessaria 'e di un Guvernu;
nun pottiru la sira fari via
e restaru a Bettilemmi alla straniante.

Aviti vistu a Giuseppi e Maria

porta ppe' porta circari riciettu?
Amici e parienti chi li canuscia'
tutti l'hanu cacciati ccu' dispiettu.

Puru s'arridducianu a 'n'osteria,

mentri chi riposavanu ccu' affettu,
de nuovu furu cacciati ccu' suspettu
de la gran fulla de li passeggieri.

Dissi Giuseppi: - O Diu dell'alto Cielu,

duvu puortu a Maria ccu' tant'amuru?-
La notti lii fallisci lu penzieru,
de cchiu l'acqua e lu vientu li martura.

Mentri Giuseppi facia chissa preghiera

cumparvi 'n angiulicchiu e lii dicia:
-Vua jati a Bettilemmi a tali banna.
ca la ci trovereti 'na capanna...-.

Giuseppi, ccu' la figlia de Sant'Anna,

puru s'arridducianu a 'na furesta;
e trasinu intr"a misera capanna,
ch'era suggetta assai alla timpesta.

E chilla Virginella veneranda

a menzannotti cunzulata resta:
de li visciari sua sacrati e puri
nasciu l'innamuratu Redenturi.

E l'angiuli cantavanu
e la gloria 'e Diu sonava.

Oh! chilla santa notti de Natali

chi cumpariu 'na stilla all'orienti,
dissiru li tre Magi: - O Redentore!
E' natu lu Messia stamu cuntienti -.

Tridici juorni ccu 'penzieri uguali,

appriessu de la stella d'Orienti,
a 'na misera grutta, 'ncumpagnia
trovarunu Gesù 'mbrazza a Maria.

Gasparu fu lu primu e li diciu:

-O dolci figliu de l'Eternu Patri,
cumu nascisti afflittu a 'na strania,
tu chi guvierni li celesti squatri?-

-Iu t'ho purtatu la curuna mia,

alli piedi sacrati di tua matri;
iu t'ho purtatu 'n'atra massa d'uoru,
chi m'arricchisci 'st'arma quannu muoru-.

● -Iu t'ho portatu 'ncienzu ppe' tuo onuri,

lu sacrifizziu preziusu e raru,
puortu l'incenzo, Redentori mio,
ca si' sommu sacerdoti e veru Diu-.
O quant'azzietti e quantu cari furu
li lacrimi chi sparsi Baldassarri,
diciennu: - Amatu Diu dell'altu cielu,
sul"i peccati mia ti ci purtaru!-

L'urtimu ch'arrivau fu Marchionni:

-La mirra t'ho purtatu e l'uocchj 'n piantu;
puortu l'amara mirra Ternu Diu,
ca l'amarezzi tua sarannu tanti!

Maria tutti 'i tri doni riciviu,

lu Bomminellu lli sfassau davanti,
chiangiennu li peduzza lli vasaru
e cussi, chiangiennu si licenziaru.

Gaspari, Batasarri e Merchionni

eranu tutt"i tria 'ncumpagnia:
e de l'afflitti e de li scunzzulati
ci siti vua, Maria, nostra avucata.

'N angiulu de lu cielu lli cumparvi:

O car vici Re, cangiati via,
ca si vi sconta Rodi micidianti
scanna lu figliu 'mmrazza de Maria.

Chissa nuvina fa ccu' gioia e risu:

la gioia 'ntera e doppu 'mparavisu.
Chissa nvina fa ccu' gioia e 'mpegnu:
la paci 'nterra e pua la gloria terna.