Documenti di Didattica
Documenti di Professioni
Documenti di Cultura
Testo ed illustrazioni:
Gianni Bellini
Elaborazione grafica:
Alessio Bignozzi
MIRANDOLESI
razza ariana
Quei e atar soquænt
ad Mirandla e dintoran
Prima Edizione
Novembre 2006
Bisogna che am vegna la voia a me e che ninsun
mal’dmanda. “A gentile richiesta”, cum as dis, an funsiòn
minga, an gh’è vers.
Dop che ho scritt al prim libar, pr’esempi, i m’ha tacà
a dmandar di ritratt:…
“mo a gh’arèv me fiol cal fa la cresma, e un bel ritrat l’am
piasrev propria…”
“me madar, puvreta, cla cumpis utant’an e l’ann’ha mai
avù gnanc na fotografia …”
“Belini quand’è cal fa al second ?. mo em tant ridù…”
“al libar al n’è minga brutt, ma al se dasmingà ad metrag
quest e quel…”
A la prima a g’ho rispost che di ritratt a un putèn a n’ho
fat n’æntar e ca gh’è gnù subìt al morbilo, che a mumenti
al mor
“a sarà sta un cas, sgnora…però an vrev minga….”
Risposta:
“Al n’as preocupa Belini, lu al g’ha ad sicur quel’atar da
far… l’è forse mei c’agh faga far na bela fotografia a
culor da me fradel, clè acse brav..”
A cl’atar a g’ho dit che ho fat un ritratt a na vecia
ad’stantasinc ann e che a gh’è gnù un cactus al gioran
dop, che i’ià duvù druvar al me disegn da metar insima
a la lapide.
Mai più dmandà di ritratt!
A ch’iatar a g’ho dit, faghend na bela figura,…
”semel in vita licet insanire” e lor: “as ved cl’ha fat
al clasic, am l’arcord…, l’era un cse bel ragass
(a sembra impusibil, epure..), un po più sutil, però…,
però vedat che prima o poi a ven fora la cultura
umoristica..”
Adess inveci c’am para a me…a n’ho fat n’æntar.
I disan.. “al g’ha al so caratar!”
Non solo, ma ho anch alsà al tir, al dutor Vrunes e al
Sindac, va mo là.
E pò i disan che i tedesch i’iè na bruta rasa, parchè i vlivan salvar sol gli ariani?
Me, da bon Mirandules, i poss capir.
Quand ho fat al prim libar sui Mirandules, più d’un al m’ha dit “mo tat’se
dasmingà ad mettrag Mario!” “mo Mario al s’ufindrà, ca ta na gl’ha minga
miss?”
A Mirandla tutt i’ial ciama Mario, chissà parchè ?..cume dir.. “me a son in cun-
fidensa”
Ann’è minga c’am sia dasmingà, l’è che al n’um simbrava minga al so post...
Oh, lu l’è dvintà un ca conta dabòn, a Mirandla, a Modna, a Roma, a Brusèl o
Sanfransisco….
Al g’ha goga e magoga, l’è vera, ma ad vadrà che al sl’è guadagnada la pagno-
ca, con la testa, con al man, con al gambi e coi pè (tic tic tic tic) cal g’ha ancora
la lengua fora adess, e anch con la machina, parchè di chilometri al na sgugnà
un bel góss.
Me al poss dir parchè i me prim chilometri a’iiem fat insém, su e zo par l’Europa,
cume un che al vaga a Modna e al torna indrè in giurnada.
Amarcord un gioran con la Biemvu che a sem partì a la matina a se ori, a sem
rivà a Viena a mezdì, em lavurà fin a se ori sot sira, a sem partì e a sem rivà a
Mirandla a mezanot.
Oh, e angh’era minga tutt autostrada cume adess.
Quand a sem gnù fora a Regiolo, a guidava me, la pulisia l’ha s’ha farmà.
Andava ancora cume sa fuss in autostrada, sgasand ai 150, 160 minim.
“Seenta, favorisca documenti. Ma cossa crede di essere a Niu Iork? (parché pro-
pria Niu Iork an l’ho mai capida, chi va tutt ai 50 masim)”
Alora a g’ho cuntà che la giurnada l’era stada pesa e che an’vdiva l’ora ad pugia-
rum in dal me lèt e pò a g’ho dit l’itinerari.
Al ma guardà cume sa fuss un matt e, forse pinsand ca psiss far anch un qual brutt
att, al ma dit “ Vada, vada pure, solo che con il rumore del motore sveglia la
gente del paese.”
A gh’insarev da cuntar dagli aventuri con Mario che an bastarev nè al suo, nè al
mio di libar, a gh’avrev n’encicolpedia.
Scusi Signor Sindaco se l’ho messa subito dopo al Dutor Vrunes, ma, al sa, me a
g’ho di debit in di so cunfront. Anca me a sò cusa vol dir immigrasiòn; al dutor al
ma sunà su a Como, in du s’era emigrà e al m’ha insgnà al mastèr, te at capiss!?
Al Gec!
Cusa vliv cagh’zonta?
Come Falqui, basta la parola, in dal sens che tutt, da Vipiteno a Lampedusa i sa
chi l’è.
E anc a Riad, a Beirut e a Stocolma… in du - al diz - ca l’ho mandà mè, quand
a lavuravan insém a la Belco, faghendum na colpa cume al peccato originale, che
al na sa scanzela più.
A voi saver se a gh’è un che a g’ha più ad sinquant’an che a n’asl’arcorda minga!
Camisa scosseze rossa, sigareta in boca e na parola par tutt. E quel da uffrir a tutt.
A me fradèl pr’esempi, als’gudiva a metral insìma al bancòn dal cafè Pic, con un
vas ad carameli e in cambi d’un siful al psiva tor tutt al carameli cal’vliva.
E giustamente so fiol, al Gec, in dla so vita, una a la volta, al sigareti che so padar
la dat via, a gli’ià tiradi a cà tuti.
L’ha mandà a cà da Brusél prima Prodi e po’ Berlusconi e adess al ven a cà anca
lù. L’ha tolt un piedatèr aVerona, ma al sta mal se al na fa un pasagg a Mirandla
ogni volta che al torna in Italia... e a Bulogna (all’asà po’ lù al parchè).
Cusl’è dvintà i’ial sa tutt, al Padròn dal Parlament Europeo, ma l’è partì da
gnint..e al n’ha mandà zò veh di magon!
Emm lavurà insém a la Dasco un mez secul fà, mo l’ha capì subit cal n’era minga
al so mastér. Con cla testa cal gh’iva, parchè lavurar col man e con la pena?
L’iva lètt mal al prinsipi ora et labora…l’ultma parola la s’era scanzlada.. par-
gar dimondi,… lavurar - in senso letterale - ... ehi, se propria an s’in pol far a
meno….
Quand al gniva in ufisi - in tarda mattinata - che me a s’era lè da almeno un par
d’ori, al mad’giva.. “Eccolo lì, il crumiro!”
L’ivia da masar?
Anch parchè iva apena telefonà so madar, povra dona,… “Vittorio poverino, non
riesce ad uscire dal garage con la macchina..”
Però a s’era capì subìt che al gh’iva la stofa dal diplomatic..e infati l’è andà a
lavurar in dogana!
Fa un piazer a un, fa un piazer a cl’atar, con tutt chi camion ca gniva da la
Jugoslavia, minga trop regolar, insoma, come si dice, al se fat su al mandghi.
Na volta che a gh’iva da pasar al cunfèn pr’andar a Zagabria con un po’ ad roba
in dal baul a g’ho dmandà na man coi doganer.
Al m’ha dit.. “Fai il mio nome e tutto scorrerà liscio”.
Beh, par poc in m’aresta!
Ho duvù tori col boni, pagar da bevar a tuta la dogana e daragh tutt i regai desti-
nà ai me client in Iugoslavia!
Giorgio Grazi, al diretor
A’vdiva dal machini blu, parchegiadi in dla via basa, in diviet ad sosta..con d’iau-
tista chi spetava.
Ho dit, mah? .. a sarà quei dla Provincia chi’iè gnù zo a dascorar col sindac.
Stamo a vedar cl’è la volta ca femm la tangensiale... che s’ann’è n’an, l’è cla-
tar…un dì i me anvò…
Mocchè… ho savù dop ch’iera Cuccia, Bazoli, Fiorani, Profumo, Colaninno e
Tronchetti Provera, tutt a la San Zamiàn, in dal soterani, in riuniòn con Grasi, al
diretor.
Chi vliva na previsòn sul dolaro,… chi un cunsìli par la Borsa,… chi un parer par
fòndar na Banca con cl’atra…
Mo caro mio, l’è comda… Giorgio l’è sempar stà un bon ragass e lor iss’naprufi-
tava e igh’dmandava di parer gratis et amore Dei.
E pinsar che da picul l’era un discul…Chi’iè che l’arev dit?
Me am l’arcord in dla terasa dal palass che gh’è in piasa dal Pistrino, in du a gh’è
la Cása, con un canunsèn cal sparava dal vidi e di bulòn par farmar l’asalt ad la
banda rivale ..( e mè a s’era in dla banda rivale!).
Atar che emergensa Napoli, banliò ad Parigi e Bronx!
E po’ è gnù la Fevra dal Sabt ad sira (minga n’influensa asiatica, ma dal film
Saturdei Nait Fivar) e chi l’ha più farmà!?
Sol lù e Gion Travolta…
Adess l’è un po’ ad temp cal manca da la piasa…
Chi diz cl’è andà a la Bocconi a far di cors…chi diz chi l’ha ciamà a Roma, che
al Ministar Padova Fucile (a ciamaral Padoa Schioppa um sembra ad mancaragh
ad rispett) al na mova na foia sensa interpelaral….
Ho pruvà a’dmandar a la Donatela…ass’emm anch telefonà con Giorgio temp
fa…macchè, angh’è vers ad tiraragh fora na parola.
Segreto d’ufficio e finida lè.
Va mo là Giorgio, dat na mòsa,… la pasiensa la g’ha un limit!
Al Cortina a semm pers!
la sgnora Rosta
I disan che agh’sia di pulmann da la Gran Bretagna chi ven a Mirandla a impa-
rar l’ingles da la Casari, la prof…
L’am sembra grosa, i gnarà a ricambiar la visita che le l’ha fat quand l’è andada
a imparar l’ingles a Lester ( a sa scriv Leicester, ann’ho mai capì cuma as’fagha
a lesar Lester).
La lavurava inn’uspidal e l’è turnada a cà con na laurea in inglese e una in mad-
zina..tutt quest in se mes!?
Anca lè l’ha lavurà megh e anca lè la capì subit cal n’era minga al so master, cume
Vitorio (porta Frigeri della Ghir…).
An sarà minga sta pr’al stess motiv? Mandghini gnudi un po’ streti? A savì, i sart
dal volti i sa sbaglia anca lor...
E po’ la spusà un dentista, Giorgio, tant par via…
Amor, sicur,…ma un dentista l’è sempar n’asicurasion su la vita,… faturini
pochi…
S’è mai vist un dentista falir?
E, cume i pionier, i’ià ristruturà na cà in campagna e abandunà al centar. Parchè
a gh’è più aria!
Cume se Mirandla la fuss Niu Iork o Napoli, con di tram, dal sireni e un cazèn ad
trafic, insoma sagh’fuss n’aria pesa e inveci a 3 km agh’fuss n’aria ad muntagna.
Al pursilari e al stali chi mandan un profum ad Sanel? Mocchè... l’è tuta roba
sana....a gh’è n’aria!!
I’iè sta i prim c’ha fat l’esperiment... e inn’è mai più turnà indrè... “a gh’è n’arie-
ta...”
E me? Parchè da Mirandla sonia andà a star a Mdola?
Parchè lè, vers i’iApenen, l’aria l’è tuta n’antra roba...
Il Dottor Gasparini
L’è andà via da Mirandla par turnar subìt, cume quel, famos, dal pachèt ad siga-
reti, ma as’ved che al s’è catà ben e…
Lù als’ciama Gasparini e so fradel Gasparoni!? Boh? A sarà parchè Carlo l’era
più magar..!?
Alora me um duvrev ciamar Beloni…e me fradel?
Me aml’arcord (oh, l’è viv e vegèt, ca s’intindema) cum a l’ho ritratt…, grand,
magar, elegant, ad class, con la pipa in boca, om ad cultura… e na Sitroen.
Al n’arà cambià na sinquantina…
I disan che agh’sia la so foto in dl’ingress ad la fabbrica in Francia.
Me dal Sitroen aghn’iva una, a l’ho tgnuda par du mes e pò la barca aghl’ho pasa-
da a lù…am gniva al mal ad mar.
Chissà parchè, quei ca gniva a la Dasco i’ium ciamava Giani, o i ciamava i me
colega Libero, Lucio, Claudio.. e adiritura Mario, ma lù i’ial ciamava il Dottor
Gasparini.
Oh, l’è quistion ad carisma, chi ce l’ha e chi non ce l’ha.
E po’ l’è andà in Svisera.. e via la gent, cl’ann’è gnac petegla, a strulicar al par-
chè…e i s’è invintà da tutt.
In Svisera i’iaministra i sold ad tutt al mond e lu cus’eral? N’aministrador.
E alora? Qual’eral al post più adatt?
Enzo Gasparini, Gasparòn
Al sembra d’aciaio inox; l’è armaz cumpagn da quand al t’gnoss, cioè da sinquant
ann.
Da na generasion a cl’atra: l’era amigh ad me padar (e forse anch ad me nono)
da quand i’iandava via col muier in gita in Vespa e in Lambreta, l’è amigh mio,
e second me al speta sol da dvintar amigh ad me fiol.
Me am son fat n’idea: sicom cl’ha pasà tuta la so gioventù in dla cantina sociale,
in mez a dal boti e ai profum dal vèn, inveci che in dl’inquinament dal gioran d’in-
cò, can sia sta quel, ca g’ha fat ben a la salut.
Adess al fa al “fagh totum” in na tgnùda a Curtìl, ma al ved spess in piàsa e quin-
di propria tutt lú al na la farà brisa.
Remo Vellani o Remo Romeo Velani(?)
Niente paura! L’è tutt vestì ad negar ma al na porta minga sfiga; l’è bela stà esor-
cizà da padre Milingo.
Pr’al rest l’è mei ca tasa, pr’an crear di dasgust. Che pò an v’cuntarev gnint ad
nov.
Giordano Gavioli
Anca lù al g’ha na màcia in dal pidigrì, l’è ad Quistel cumè me; ma sicom ch’le
gnù via subìt, cal s’è arvist, a sarem n’occ.
Ragazzo di Via Panisperna, cioè ad via veneto, cume Artebano, Zeno Blèn,
Cavciòn, ecetera... insoma un poc birichèn da picul (da grande non si dice).
A un sert punt ad la so vita a gh’era gnù voia ad far n’idustria e alora al s’era miss
insém a Tiziano Tioli, un so amigh, e i’iva fat l’IRCA.
In poc temp la Ferrero l’è andada in crisi e la s’è subìt rivolta ai’iavocat.
Cume risposta, si dice, che i du industriai mirandules i g’ava mandà na fotogra-
fia d’iimpiant di Granaròn e tutto si chiuse lì.
Mo seeh.., Giordano l’è bon e la dit: “t’anvrà minga che a mitéma in crisi al
Piamont e tuta l’Italia. Lasémi star, va là”
E pò al l’ha tolta col girar a pé e, pr’an girar a vod, l’ha sfaltà al circondari, a
forza ad pistaral, girandg’intorn.
Giorgio ad l’Unica
E con cla scusa lè, ad l’effimero, al na se mai sfursà tropp in dla so vita; mo par
chi? mo par cosa?
Sa emm da dvintar a dla polvra!?
Andrea Menghini
Specifichi:
- altesa : giusta, né picul, né giandòn, pr’an metar in crisi l’aversari
- aspett : dal brav ragass, pugno di ferro in guanto di velluto
- vestì : griz o in alternativa na riga, apena apena, cum as diz..gessà
- camisa: a quadartèn..sul celest quand l’è in divisa.
Polo, a quadartèn, in di dì ad festa (in tinta con dal braghi ad cutòn pez, uso gins)
- calsétt: fil da scosia
- intimo: zimmerli (presumo)
- cravata: regimental o a puà
- scarpi: ciurcc o sacson, se al primi i’iè finidi
- arlòi: suocc
- auto: Audi stescion vegon, un clasic
- lingua: italiàn o ingles..basta girar l’interutor (lingua madre inglese)
- computer: du o tri o quatar, più un ad chi picui, pr’star in dal sicur
- auricolare: integradi, in dotasiòn da la fabrica
- obbi: lavurar al sabat e la dmendga, salvo un gir in bicleta par la linea
- amicisii: in tutt al mond. A sembra cl’abbia fat al misionari, se un al lez al lettri chi ga scrivan
- cucina: sol giaponesa, sl’annè susci l’executiv cas’rispeta al digiuna.
I macaròn col petan na volta a l’ann, sol par Nadàl.
- stat civil: na muier e na fiola, in tinta. I fa pandant.
Pierluigi Grana, Pièr, l’avvocato.
A n’al cardrì minga, ma l’è nà, carsù e ancora adèss al sta a la Mirandla, e nin-
sùn l’ha quasi mai vist. C’al na sia n’alieno?
E’ pusibil che un al fàga tutt al scoli a la Mirandla, c’al dventa infin avocat e adi-
ritura docente universitario e c’al pása inoservà al Cortina?
E al bel l’è che lù al tgnos tutt e al sa tutt ad tutt, cume la RAI, di tutto e di più.
E minga sol a dla gent dal circondari, ... ad Modna,... ad Bulogna,... ad tuta la
Region e oltre.
Sa vli saver quèl ad politica e sopratutt quel ca sucèd da dre dal quinti, lù al la sa.
Minga sol indu è’ndà ier sira D’Alema a sèna, ma sa gh’era anc so muier, se so
fiola l’era andada fora col so muròz.. e cosi via discorrendo.
Insoma un petegul scientific, un cocteil tra Perri Meson, Serloc Olms e Indro
Montanelli.
la sgnurina Marchesi
Intramontabile viveur.
Elegante, vestì minim ad casmir, insoma cume s’al duviss sempar andar a na sfi-
lada o al casinò.
A un ca ta dmanda “mo che tipo el?” at prev rispondar “ehi, l’è un Luppi, parent
di Consui” e i’indigeni is’farevan subit n’idea: voia ad schersar, un pò bizar, cuma
sa da dir “al g’ha i so gust!”
Franco Gavioli, Ged....one
E po’ con tutt quel cl’a dit e scrit Giovanni Pico, chi l’ha dit ch’iera tutti verità?
Parrino, l’insgnèr
Lása chi diga ancha te Giancarlo e cuntinua a sfugàrat a far dal conferensi
davanti al Cortina; al masim ninsun at’scolta.
Artebano Barelli
Làssa chi dìga Artebano... second me te ta capì tutt ad la vita, o comunque da più
ad dimondi gent ch’ia pasà tuta la so vita insima ai lìbar.
Tancredi
Nà a Masa, terra estense, fin da picul as’capiva cl’era taià par l’arte dramatica.
Non potendo frequentare studi di recitazione, al s’è dedicà in gioventù all’automo-
bilisum, fin a dvintar pilota ad formula uno (e d’autobus, a temp pers).
Finalment un gioran la furtuna l’ha vlù cl’incuntress Giorgio (Albertazzi) ad
pasagg in dla Basa e l’è sta cume un fulmin.
Giorgio l’ha capì subit cus’agh’era sota a la sembiansa ad cal timid bagaet ad
campagna; all’ha mandà a so spesi in America, a la Scul of Performing Arts (cioè
quela di “Saranno Famosi”) e da dlè ninsùn l’ha più farmà.
Turnà a cà, ag’mancava sol cal s’imparintes con na drammaturga, Joanna
Ganzerli von Saul, e la vena artistica e la carriera l’è esplosa.
A par infin che Giuachèn (Rossini) l’abbia intitolà al so meladrama eroic in unor
ad l’ator ad San Jacum.
Intrepid e cumbativ, l’ha partecipà a la guera ad secesiòn ad Masa in di cunfront
ad Final (agh’piasiva poc al dialèt frarès).
Adess a n’al ved minga spess in piàsa; da quand i g’ha dat al ciav dal Casinò ad
Venesia, a par c’al sia sempr’impgnà.
Dialmo Cavicchioli
Lù al prev propria dir “i vlù la bicicleta, adesa pedalà, che me la me part a l’ho
bela fàta”
Ma col so caratar al na la direv mai.
Second me, se un l’ha cumprà la bicicleta da Dialmo trant’ann fa, l’è ancora in
garansia.
Se un al va là, Dialmo al s’cava al giachèt nov, al tos na ciav dal 10 e al v’la giu-
sta gratis et amore Dei.
I disan che Agnelli l’ha miss i’italien in machina, beh, e Dialmo l’ha miss i miran-
dules in bicicleta.
Parchè? Chi è di du ca fat da più par la salut ad’iitalien ?
Sl’iss fat al pàpa, al sarev stà Giovanni XXIII.
Sal fuss nà in Giapòn, e al fuss na dòna, al sarev stà na gheisa.
Sa me a fuss un scultor e a duvis far la statua dla Serenità, al turev cume modèl.
“MO 820.567 ?”
.......”.marzo ‘93”
“MO 715.043 ?”
.......”settembre ‘92”
“617880 ?”
.......”aaah...aaah...forse maggio ‘91?”
Beh, schers a part, par d’iann a sem andà avanti a Mirandla senza bisogn ad con-
sultar l’ACI o al registar nasional dal machini, parchè Amedeo al saviva tutt.
Bastava daragh un numar e lù al t’adgiva: data ad fabricasion, numar dal tlar,
proprietari, parenti stretti, cont in banca ecetera ecetera..
E se la machina da vendar l’era sua, ad sicur l’era immacolada, lucida da far
invidia a la fabrica ca l’iva fàta, e sempar d’un sol proprietari, rigorosamente
avvocato, sempar tgnuda in garagg, druvada sol a la festa, e con un schiav ca la
lavava tutt al matini.
Ma pusibil che tutt chiatar profesionista in vindisan mai la machina, che ninsun
avocat l’iss mai ciapà na buciadina, o che al schiav a n’agh gniss na volta l’in-
fluensa e al na psiss minga lavar la machina?
Ciciòn, Silvio Sitta (scutmai)
“barca afundada, non macina più” in st’al cas chè pr’esempi al n’ha miscià du
insèm.
Oppure:
“caga più un bue che cento rondinelle - caro al me profesor Festanti”, disse alla
fine di una partita a carte.
Giuseppe Borellini, Beppe, fiol dal nudàr
Le rôle du physique
Al so che dimondi ad chi poch ca l’ha tgnusù i pensan cal fuss brusc e un pò buriòs,
insoma c’al s’dess dagli arii.
Beh, inveci l’era sol na maschera.
A ghn’ha vlù anch par me a capiral e a intrar in sintonia, ma a la fin il fanciul-
lino del Pascoli l’è gnù fora,.. mo aghn’è vlú, veh.
Me ho incumincià a andar par cà ca gh’iva ott ann, e quindi a gh’è anch da capir
che al na ma vdiss minga ad bon occ, par paura ch’insidièss so fiola (e pinsar
cl’era lè cla m’insidiava me), ma alla soglia dei miei quarant’anni l’ha tacà a
torm in nota.
Me ho vù pasiensa e a l’ho tolt par la gola, oh.. minga leteralment.
A voi dir che, na volta con di caplètt fat da me madar, na volta con dal taiadeli
ad Saul, na volta con na butiglia ad barolo....l’è mo gnù zo dal pir!
A la fin a simbravan du gran amigh, al gniva sol luntèra a cà mia.
Puvrètt, s’al turness al mond a sarèvan i più du gran amigòn, a son sicur che al
gnarev megh in dl’Amcol (che se an savì brisa cusl’è, l’è mei).
Olga Scardua in Bellini, me madar
Di mamme ce n’è una sola, cusa vliv cav diga,.. sol dal robi beli.
L’ha lavurà tuta la so vita, la fat du putèn, me e me fradel Stefano, per un totale
ad 250 Kg e pasa, la tgnù bòta con me padar (cal ne minga na busca cume pigno-
leria) ormai par più ad 55 ann, la fa di caplèt chi fa al voi,... beh, con tutt quest,
an vliv minga lasaragh cumprar 5 o 6 vestì a la smana?
Avri notà che ho druvà un ritratt ad soquænt ann fa, par farla simbrar ancora più
zovna.
At capirà, le la n’agh tegn gnanc...
La so massima sudisfasion l’è quand me e lè a sem via insem e la gent l’agh dis
“siete marito e moglie?” oppure “siv du fradei?”
Le l’è nada par star in cà, ma la viv pr’andar fòra.
L’important ann’è minga in du andàr, ma che al post al sia luntàn e che in dal
turnar indrè as’sarnisa la via più longa.
Insoma, se quand a son nà i m’isan dat la posibilità ad sarnir na madar, arev pro-
pria sarni questa!
Enzo Bellini, me padar
Sperèm cla torna, acse la ved anc chiatar quatr’anvò, la Vitoria e Lorenso,
Samuele e l’Arianna.
Daniela Molinari in Bellini
Lù al lez!
Al lez la Trecani, i bigliet dal tram, al giornal, al menù dal ristorant, i giornalèn
a fumetti, i libar da scola, i romanz, le istruzioni per l’uso d’ieletrodomestic, i qua-
dern ad so surela, la publicità che a gh’è in dla posta, i libar d’anatomia, i cartei
pubblicitari, i’iepitafi in di simiteri…
Pàta par me! Dop do righi a m’indurmens.
Da cà a scola al lez in machina, da scola a cà… idem
D’altra parte parchè scrivia? Par la paura che al finisa ad lezar tutt quel che a
gh’è ad scritt.
Na volta a l’ho purtà a Venesia. Sé, l’ha dat da magnar ai clomb, l’ha dat n’ucia-
da a San Marco, ma quel che a gh’interesava da più, l’era lezar al menù dal Cafè
Florian.
E quand l’a finì ad lezar un libar ad duzent pagini, se al na g’ha atar, cusa fal?
Al l’ha torna a lezar.
E naturalment al sa da tutt, e al vol saver tutt... cus’i m’ha dat ad la machina
usada c’ho dat dentar…al presi ad la giurnada dal baril ad petroli…
Adess l’ha tolt a man al viulèn.. sperem cal nas’ferma minga sol a lezar al spartì.
Vittoria
At vadrà che quel ca vol dvintar al so muroz, al s’ha da dar da torna par conqui-
starla.
Me a prov in tutt al maneri da tri ann, ma i risultat i’iè scars.
Ho pruvà col carameli, con un qual zugatul, a purtarla in trator, a fargh’al scra-
nèn e girar cumè na giostra, a faragh pruvar al caval eletric che ho druvà par con-
quistar ch’iatar anvò, a faragh di disegn…
L’è cume al zog ad l’oca, un pass avanti e du indrè.
Adess a par che cuntandagh dal foli…, ma an m’illud minga.
L’um fa gnir in ment Gein, la donna di Tarzan, un po’ salvadga, ma bela cume al
sol.
Sàmuel