NAMBAR HRILFIENA by Rev. Dr.

Lalhmuoklien Sunday School Board,

Hmar Christian Leaders Forum
First edition 2010

Excerpts: Page 2 - 12 BUNG KHAT HNAM TINA MI ZAT 1:1-54 Mipui Tiem Dinga Pathien Thupek 1:1 Aigupta rama inthawka an hung suok kum hni kum, thla hnina ni khat ni chun, Sinai thlalera intuokna puon inah LALPAIN Mosie a biek. Israelhaiin Aigupta rama fekan ruoithe an hmang kha an ta dinga kum le thla intanna a na (Exo. 12:2). Chu chu an ta dinga kum khat kum, thla hnina ni khat ni chu, Aigupta ram an suoksana inthawka tiemin a thla sawmpathumna chie a nih. Chu hun chu Sinai thlera an um lai tak a na. Sinai thaler chu Sinai tlang bulthut, Tuipui Thia inthawka Aradia ram hmartieng Agaba litengsawl chen huopa um a nih. Thlaler ti hi Hebrai Bible a chu midbar ti a na. chu chu Septuagint a Greek tawngin eremos (desert) ti a inlet a ni leiin thlaler ti a nih. Hebrai twang midbar umzie tak chu English a steppe ti hi a na, chu chu phulleng ram, thing um nawna, hlo le phul umna hmun hi a nih. Chuong ang hmun chu beram le ran dang dang hai vaitheina hmun a nih. Fur huna chun hlo hring tam tak an dersuok hlak a, nipui le thal huna ruok chun hloring hai chu an hung tawla hmu ding an um ta ngai nawh. Chu hmuna an um lai chun intuokna puon inah Lalpain Mosie a biek a. lalpain Mosie a bieka ti hi Nambar lekhabu a hin vawi za le sawmnga lai, inbiekpui dan chi dangdang sawmhni velin an biekpui thu a um a. hi huna an biekpui dan hi intuokna puon ina inthawk (from) ni lovin, intuokna puon in sung a (in) a nih. An pahni hin intuokna puonin a um vevea inbie an nih (Num. 7:89; Deut. 31:14; Lev. 1:1). 1:2-3 Israel thlahai pungkhawmhai pop o chu a chi chiin.pasal po po.kum sawmhni chin chungtieng.ral kappa fe thei chin chu Aron le nangin a pawl pawlin in tiem vawng ding a nih. Mosie le Aron chun, Israel hnam tina mi po po, an hnam thuoitu pakhat peihai thangpuina a Israel mipuihai chu tiem dinga thupek an nih. An tiem dinghai chu pasal pop o kum sawmhnia inthawka chungtienga upa, ral kappa fe theihai pop o an ni ding a nih. Iengleia hi intiemna hi an thaw kher am a na ti suklang an naw a. Amiruokchu, an tiem ding hai hi ral kappa fe thei chin ti le ral kap thei chin ti hi vawi sawmpali lai hi bunga hin a um a. Chun ral kapa fe lo ding Levi chihai ruokchu hi intiemnaa hin tiemsa lo ding ti a ni bawk a (1:47). Israelhai chu raldo malam peia Kanan ram pana fe ding an nih a, lampuia chun do le ral tam tak an hmasuon mek bawk ding a ni leiin hi

intiemna hi Lalpain an thawtir a ni ring a um. Aigupta ram suoksanin ramtiem Kanan ram panin thlaler hmuna an um mek a, hmelma an lampui lo hluotuhai chu an do a tul zing bawk a nih. Chuong ang bawkin ringtu khawvela um ringnaa kalchawi mekhai hin ringna kawnga hmelma hmasuon le indopui ding ni tinin ei nei zing a. pathian tha hratnain khawvel Aiguptaa inthawkin sandam nit a inla khawm, khawvel thlaler ram suola sipna hmuna hin ringtuhai ta dingin hmelma tam tak indopui ding ni tinin ei hmasuon mek a nih. Chuleiin, Timothe kuoma Paulan Krista Isu sipai thatak angin rinum mi tuorpui raw (2 Tim. 2:3) ti a a fiel el bakah Ringna inruolsiekna tha chu thaw la, chatuona hringna chu chel rawh; chu chu chang dinga ko I ni (1 Tim. 6:12) tiin a hril a. ringtuhai hin hnena ei chang zing theina dingin Pathien ralthuom famkima inthuom ei tul anih (Eph. 6:10-12). Exo. 40:2 a khan intuokna puon chu thla khatna ni khat nia inngir a ni thu ei hmu a. Tuhin chu thla hnina ni khat ni a ni ta leiin intuokna puonin an inngira inthawkin thla khat a pumhlum chiein intiemna hi nei tan a nih. Chun, hitaka intiemna (census) hi Exodus bung sawmthuma intiemna le khan ngaipawl lo ding a nih. Kha huna intiemna kha chu Hmun Inthienga hmang ding Intlanna Tangka petu dinghai tiemna a na. Exodus 38:25-26 hin Intlanna Tangka chu hmu kim an ta leiin Intuokna puonin bawl zo hmaa intiemna hi zo fel an tah. Tuta Nambar 1:1 a intiemna ruok hi chu sipai a thang thei ding hai tiemna a nih. 1:4 Hnam tin laia mi pakhat, sungkaw puipa an um pei ding a nih. Jacob, patheinin Israel tia a hming a thlakpek (Gen. 32:28) khan naupasal sawmpahni a nei a. Chuonghai chu Israel hnam sawmpahni tia hriet le ko an nih. Hieng Israel hnam sawmpahni hai laia inthawka hnam tina mi a puipa amani a thuoitu peihai chun Mosie le Aron hai hi hi intiemna hun a hin an thangpui ding a nih. 1:4-16 Hieng hi I kuoma um dinghai hming chu an nih. Hi taka Israel hnam sawmpahni hai hming a hril lang hi an upat dan dungzuiin a hril naw a. Jakob (Israel) nuhmei hai nauhai hming dingzuiin a suklang lem a ni. A hmasatakin Jakob nuhmei hmasa lem leha naupasal hai (Levi chihai) thang lovin a hril hmasaa, chun Rakil naupasalhai, chu zo chun suoknu pahni Bilha le Zilpah nauhai a hril. Chun, Josef nauhai Ephriam le Manasse hai hming a lak v eve leiin Levi thang lovin hnam sawmpahni an la tling tho a nih. 1. Leha le Jakob naupasalhai: 1) Reuben, 2) Simeon, 3) Juda, 4) Issakar, 5) Zebulun 2. Rachel le Jakob naupasalhai, Josef naupasal hai hming a a lak. 6) Ephriam, 7) Manasse, 8) Benjamin,

3. Bilha, Rakil suoknu le Jacop nau hmasalem 9) Dan, 4. Zilpah, Leha suoknu le Jakob Nauhai, a naupang le hming a hril hmasa lem 10) Aser, 11) Gad, 5. Bilha nau pahnina 12) nahtali Chuong hnam tina thuoitu a lusa hai chu hieng hai hi an nih 1. Reuben hnama Elizur a na. Elizur umzie chu Lathein chu Lungpui a nih tina a nih (Nam. 1:5; 2:10; 7:30, 35). 2. Simeon hnama Selumiel a na. selumiel umzie chu Pathien chu Inremna a nih tina a nih (Nam. 1:6; 2:12; 7:36). 3. Juda hnama Nason a na, Nason chu Aron nuhmei Elisaba unaupa a nih (Exo. 6:23). Ama hi Isu Krista thlatu hai laia thang a nih (Matt. 1:4; Luk 3:32-33). 4. Issakar hnama Nathanel a na. ama hi Kanan ram enthla dinga fehai lai khawm khan a thang (Nam. 1:8; 2:5; 7:18, 23; 10:15). 5. Zebulun hnama Eliab a na, Eliab umzie chu Pathien chu Pa a nih tina a nih. 6. Josef thla a mi Ephraim hnama mi chu Elisama a na, a umzie chu Pathien chu hrietu a nih tina a nih. Ama hi Josua pu a nih (1 Chro. 7:26). 7. Josef thlaa mi bawk Manasse thla a thuoitu chu Gamaliel a na, Gamamiel umzie chu Pathian chu a mi thangpuitu a nih tina a nih. 8. Benzamin hnama Acidan a na, a umzie chu Ka pa chu roreltu a nih tina a nih. 9. Dan hnama thuoitu chu Ahizier a na, a hming umzie chu Unau thangpuitu tina a nih. 10. Aser hnama thuoitu chu Pagiel a na, a umzie chu Pathien a Hunginrawl tina a nih. 11. Gad hnam thuoitu chu Eliasaph a na, Levi hnama mi Lael naupa Eliasaph le ngai pawl lo ding a nih. Eliasaph chu Pathienin a belsa tina a nih. 12. Naphtali hnama thuoitu chu Ahira a na, a hming umzie chu thil than aw unaupa tina a nih. Hieng hnam tina thuoitu sawmpahni hai hi intiemnaa Mosie le Aron thangpuitu ding le an hnam thuoitu dinga Pathienin a ruot an nih. Chuleiin, umhmun an khuor huna hotu an na (Nam. 2:1-34), pahnam hminga Pathien hmza thil inhlan an nei huna thuoitu (Nam. 7:1-78), le Sinai tlanga inthawka an suok dawk hun haia thuoitu an nih (Nam. 10:11-36). Hieng hai hi Hmar Bible a mipuihai I thlang ti a inlet a na, RSV a chun chosen from the congregation mipui laia inthawka thlang ti a nih. KJV a chun renowned of the congregation mipui laia hmingtha ti a inlet a nia. Chun, NIV a chun appointed from the community mipui laia ruot tiin an let a, NCV a ruokchun, chosen from the people mipui laia inthawka thlang ti a nih. Chuleiin,

mipuiin an thlang suok ni lovin, Pathienin mipui hai laia inthawka mi hmingtha le fel aman a thlangsuok lem hai ti hi ni lem awm a nih. Chun 1:1, 4 thu le khawm hin an mil bawk. 1:17-19 Chuongchun, Mosie le Aron chunmipui pop o chu a chi chiin a sungkuo kuoin, an hming indawt dan ang peiin kum sawmhni chin chungtieng pop o chu an thlatuhai hming an tar lang a.. Sinai thlalera chun a tiem tah a. Mosie le Aron chun Pathienin a thlangsuok sawmpahnihai chu an thuoi a mipui chu an tiem tah a. pathienin a thlanghai chu an sawisel naw a, ngaidan thalem thurawn khawm an pek bawk nawh. Pathienin a ruot le a thlang an ni leiin to tawkin an pawm a, lungril po povin sin an thawpui a nih. Pathien remruotna nag anga um a zui hi a tha tak a nih. Nova nau upatak Sema thlahai hi Semitic hnamhai tia ko an ni hlak a. thlatuhai suina a chun Abraham, Israelhai thlatubul hi Sema thla hai laia mi nia ngai a nih. Chuong, Sema thlahai chun an thlabulhai hming hriet hi an ngai pawimaw em em hlak a. Chuleiin, Isu Krista thlatuhai hming khawm seitak ei nei a nih (Matt. 1:1-16). Hitaka intiemna khawm hi a chi chiin an hang the hran phawt a; chuonghai chu Israel hnam sawmpahni haia inthawkin a nih. Chun, a sungkuoin ti le a pahnam hnamin ti hi a kawk chu thuhmun a nih. Chuongchun, pasal kum sawmhni chin chungtieng pop o chu an hming indawt dan ang peiin, ral kap a fe thei chin hai chu an tiem tah a. kum sawmhni chena upa hai hi ral kap a fe thei chin hai chu an tiem tah a. Kum dawmhni chena upa hai hi ral kapa fe thei a ngai a ni hlak. Hmelma ral do cing le ram san dingin an thlatubul an hriet chieng a lo tul hle a ni ti a chieng a; chuongang bawkin ringtu suol ral do a hnena chang dingin Pathien nau ei nina bulpui Krista le ei in zawm dan hriet nawn rawp hi a pawimaw a nih (Gal. 3:26; jonah 1:12; 1 Johan 3:2). Intiemna nei dinga Pathienin thu a pekna ni chu thla hnina ni khatni a na, chu ni la la chun intiemna hi an nei nghal a nih. Hi taka inthawk hin Mosie le Aron hin Pathien thupek an zawm that zie hriet thei a nih. Lalpa in Mosie thu a pek ang takin Sinai thlaler hmuna chun an tiem a nih. Pathien thu angtakin iengkim an thaw a an zo a nih. Chu chu ringtu nunna dinga pawimawtak a ni hrim a nih. 1:20-43 Israel naupa upatak Reuben thla suonhai chu a chi chiin, an pahnam, an hming dan ang epiin, pasal kum sawmhni chin chuntieng, ral kap thei chin Hi intiemnaa hin chang 6-15 a Israel hnam hai a suklang dan indawt in an tiem a. a danglam deuna chu chang 6-15 a khan Gad chu a nuhnungtak dawt a sawmpakhatna hmuna a um a, tuta tum ruok hin chu Simeon thlahai zo chara a pathumna a athang ta

a. hnam dang hai po chu an upat dan indawtin tiem an ni a. a hmasatakin Leha nauhai, chun Rakil nauhai, atawptaka suoknuhai nauhai. Chuongchun, a upatak reuben hnamhaia an tan a. chu chu intiemna le thuoitu ding thlangnaa khawm an zui pei a nih. Amiruokchu, riebuk khuorna huna le inzinsuokna ding huna ruok chu Juda hnamhai hi a hmasatak an ni hlak. Chun, hitaka intiemna a hin Levi ruokchu biekbuk enkawltu an ni leiin an thang ve nawh (1:47-54). Levi chihai thang than gnaw hai sienlakhawm, Josef chihai chu hnam hnia thein Ephriam thlahai le manase thlahai a hrana tiemin an um. Josef chu malsawmna a unauhai chan lethni chang dinga ti a ni leiin an pa Jakob in Josef nauhai pahni Ephriam le manasse hai chu malsawmna an khum hrim a nih (Gen. 48:1922; 49:22-26; Deut. 33:13-17). Chuleiin hi intiemnaa hin Levi chihai than gnaw hai sienkhawm hnam sawmpahni an tling thei a nih. Chang sawmpariet a a sungkuo kuoin ti hi Hebrai tawng chu hityallad ti a na, a umzie chu sungkuo thlatuhai hrilna a nih. Chuong anga an hriet theina ding chun Israel naupasalhai thla suonhai chu a hran hranin a the phat a. hitaka thla suonhai ti hi Hebrai twang chu toledot ti a na, a umzie chu sungkuo thlahai suina tina a nih. Chu chu genesis a thlatu hmasahai sungkuo chanchin cuina a a lo hril ang kha a nih (Gen. 5:1; 6:9; 10:1; 11:10; 25:12, 19; 36:1). Hmar Bible a chu an hming indawt dan ang peiin tia a hril bak chu iengkhawm a hril san aw a. NIV chun one by one pakhat khatin, tiin a hril saa. Chuleiin, hi intiemna hi pakhat khatin, uluk le indiktaka ralkap thei chin, kum cawmhnia inthawka a chungtieng po an tiem a nih. Ral kapa fe thei chin haiin an thlatubul an hriet a pawimaw a tul a. pathienin hnam dang le innei pawl a khap leiin an thlatu indiktak an hriet suok a tul a nih. Chuong ang bawkin vawisuna ringtu suol ral do dinghai khawm hin ei insiengna ei thlatubul Krista le ei inzawmna ei hriet chieng a pawimaw hle a nih. 1:44-46 Mosie le Aronin Israel puipa sawmpahni hai le an tiemhai chural kap thei chin pop oan tiemhai pop o nuoi ruk sang thum za nga le sawmnga an nih. Israelhaiin Aigupta ram an suoksan lai khan puitling ruok nuoi ruk lai an na (Exo. 12:37). Chun, intlanna tangka pe dinga Exodus 38:25-26 a an tiemhai chu, Israel mipui kum sawmhni chungtieng po chu mi nuoi ruk sang thum le za nga an nih. Tuta tuma ral kap thei chin an tiemhai khawm chuong zat bawk chu an nih. An nambar inzat sienkhawm intiemna thuhmun ruok chu an nawh. Chun, hi zo hin Moab rama an um lain intiemna an nei nawk a (Exo. 26:1-51). Mi tantakin Baal-poer Pathien an biek leiin Pathien an suklungsen a. pathien hremna lei

chun mi tamtak an thi zo char lai a ni leiin an kiem nasa hle el. Chuleiin an tiem hai chu nuoi ruk sang khat za sari le sawmthum chau an nit ah. Chuong intiemna tumhnia an tiem thei chin hai chu a hnuoia ang khu a nih: 1. Juda Bung 1: 74,600; Bung 26: 76,500 2. Dan 62,700; 64,400 3. Simeon 59,300; 22,200 4. Zebulun 57,400; 60,500 5. Issakar 54,400; 64,300 6. Naphtali - 53,400; 45,400 7. Reuben 46,500; 43,730 8. Gad 45,650; 40,500 9. Aser 41,500; 53,400 10. Ephriam 40,500; 32,500 11. Manasse 32,200; 52,700 12. Benjamin 35,400; 45,600 13. Total Bung 1: 6,03,550; Bung 26: 6,01,730 1:47-49 Levi mihai chu an thlatu hnam anga a chi chia tiemnaa chun an thang ve nawhIsrael mihai lai I tiem sa ding a ni bawk nawh. Levi mihai chu Sinai tlang bula Israelhaiin bawngte lim an biek lai khan an thang ve naw a (Exo. 32:26, 28). Lalpa kuom tienga thangin Mosie an thangpui a. chuongchun, tuta tuma ral kap thei chin an tiemnaa khawm hin an than gnaw ding a na, Israel mihai lai chun tiem sa lovin an um ding a nih. 1:50-51 Levi mihai chu inhriettirna biekbuk enkawltua le a thuomhnaw pop o le chutaka thil um po pohai enkawltu dingin I ruot lem ding a nihbiekbuk chu a suok ding po leh Levi mihai chun thiek hlak an ta, chun, biekbuk chu keizar ding a nip o leh, Levi mihai chun keizar hlak an tih Levi mihai chu inhriettirna biekbuk enkawltu an ni leiin Israelhai lai chun ngirhmun le sin pawimawtak cheltu an nih. Hitaka inhriettirna biekbuk ti hi bung khat chang khat a intuokna puonin a ti le khan thuhmun an nih. A chang chun inhriettirna puonin (Exo. 9:15; 18:2) ti dam, thuthlungna puonin ti dama ko a ni bawk hlak (2 Chro. 24:6). Inhriettirna ti hi Hebrai tawng chun eda ti a na, chu chu hrilnawnna ti leh a thukawk thuhmun a nih. Israelhai laia inhriettir nawn rawp hlak ding chu, Israelhai kuoma Pathien thutlhung, Pathien Dan ziek ngeia peka um Dan Sawm hi a nih.

Biekbuk chu Israelhai ta dinga pathien Dan inchukna leh zawmna hmun a ni leiin inhriettirna amanih hrilnawnna hi hmang a ni ring a um. Levi chihai chu indona hmuna fe a ral kap a thang ngai lo ding an ni leiin hitaka Israelhai tiemna a hin tiem sa lo ding an nih. Anni chu intuokna puonin enkawltu le vengtu ding an nih. Biekbuk thuomhnaw le a sunga hmangruo pop o vengtu ding an nih. Biekbuk keizar hlak an ta, thiek hlak an ta, a thuonhnaw hai pop o chu zawn hlak an tih. Biekbuk an keizar pha chun a vel tuokin an riekngha hlak ding a na; chuleiin, ral kaput ding hai lai chun tiemsa lo ding an nih. Hi hin Israelhai ta ding chun an Pathien biekna hi thil dang po pohai nekin a pawimawin an ngaihlu tak ding a nizie a suklang a nih. 1:52-53 Israel mihai chun mani hmun sengah, an puoninhai chu zar an tih. Levi mihai ruokchun Israel thlahai chunga lunginsenna a um nawna dingin inhriettirna biekbuk chu an enkawl ding a nih. Lalpa chun a theinghlimna hi thienghlim taka vawng dingin a dita. Israel mihai po po chun Pathien thienghlimtak umna hmun chu an sukpawrche ding a ni naw a. Inza taka an vawng theinghlim zing ding a ni ti hi an theingil ngai der lo dingin a dit a nih. Chuleiin, mawphurtu dinga ruot hrim ni lo haiin biekbuk le a hmangruo hai hrim hrim an lo tawk pal chun an sukpawrche nghal ding a nih. Chuong anga an lo sukpawrche pal chun an ta dinga thina intlun theina khawp hiela suol lientak a nih. Pathien thienghlimna ngainepna lien tak a nih. A lo sukpawrchetu chau ni lovin Israel mipuihai chunga chen khawm sietna nasatak hung tlung theina hiel a nih. Chuleiin, biekbuk chu himtaka an venghim a tul thu hi lai thua hin a suklang a nih (Nambar 17:13; 18:5; Josua 9:20; 22:20). Chuleiin. Israel mihai chun a chi chiin beikbuk kawlvel a chun, Levi chihai puonina inthawka iengchen amani a hlaa an puonin hai an keizar hlak ding a nih. An puonin keizar dan ding chu kimchang takin bung hnia hrilin a um. Israel mipui haiin biekbuk le a sunga hmangruohai po po chu theinghlim taka vawnga an sukpawrche nawna dingin, biekbuk le mipui inkara chun Levi chihaiin an puoninhai chu beikbuk veltuokin an keizar phawt ding a nih. Chu chun biekbuk sukpawrche leia Israel mihai chunga Pathien lungsenna hung tlung ding laka inthawkin venghimin an um thei ding chau a nih. Hi hin Pathien beikna hle Pathien beiknaa hmang hlak hmangruo dangdang hai kawm vawng thienghlim a tulzie dam, ser-le-sang hmangruohai le sacrament thuomhnaw hai chenin uluktaka vawng theinghlim le siehran a tulzie dam, rawngbawlna seng seng nisienlakhawm Upahai le pastorhai

chanpuol bikhai hi in uptake hmanga vawng thienghlim a tulin a pawimaw a ni ti a min chuktir a nih. 1:54 Lalpa in Mosie thu a pek ang po po chun an thaw tah a. Lalpa (Yahweh) in Mosie kuoma thu a pek ang taka iengkim an thaw a, lalpa thupek an zawm thu ei hmu a. nambar lekhabu tawp tieng panga ruok chun Pathien thupek an zawm nawna thu tamtak a um a. a phutin sukdik hai sienlakhawm, Lalpa thupek zawm famkim lova an helsan ruok chun thil tha an tlun ngei ngei hlak zie chu Nambar lekhabua inthawk hin ei la hung hriet tung pei ding a ni.