FUNTANA ALL'OMBRA

'Sta funtanella,
Ca mena 'a tantu tiempo ll'acqua chiara,
Ha fatto 'a cchiù 'e 'nu seculo 'a cummara.
Piccerenella,
Venette 'a nonna a vevere, e ce steva
'Nu figliulillo, a ll'ombra, ca 'a vedeva.

E, a ll'ombra, tutt' 'e dduje

Accumminciajeno a se parlà c' 'o "vvuje".
Po' ognuno 'e lloro se parlaje c' 'o "ttu".
E, sempe cumpiacente,
'Sti ffronne, alleramente,
Facevano "ciù-ciù".

Po' ce venette
Pur'io 'na vota ca stevo arzo 'e sete
E ca cercavo 'e vvie fresche e cujete.
E te vedette
E t'accustaste e mm'accustaje pur'io
E 'o core tujo cercava 'o core mio.
Venettemo 'a ddoje strate
E p'una ce sperdettemo abbracciate,
Pe' ce vasà, pe' nun ce lassà cchiù.
E, sempe cumpiacente,
'Sti ffronne, alleramente,
Facevano "ciù-ciù".

Quant'ate appriesso
Doppo tante e tant'anne venarranno?
Quant'ate matremmonie se farranno?
Mo fanno 'o stesso:
Quase tutt' 'e ffigliole 'e 'stu paese
E, 'a sprucete ca sò, po' sò curtese.

E, spicialmente 'a 'state,

Aspettano 'e figliule 'nnammurate
E 'sta funtana attacca 'a giuventù.
E, sempe cumpiacente,
'Sti ffronne, alleramente,
Ce fanno 'stu "ciù-ciù".