VOTUM

Marhitehite Goar ni Debata Ama dohot Goar ni AnakNa Tuhan Jesus Kristus dohot
Goar ni Tondi Parbadia, na tumompa langit dohot tano on. Amen
Gok asi ni roha ni Jahowa do tano on. Marhite-hite hata ni Jahowa do manjadi
angka langit. Marolopolop ma hamu, ale angka partigor mangasahon Jahowa,
talup do marende angka na unjur marroha. Haleluya
Marende: Haleluya… Haleluya... Haleluya...
MARTANGIANG MA HITA
Ale Tuhan Jesus, Tuhannami! Na mandok mauliate do hami tu Ho, ala ditaluhon
Ho do dosa dohot hamatean marhitehite hamamateM i, ala disondangi Ho
tanomannami, asa marpangkirimon na mangolu hami ala ni hahehehonMi. Ndang
pola be mabiar hami mida hamatean, ai Ho do uluanami, ruasMu do hami.
Dipaunsat Ho do hami sian haholomon tu hatiuron, sian hamatean tu hangoluan.
Antong pargogoi ma hami mamuji dohot mangoloi Ho ariari, pasangapon Ho di
bagasan haporseaon na mangolu, paima sahat hami tu lambungMu. Amen

PATIK
Tatangihon ma Patik ni Debata di minggu sadarion ima Patik Paonophon dohot
lapatanna.
Patik Paonophon:
Unang ho mamunu!
Dia do lapatan ni i?
On do: Ingkon dihabiari rohanta Debata jala ingkon holong rohanta di Ibana, asa
unang hita olo mambahen sahitsahit tu nasa na mangolu, ingkon roha
pangoluhon do rohanta di nasa na mangolu.
Disi ma sahatna. Antong rap mangido gogo ma hita tu adopan ni Debata.
"Ale Tuhan Debata sai pargogoi ma hami mangulahon na hombar tu PatikMi.
Amen"
Manopoti Dosa
Tatopoti ma dosanta na godangi tu adopan ni Debata, martangiang ma hita.
Ale Amanami jala Debatanami, na di banua ginjang; Pargogo na so hatudosan!
Pardengganbasa do Ho, jala ro di salelenglelengna do asi ni rohaM. Sai
marpamuati ma rohaM hajahatonnami, jala sai unang be ingot angka dosanami; ai
jotjot do hami mardosa maradaphon Ho, jala jotjot do husungguli hami rimasMu
marhite sian pangalaosiannami, unang ala asi ni rohaM, sai urupi ma hami, Ho ale
Tuhan Debata hatuaonnami, palua hami, jala sesa dosanami, ala ni AnakMu,
Tuhan Jesus Kristus, Tuhannami. Amen
...Musik...
Bagabaga Taringot Tu Hasesaan ni Dosanta
Parasi roha jala pardengganbasa do Jahowa, lambat tarrimas jala Parasiroha
godang. Ndang tarbahen tu hita hombar tu angka dosanta, jala ndang dibaloshon
tu hita hombar tu angka hajahatonta. Songon asi ni roham ni amaama mida angka
anakna, asi ni roha ni Jahowa di angka na manghabiari Ibana. Hasangapon ma di
Debata na di ginjang. Amen
Epistel di mingguta sadarion imma sian Ulaon ni Apostel 3 ayat 12
sahat tu 19. Marsorin-sorin ma hita manjaha sa.
3:12 Alai marnida i si Petrus, ninna ma mandok natorop i: Hamu, halak Israel,
boasa longang rohamu mida on, boasa hami diberengi hamu, songon na hira
gogonami sandiri manang hadaulatonnami mambahen mardalan halak on?
3:13 Na dipasangap Debata ni si Abraham, si Isak dohot si Jakkob, Debata ni
angka amanta i do Jesus naposona i, na pinasahat jala na sinoadahonmuna di jolo
ni si Latus na mandok uhumna, paluaon Ibana nian.
3:14 Alai disoadahon hamu do na badia jala partigor i; dipangido hamu do,
lehonon tu hamu pamunu i.
3:15 Alai dipusa hamu do partogi tu hangoluan. I ma dipahehe Debata sian na
mate; hami do angka sitindangi ni i!
3:16 Asa ala ni haporseaon di Goarna do dipargogoi Goarna halak on na niida jala
na tinandamuna, gabe dilehon haporseaon na sian Tuhan i do hahisaron tu ibana di
jolomuna saluhutna.
3:17 Onpe, hamu ale angka dongan, huhilala, na hurang boto do hamu, umbahen
na diulahon hamu i, songon i do nang angka sintuamuna.
3:18 Alai dipasaut Debata do disi na pinaboana hian marhitehite hata ni saluhutna
panurirang, mandok: Sitaon na bernit do anggo Kristusna.
3:19 Antong, pauba jala paulak hamu ma rohamuna, asa tarsesa dosamuna,
DISI DO SAHATNA. MARTUA MA ANGKA NA TUMANGIHON
HATA NI DEBATA JALA NA UMPEOPSA. AMEN