PASTORAL CARE LAMAH

Ziaktu: Capt Lalthlamuana

Bible Chhiar tûr: Johana 13:34,35; Tirh. 20:28-31

Pastoral Care tih ṭawngkam hi hun rei tawh tak aṭangin an lo hmang tawh a. Mîte rilru leh ngaihtuahna
tiphûr a, tisa leh thlarau nun thlenga tichak tura fuihna leh ṭanpuina hi a ni. Kan hriatthiam dan tlangpui
ah chuan – Pastor/Rawngbâwltu (Kohhran hrang hrangin hming kan vuah dan a inanglo) te hnathawh
leh an rawngbâwlna, Kohhran mipuite leh mamawhtute hnêna tisa leh Thlarau lam nun tichak tura
fuihna leh ṭanpuina te, hmangaihna nêna ngaihsakna leh rawngbâwlsakna hi a ni. Natna leh thihna te,
manganna leh harsatna hrang hrang tuartute, thlarau nun chauh avanga hnungtawlh mêk te
dawmkânga ṭanpui te hi Pastoral Care hian a huam. Tisa leh thlarau lama malsâwmna leh hlawhtlinna
dawngte hriatpui leh lawmpui a, hmasâwn zel tur leh thlarau lama tichak tura fuihna te hi a keng tel vek
a ni.

1. Pastoral Care chungchang Bible a kan hmuh dan.

‘Pastor’ tih hi Latin ṭawng aṭanga lâk a ni a, a awmzia chu Beram vengtu (Shepherd) tihna a ni. Bible ah
hian Pathianin a mi Israelhote chu a beramte an nih thu sawina kan hmu a (Ezekiela 34:30,31). Israel fate
Aigupta sal ata hruai chhuak tur khan Mosia kha a pu Jethroa beramrual a vên laiin Lalpan a ko a. Israel
Fate chunga rorel a, an lal ni turin Beram vêngtu naupang tak Davida kha Lalpan Zawlnei Samuela
hmangin hriak a thih bawk.

Isua Krista khân amah zui a, a rawngbâwlna chhunzawm tûrin Zirtir 12 a buatsaih a, a kaihruaiin a chher
hriam nasa hle a nih kha. He khawvêl a chhuahsan dawn khan chung mite chu a aiawh a, a
rawngbâwlhna thawk chhunzawm turin a commissioned ta a ni. Chu hna leh mawhphurhna chu inhlan
chhawng zelin, Bible-ah pawh hian kohhran enkawlna leh kaihhruaina hna thawktu Upate fuihna pawh
kan hmu nual bawk. Amaherawhchu, Isua Krista hian amah chu Berampu tak tak a nih thu a sawi a.
Johana 10:11 kan en chuan Isua Krista khan amah chu Berampu ṭha a nih thu a sawi kan hmu bawk.
Chuvangin Berampu tak tak chu Isua Krista chauh hi a ni. Keini mihringte chu ama aiawha hnathawk tura
a thlan leh a kohte kan ni tih erawh kan hriat a ṭul hle. Berampuin a beramte hmangaih leh lainatna nen
a ngaihsak a, a vêng ṭhin ang hian rawngbâwltute chu Kohhran mipuite hmangaihna leh ngaihsakna
nena rawngbâwl tur an ni tih a kâwk thei ang.

2. CMCS Rawngbâwlna leh Pastoral Care

CMCS rawngbâwlna a tel ṭhin leh inkhawm ṭhin member pawh hi kan ṭhahnem viauin a lang. Tin,
member te hi zirlai leh hnathawk te, sumdâwnna leh tih tur bik nei a awm te kan nih avangin kan tih tur
leh hnathawhna atâna remchâng ang zelin Kolkata khawpui hmun hrang hrangah kan awmdarh nasa hle
a, CMCS rawngbâwlna hian Kolkata-a Mizo awmte min phuarkhawm ṭhain, inhmelhriatna leh inzawmna
ṭha tak min siamsak a, chuvangin, CMCS rawngbâwlna hi a hlu in a pawimawh tak zet a ni.

2.1. Pastoral Care kan mamawhna ṭhenkhat lo tarlang ila:

(a) Mahni hna leh tih tur ṭheuh te ngaihtuaha buai tak tak te kan ni vek mai a, Kohhran inkhawm leh
programme pawh a zing thei lo. Chuvangin kan thlarau nun tichak tura fuihtu leh ngaisaktu kan mamawh
ṭhin a ni.

(b) Mahni chhûngkhat lainate kalsan a, hnamdang zinga khawsa kan ni hlawm a, natna te, thihna te leh
harsatna ten min tlâkbuak ve reng bawk a, hetiang hunah hian Pathian hnêna min dinpui tur leh min
hnêmtu kan mamawh viau ṭhin a ni.

(c) A tam ber chu zirlai, kum lamah pawh naupang zâwkte an ni hlawm a, mahni chhûngte enkawlna leh
control-na dawng loin an awm a, khawsak phung inthlahdahna leh thlarau lam nun thlenga hnungtawlh
theihna tam tak an nei a, ngaihsak an ngai hle mai.

Han sawilan awm tak tak dangte pawh kan ziak lang vek sêng lo a, hetih mêk lai hian CMCS-ah hian
Kohhran enkawl tura thawktu bîk Pastor (Ordained minister) erawh kan nei lo a, chuvangin, Kohhran
puipate leh Nu leh pa, kum thuah leh thlarau lama puitling zâwkte mawhphurhna a sang hle a ni tih kan
hriatreng a pawimawh hle mai. Tin, tunlaia Kohhran chakna leh hmasâwnna daltu lian tak zinga mi chu
Kohhran mipui zingah inhriatpawhtawnna leh inngaihsaktawnna kan tlâkchham vang a ni fo ṭhin. Chumi
siam ṭha tur leh chumi atâna hmalâkna chu Kohhran chuan a ngaipawimawh hmasa ber tur a ni.

2.2. Rawngbâwltu/ Kohhran Upate mawhphurhna

I Peter 5:2 ah chuan Kohhran upate fuihna thu heti hian kan hmu a, “In zinga Pathian pâwlho awm chu
enkawl rawh u; tih tur a nih vang ni lovin, Pathian thu anga châk chung zâwkin, hlêpna bawlhhlawh duh
vang ni hek lovin, rilrua duh tak zawkin, in chante chungah intilal hek lovin, pâwlho entawnan insiam
zâwkin ho rawh u.”

“In zingah damlo an awm em? Kohhran upa kohtir sela, anin Lalpa hminga hriak hnawihin a chungah
ṭawngṭai rawh se; tin, rinna ṭawngṭaina chuan damlo chu a chhandam ang a, Lalpa chuan ani chu a kai
tho ang; tin, thil alo tihsual tawh chuan ngaihdamsak a ni ang” (Jakoba 5:14,15).

Hêng fuihna aṭang hian Kohhranho enkawlna leh ngaihsakna - Pastoral care chu kohhran Upate
rawngbâwlna leh mawhphurhna pawimawh tak a nih dan hetiang hian kan hmu:

Thil ṭha leh mawi a nih vang chauha kan tih tur a ni lo.

Pathian thu leh Lalpa laka kan mawhphurhna zawk a ni.

He mawhphurhna hi hlim tak leh phûr takin kan thawk tur a ni.

He mawhphurhna hi chhûng lam aṭanga pawm thlapna rilru nen kan kalpui tur a ni.

Kohhran upate rawngbâwlna chu Lalpan a ngaithla ṭhin.

Rinna nena Kohhran Upate ṭawngṭaisakna chuan Damna a thlen ṭhin.

Rawngbâwltute ṭawngṭaisakna hmangin midang ten Lalpa ngaihdamna an chang thei.

Midangte ngaihsakna leh hmangaihna nêna rawngbâwltu leh Kohhran hruaitute inpêkna hian,
Kohhranah leh mipuiho zingah hmangaihna leh Thlarau Thianghlim malsawmna a thlen ṭhin a ni. Chu
hmangaihna leh ngaihsakna chuan mîte a hîp khâwm a, Kohhran a tinungin kohhran chu a lo ṭhang lian
ṭhin a ni.

Hêng aṭangte hian Rawngbâwltu/Kohhran upate hi mawhphurhna pêk an ni satliah lo a, an kutah hian
Lalpan malsâwmna a dah a ni tih kan hmu bawk. Rawngbâwltute pawhin he mawhphurhna leh chanvo
ropui tak hi, inpêkna leh rinna nei chunga an vawn nun reng a ṭûlin a pawimawh hle mai.

2.3. Kohhran mipuite mawhphurhna

Inhmangaih tawnna leh inngaihsak tawnna hi Isua Krista pawh khan a ngai pawimawhin a zirtir nasa hle
a, – “Thupêk thar ka pêk che u hi, in hmangaih ula; keiin ka hmangaih ang che u hian nangni pawh
inhmangaih ula. In inhmangaih chuan mi zawng zawngin ka zirtirte in ni tih chu miah chuan an hria ang.”
a ti a (Johana 13:34,35). Isua Krista ṭawngkam leh zirtirna aṭang hian keini ringtute tan a pawimawhzia
leh kan mawhphurhna hetiang hian kan hmu thei bawk:

Isua Krista thupêk a ni.

Kan zavaia kan tih tur leh mawhphurhna a ni.

Isua Krista hmangaihna leh rilru ang pu a inngaihsak tawn tur kan ni.

Kan inhmangaihna leh inngaihsak tawnna aṭangin ringtu kan ni tih midang ten an hre dawn a ni.

Mi tam tak pawhin hemi chung chang zirchianna – Research leh Survey te pawh an nei a, chutiang an zir
chianna aṭanga an hmuh chhuah pawimawh tak chu – Kohhran hmasâwnna hrang hrang- Tisa leh
Thlarauva ṭhanlenna te, Kohhran member punna leh insawhnghehna lama Kohhran hmasâwnna tam ber
chu Pastor/ Kohhran puipate leh Mipuiten Pastoral Care an kalpui danah leh, an ngaihpawimawh dânah
a innghat thûk hle tih hi a ni.

Southern California a Kohhran pakhat New Life Church an zir chianna ah chuan – Kum 1999 ah khân an
Kohhrana inkhâwm ṭhin chu mi 60 bawr vêl an ni a, chutih lai chuan Pastor pakhat, mite ngaihsak leh an
mamawhna kawng hrang hranga ṭanpui peih tak mai an nei a, tichuan Kohhran mipuite enkawlna leh
tisa leh thlarau lama an mamawh anga rawngbâwlna kalpui tûrin an han inbuatsaih ta a, mipui te
zawhna leh chhânna te buatsaihin an dinhmun an zirchianna aṭang chuan, Pastoral Care an kalpui dân
chu ṭha zâwk a kalpui a ngai tih an hmu a, Pastor leh Kohhran Upa te, Kohhrana mi ṭhenkhatte chuan
uluk taka inbuatsaihna nen ruahmanna thar siamin an kalpui ta a, Kum 2004-ah chuan an Kohhrana
inkhawm ṭhin chu mi 1100 vel lai an tling ta mai a ni. Kum 6 chhungin an kohhran a inkhawm ṭhin chu
member 60 aṭangin 1100 velah an pung tihna a nih chu.

CMCS-ah pawh hian a chang chang a intlawhchhuahna (Outreach programme) kan neih ve zauh ṭhin tih
loh hi chu Service Committee lam aṭang pawh hian ruahmanna tam tak a awm rih lo niin a lang a, hemi
kawngah hian hmabâk leh tih tur pawh tam tak kan nei tih a chiang viau awm e.

Kan sawi tâk angin hna pawimawh tak tak thawkte leh tih tur bîk nei a awm kan ni hlawm a, Kohhran
enkawltu bîk Pastor kan nei lo bawk a, chuvangin kan dinhmun leh midangte tih dan thlir chungin, keini
pawh hian hmalâkna tur atâna bul ṭanna leh kan tih hlawhtlin ve theih âwm tâwk ṭhenkhat te han
tarlang ila:
Pastor/Upa te rawngbâwlna bâkah Pastoral Care group siam.

Group Member 2/3 aia tam lo a in ṭhenin, group khat chuan in 3/4 vêl lek hunbi nei a tlawh dan fel taka
siamin, chûng mite chu ṭha taka ngaihsak.

Kohhran mipui leh chhûngkuate an hun pawimawh- Birthday, anniversary, etc. te chhinchhiahna bîk
siam a, Pathian hnêna lawmthu sawina leh ṭawngṭaina neih pui. An inah ngei kal a remchang lo a nih
pawhin Phone hmang pawha an hun pawimawh hriatpuina tih lan.

Hunbi nei a Phone call hmanga an harsatna leh an dinhmun ngaihsaka ngaihven ṭhin.

A tawpber atan chuan Pasoral Care tih hian mi tam tak chuan Pastor/ Ordained minister te rawngbâwlna
bîk chauh leh an tih tur bîk emaw an ti fo ṭhin. Ṭhenkhat chu hun puma rawngbâwl tura inpe te an ni
ngei mai. Amaherawhchu, ringtute chu kan zavai hian Thlarau thilpêk leh malsâwmna kan dawn ang zel
a, midangte hmangaih tur leh rawng inbawlsak tawn tura koh kan ni tih kan hriat reng a ṭul a ni.
Chutiang tura koh kan nih vek avangin ringtu mimal tinte hian Lalpa lakah mawhphurhna kan nei ṭheuh a
ni.

Kan nihna leh thuneihnate chu a inang vek thei lo a, amaherawhchu, kan zavaia chunga thuneitu leh
min kaihruaitu chu Isua Krista hi a ni a, ama hnen aṭanga malsâwmna leh thlarau thilpêk kan dawn ang
zel a hna thawk tur kan ni zawk a ni tih hriain, hmalam panin ṭan la thar zel ang u.