PENGENAP TESA

Pengenap tesa tu leka jaku ti dikena nunjukka penyampau tauka pemayuh, lebuh kitai bejakuka

utai ti ulih ditiap tauka ditesa.

NO. PENGENAP UTAI DITESA JALAI NGENA

TESA
1 Sikat Pisang, lengki, terenjuk Sesikat buah pisang
2 Tangkai Padi, buah rembai, pisang Setangkai buah rembai
3 Tandan Buah nyiur, sawit enggau buah bukai ke Setandan buah nyiur
betandan
4 Pating Buah sibau, bunga Sepating buah sibau
5 Singkap Pinggai, chapak, mangkuk, penganan, Sesingkap pinggai
idang manyi, atap sing,papan
6 Lambar Tikai, buk, kain, baju, tanchut Selambar buk
7 Bentuk Tinchin Sebentuk tinchin
8 Batang Sungai, kayu, segerit, ruku Sebatang sungai
9 Pasang Kasut, selipar, tanchut baju, antin Sepasang kasut
10 Bilah Duku, lungga, chandung, pedang, Sebilah duku
nyabur, ilang
11 Mata Ginti, taut, peti, panjuk Semata ginti
12 Rawan Jala Serawan jala
13 Buah Rumah Sebuah rumah
14 Bidang Kajang, pukat, tanah Sebidang kajang
15 Igi Telu, buah Sigi telu
16 Jeput Garam, biching, gula Sejeput garam
17 Dampah Mua Sedampah mua
18 Lebuan Bebendai, setawak Selebuan bebendai
19 Limpir Keretas Selimpir keretas
20 Lungkit/lungkang Buah rian, pakan, isu, tutung Selungkit buah rian
21 Leka Buah ke beleka, mata, leka marik, ubat Seleka buah dabai
22 Tusuk Ikan, senggang Setusuk ikan
23 Puchuk Upa, surat pekirum, tubu Sepuchuk upa pantu
24 Pun Kayu, utai tanam, utai tumbuh Sepun tapang
25 Ruas Buluh, pansuh, asi pulut, betis Seruas buluh
26 Luntang Asi pulut, techal engkabang, tegelam Seluntang asi pulut
27 Gulung Tali, tikai getah, kain getah, tali Segulung tali
28 Gelung Senggang, rutan Segelung senggang
29 Ringka Antu pala Seringka antu pala
30 Raban Ikan, jelu, mensia, engkerumung, daun Seraban ikan enseluai
terup
31 Lumpung Kayu, mulung Selumpung kayu
32 Kerat Ikan, jelu Sekerat ikan
33 Lampang Dagin Selampang dagin
34 Lapis Tilam, pua, dinding Selapis tilam
35 Kelapis Getah, tikai getah, kain getah Sekelapis getah
36 Perugan Buluh, kayu, sere, lengkuas, kechala Seperugan buluh
37 Ginchil Buah maram, ridan, lemayung Seginchil buah maram
38 Sirap Bawang, lia, buah nanas, utai bukai ke Sesirap bawang
disirap bakung
39 Tuku Belachan, semakau Setuku belachan
40 Beluku Getah, nyatu Sebeluku peku getah
41 Tumpuk Kulat, chabi, utai bukai ke ditumpuk Setumpuk kulat kerang
lebuh nyual
42 Agih Rambai, tubu tesap, paku kubuk, upa Sagih upa lalis
lalis
43 Raup Leka jagung, nyeli, beras Seraup leka jagung
44 Genggam Ruti kulum, umpan manuk Segenggam ruti kulum
45 Kempuk Asi, tanah, tepung mulung Sekempuk asi
46 Kayu Rumah panjai, kain Sekayu rumah panjai
47 Engkawan Atap mulung, atap apung, atap daun Sengkawan atap
48 Gigi Tangga Segigi tangga
49 Tangkal Tangga Setangkal tangga
50 Dijir Gelas, changkir, mensia Sedijir gelas
51 Baris Getah, lada, utai tanam bebaris Sebaris getah kawin
52 Belah Umai, temuda, jerami Sebelah temuda
53 Bengkah Menua, endur, pengawa Sebengkah menua
54 Takang Pantu, mulung,buah sibau, mutan, Setakang buah sibau
mujau
55 Lesit Nyeli, kuachi Selesit nyeli
56 Gupung Buah uchung, empaung, lensat, semua Segupung buah lensat
buah ke begupung
57 Buku Sabun, ruti paun Sebuku sabun mandi
58 Genteran Leka main, karang Segenteran renung
semain
59 Lipat Pemayuh mensia, utai Dua kali lipat
60 Riris Pengawa bumai baka nebas, nebang, Seriris tebas
nugal, mantun, ngetau
61 Tugung Panduk, pasir, tanah, batu bata, kayu Setugung panduk
batang
62 Daun Pintu Sedaun pintu
63 Serak Tanchut, baju, peturun Seserak tanchut
64 Titik Ai mata, ujan, tuduh, ubat ke berai Setitik ubat pedis mata
65 Kampit Beras Sekampit beras
66 Utas Pukat Seutas pukat
67 Papan Berechun, telu Sepapan berechun
68 Panggun Telu Sepanggun telu manuk
69 Penaik Buka tauka pemesai rumah Sepenaik rumah
70 Chebik Daun,keretas Sechebik daun sirih
71 Repik Kayu, papan Serepik kayu api
72 Kuntum Bungai Sekuntum bungai raya
73 Lumpar Kayu, karang Selumpar karang
74 Telian Sampi, renung, enggau leka main bukai Setelian sampi
75 Empian Sepenabur leka utai Seepian leka ensabi

Nyadi di baruh tu disediaka ayat chunto ti ngayanka chara kitai ngena pengenap tesa.

1. sikat
Indai mantaika sesikat pisang ti udah mansau maya makai tengah hari tadi.

2. tangkai
Mayuh endar tangkai padi suda Indai Endun ditabanka chit ngagai tisi tibang.

3. tandan
Jembu niki lalu ngetas dua tandan buah nyiur ke udah tuai.

4. pating
Endu Suzy ngujakka sepating bungai ba pasu ke mit di atas mija nya.

5. singkap
Indai pedis amat ati laban tiga singkap pinggai lama kami pechah diindik mayau.

6. lambar
Ini ngasuh aku nyembui dua lambar kain kanggan iya ti baru dibasu.
7. bentuk
Endu Remunai ngena sebentuk tinchin emas burak maya ti ngulu pengerami melah
pinang bakih iya.

8. batang
Bala kami nan bubu ba sebatang anak sungai ti enda jauh ari rumah sida Wat
Medan.

9. pasang
Apai meli ke aku sepasang kasut dikena aku bemain bol.

10. bilah
Aki benung ngansah sebilah ilang ba pelabuh rumah kami.

11. mata
Aya Apai Mangam nan empat mata panjuk ba menasan jalai jelu ba temuda sida.

12. rawan
Laban ke tegar nyanggit, dia deh Agum udah tetembuka tiga rawan jala dalam
kandang empat bulan tu.

13. buah
Tiga buah rumah panjai di pelilih menua nya udah bulih projek dikena nampung
kuasa karan.

14. bidang
Jemba ngaga pegung ikan keli ba sebidang tanah ti enda jauh ari rumah sida iya.

15. igi
Manuk indu sida Indai Dara benung meram sepuluh igi telu.

16. jeput
Rani nabakka dua tiga jeput garam ngagai asi ke benung diguring iya ba dalam kali.

17. dampah
Iya tak berasai sinu meda sedampah mua nembiak ti diayanka ba berita televisyen
nya.

18. lebuan
Orang dagang ba pasar tamu nya nyual dua lebuan setawak ti digaga iya empu.

19. limpir
Pengajar Gera nganu Igat Kumbung laban mayuh endar limpir bup tulis iya udah
charik.
20. lungkit
Ibu nyirap empat lima lungkit buah rian mata lalu mela iya ke lauk.

21. leka
Aki minta dua leka ubat angin laban iya pedis perut.

22. tusuk
Apai nyandik dua tusuk ikan ti ulih sida nubai ba Sungai Pituh.

23. puchuk
Ngelambung nerima sepuchuk surat ti dikirumka bakih iya ari Brunei.

24. pun
Lada sida Jampung bisi lebih dua ribu pun.

25. ruas
Kami duai apai ngelulun dua puluh lima ruas asi pulut rambau gawai tu tadi.

26. luntang
Ini naruh dua luntang techal engkabang nya dalam emperung.

27. gulung
Maya ti ngalu ke pasar kemari, iya meli segulung tikai getah.

28. gelung
Aki tulihka lima gelung rutan maya iya begiga ke dalam kampung ari ili rumah kami.

29. ringka
Seringka antu pala dipelangkau ke sida aki ba semak pendam udah bekau kami
serumah ti masuk pengarap Kristian.

30. raban
Lebih sepuluh raban soldadu pengelikun begempuru ba pengawa latih ti diatur Opis
Menteri Pengelikun nya.

31. lumpung
Beribu-ribu lumpung mulung dilantin lalu diirit nengah sungai nya.

32. kerat
Dua tiga kerat ikan semah dalam belanga nya udah diempa mayau.

33. lampang
Pemerat selampang dagin ti dibeli indai nya nyau bulih dua kilo pemerat.

34. lapis
Menyadi aku enggai enda tiduk ba tilam dua lapis laban iya ke besai sereta gemu.
35. kelapis
Apai seduai indai tulihka lima kelapis getah genap kali seduai nurun mutung.

36. perugan
Ba belakang rumah kami bisi tiga perugan buluh betung.

37. ginchil
Dumang meri Racha tiga ginchil buah maram.

38. sirap
Indai nabakka lima sirap lia ngagai sup tulang babi ti dipanduk iya.

39. tuku
Aku diasuh indai meli setuku belachan ba kedai seberai rumah kami.

40. beluku
Kelinah mansutka lima beluku getah ti disimpan iya dalam raga sandik.

41. tumpuk
Lata meli dua tumpuk buah mangga ti dijual ba punggang pasar Spaoh.

42. agih
Ini ngasuh aku meli seagih sirih lebuh aku enggau indai ngalu ke pasar.

43. raup
Nyau bulih seraup mukut beras ini tebubuh ari raga sandik iya.

44. gemggam
Abing meri bala nembiak nya segenggam ruti kulum.

45. kempuk
Seli megai sekempuk tanah liat lalu nikau uduk sida iya.

46. kayu
Indai Awau meli sekayu kain ti bechura mirah dikena iya ngaga tirai bilik sida.

47. engkawan
Gending udah nyendiaka lebih tiga puluh engkawan atap dikena iya ngatap langkau
umai sida.

48. gigi
Tangga sadau rumah kami bisi sebelas gigi.

49. tangkal
Bisi tiga tangkal tangga langkau kebun sida Indai Dom udah rarah.
50. dijir
Aka aku mantaika sedijir gelas dikena meri bala temuai nya ngirup.

51. baris
Sebaris lada sida Ugap layu laban pandang api ti nyerarai ngagai kebun iya.

52. belah
Aki magi indai tiga belah tanah kebun laban nya endang ungkup iya.

53. bengkah
Bala pengajar di sekula nangkup mayuh bengkah pengawa bukai kelimpah ari ti
ngajar.

54. takang
“ Empat lima takang pantu umbas dikena ngaga bila sigi raga sandik,” ku Indai Nani.

55. lesit
Nati nyuaka lapan lesit kuachi ngagai anak iya.

56. gupung
Aku mincing segupung buah lensat maya pulai ngembuah.

57. buku
Natasha meli sebuku sabun basu ba kedai Ah Kuup.

58. genteran
Lemambang nya nyadaka segenteran renung semain.

59. lipat
Rega barang ba kedai nyin endang sekali lipat jauh lebih mar ari rega barang ba
kedai tu.

60. riris
Bala sida ke beduruk bedau ngetu merarau laban riris ketau agi mekang-mekang.

61. tugung
Apai nyelup dua tugung panduk ti disediaka iya ba tengah umai.

62. daun
Belakang bujang berani nya nyau baka ke mesai sedaun pintu.

63. serak
Angkai dianu indai laban iya masukka baju nyau dua serak.

64. titik
Jali tekenyit ditinggang setitik ai ujan maya iya duduk di pala tangga rumah sida.
65. kampit
Rega sekampit beras sepemerat sepuluh kilo nyau bisi manggai RM45.00.

66. utas
Apai aku meli lima utas pukat jarang dikena iya ngulihka buntal di Batang Saribas.

67. papan
Adi aku meli sepapan berechun lalu diselup iya di tengah laman rumah kami.

68. panggun
Rega sepanggun telu diatu nyau udah niki ari rega selama.

69. penaik
Buka rumah ti digaga Pengajar Juti nya bulih tiga penaik.

70. chebik
Aki Jabat nabakka lima chebik sirih ba piring ti benung disediaka sida.

71. repik
Aku ngumpul serepik papan tebelian dikena ngeluit pintu ti lekat nya.

72. kuntum
Jawai seduai Sharon rindu amat meda sekuntum bungai ros ti benung ngerembai
nya.

73. lumpar
Pengajar Lipa ngasuh Majang macha selumpar karang ari bup teks nya.

74. telian
Pengajar Harry diasuh bala mayuh nyadaka setelian renung semain maya
pengerami malam nya.

75. empian
Ibu Abik ngulihka seempian leka ensabi lalu naburka ba sebelah dandang umai
sida.

Disediaka:
Pengajar Nelson Bangga
SK Issu Bangat, Betong.

Pengajar Satia Gerik

SK St Bartholomew, Betong.