Darma wacana

Om swastyastu
Sedurung titiang matur-atur amatra, pinih riin ngaturang suksma majeng ring pengater
acara, para panureksa para atiti miwah ida dane sane dahat kusumayang titiang pinih ajeg
lugrahyang titiang ngaturang puja pangastuti majeng ring ida Sang Hyang Parama Kawi,
santukan mawit saking wara nugraha Ida, ring galah sane becik puniki, titiang presida mesadu
ajeng ring ida dane sareng sami, ring sajeroning pacentokan Dharma Wacane tingkat remaja,
sane kalaksanayang olih WHDI, Kabupaten Buleleng.
Titiang pemilet no. und: 4
Inggih makajatinyane numadi dados manusa kabawos dahat utame pisan, santukan
wantah imanusa prasida ngruwat laksanane sane kabawos iwang antuk sane kabawos patut.
Wantah imanusa sane kabawos maduwe tri pramana, inggih punika: sabda,bayu,idep. Sane
nabdabang kauripan ring jagate piniki, duaning idepe punika sane kasengguh kusir, sane nuntun
ring sajeroning ngemargiang kahuripane puniki, napike nyujur genah sane becik utawi nyujur
genahe sane kabawos kawon. Sane ngawinang ngamangihin kasubagian utawi muponin
kasengsaran.
Punika awinanya lakasanane becik patut utsahayang mangda prasida muponin
karahajengan miwah kasubagian.
Inggih, mungguing Dharma Wacana sane aturang titiang mangkin mamurda “Wanita
Mulia Istana Dewata“ Kruna wanita mawit saking basa sansekerta,linggan ipun wan,sane
mateges kehormatan utawi kebaktinin, polih sufik hita sane teges nyane mulia utawi utama.
Dados nyane wanita teges nyane: jadma sane kabaktinin mawit saking kautaman nyane. Ring
sejeroning susatra Hindune kabawosang, wanita utawi anak istri punika wantah lambang
kautamaan, kekukuhan lan kawisesan. Wanita utawi anak istri punika taler kaanggen lambang
Dewi saraswati sane maraga Hyang ning Pangeweruh, sane taler kaanggen dampati Ida Hyang
Brahma sane ngutpati jagate make miwah daging nyane sami.
Mungguing kautaman istri punika taler kasuratang ring pustaka suci Manawa Dharma
Sastra bab.9.sloka.5. sekadi ring sor punika:
Suksme bhopi parasangge nhyah strio raksya wisce satah,
Awayorthi kulayoh cokamawahe yure raksita.
Sane artos ipun:
Sang maraga istri patut kakemit saking baye miwah saking jadma sane corah, yening nenten
kakemit janten pacang katibenin baya miwah kasangsaran.
Inggian ring dije kapo anak istri punika nenten kabaktinin janten kasengsaran sane
pacang ka puponin. Sapunapika taler dija kapo anak istri punika kabaktinin janten kasubagiane
pacang kapanggihin.
 Pratiwimban nyane ring sajeroning itihasa Ramayana, Ida Dewi Sita sane dados jalaran
yudane agung, duaning ida nenten kautamayang olih sang Rahwana.
Malih ring sajeroning Mahabharata, duaning Ida Dewi Drupadi kanistayang olih para
korawane, punika jalaran,yudane rames pisan.
Sakewanten, Ida Dewi Anasuya, sane kabaosang manut kitab Brahmana Purana Ida
maraga utama teleb ngelarang tapa,yoga,miwah samadi, tur sida mapikolih ,ida raris
kautamayang kaanggen dampati olih Ida Hyang Siwa.
Manut sekadi daging itihasa sane aturang titiang iwawu, sang maraga istri patut tangseh
mautsaha napike kantun maraga anom, napike sampun marabian, utawi sampun meraga sapian
utawi balu, patut prasida ngemban raga, mangehang tur ngelimbakang ring sajeroning malaksane
becik, manut daging pawarah sastra agama druwene, mawastu raris praside dados istri utama
sane luih tur kasumbung olih sametone sami.
Yening sampun praside kadi punika, anak istri punika kabawos sawawa ring : Mutiara
Himalaya purin para Dewata. Ring pakibeh jagate kadi mangkin , pare istri nenten wantah ring
jero ngemban keluarga, sakewenten akeh sampun para istri sane nincapang amongan nyane,
minakadi prasida dados pamucuk utawi pangemban jagat, miwah sane liayan, sampun prasida
nyamenin amongan pakaryan anak lanang
Mungguing Swadharman anak istri manut pustaka stri sasana kabawosang wenten kalih
pawos.
Inggih punika:
1. Masa Brahmacari : patut tangseh malajah, ngalimbakang pangeweruh
2. Masa Grahasta : ngenaggehang patibrata, ngetangang kulewarga.
Manut pustaka manawa Dharma sastra bab.9.sloka.28. maosang kadi puniki:
Apatyam Dharma karyanin susrusa rati rutama.
Darahinastatha swargah pitri manat manascahya
Sane artos ipun:
1.wantah anak istri sane prasida ngembasang preti sentana.
2.wantah ibiyang sane maira lan ngupapira antuk olas asih.
3. sang maraga istri utawi rabi patut pati brata, subakti ring sang lanang
4. sangkaning anak istri sane ngawinang kulawarga punika kaucap becik utawi kawon.
5. wantah anak istri sana nabdabang sarana upacara agama kasarengin olih sang lanang
Punika awinannya sang maraga istri patut setate eling ring sajeroning malaksane,
mangda nginuin pidabdab utawi tata titi sane kawarahang olih sastra agama druwene, mawastu
raris prasida nabdabang kulawarga sane sutrepti lan subagia tur degdeg laduh.
 Inggih sakadi punika Dharma Wacana sane prasisa aturang titiang maka kirang langkung
ipun titiang ngelungsur banget pangampura.
Sineb titiang antuk uncarang parama shanti
Om, santih,santih,santih,om