1

San Seng Ai Ramma

(Mahte 5:8; I Petre 1:15)
San seng ai ngu ai gaw, lama ma hte gayau mat ai (sh) aka mat ai lam n nga ai (sh) awu
asin re ai lam n nga ai (sh) jet jet re ai hpe tsun ai re.Chyum Laika hta san seng ai ngu ai hpe
chyoi pra ai ngu ai lam hte shingdaw nna tsun shaga ai hpe mu lu ga ai. Dai hpe arawn alai
shingni rai nga ai mara n lu ai, chyoi pra hkra shakut asak hkrung ai ngu ai ( II Kor 7:1) shadawn
gyitna hte madi madun nna tsun shaga ai re. Karai masa lachyum madung gaw, masha (sh) arung
arai gaw yu maya lam ni kaw na lak san ginhka nna Karai Kasang a man hta ap nawng da ai hpe
tsun ai lam rai nga ai.
(A) K.K a matu ginhka da ai masa lam: Karai Kasang gaw yubak mara n lu ai, arawng alai hta
ra rawng ai lam n nga hkra hkum tsup ai majaw, chyoi pra san seng ai wa re. Masha langai chyoi
pra san seng na matu, makam masham hte seng ai tara hku, jasan jaseng shangun ai lam gaw,
Karai Kasang a man hta san seng hkra nga ra ai hpe madun ai lam re (Jaw jau 11; 19:11-13).
Karai Kasang laban nhtoi hte kaga makam masham hte seng ai nhtoi ni hpe shachyoi shapra
shangun ai gaw, kaga nhtoi ni hte n bung ai hku ginhka nna, manu shadan shangun ai lam re
(Pru. 31:15; Jaw. Jau 23:4,21,24). Israela myu ni hpe chyoi pra san seng ai ngu tsun ai shaloi
mung, Karai Kasang hte seng ai, kaga makam masham kam sham ai makau grup yin masha ni a
arawn alai shingni n hkan ai sha, Karai Kasang sharawng awng ai hku madat mara asak hkrung
ai lam hpe tsun ai lam re ngu mu mada lu ai (Pru 19:6;Tara.j 7:6).
Ga shaka dingsa hta Hkinjawng ni gaw yu maya mungkan masha ni hte n bung ai hku, lak san
Karai Kasang a man hta ap nawng da nna Karai Kasang a matu daw jau ai ni hpe, san seng chyoi
pra ai ngu tsun ai rai nga ai (J.J 21:6-8). Nawku htung shadik ai hku galaw ai san seng chyoi pra
lam (Pru 29:1f) , arawn alai san seng chyoi pra ding hpring lam (Pru 19:2; Sh.K 15:1ff; Esaia
57:15) hte n kaja ai lam baw sumhpa hpe koi gam ai ( I Hte 5:23) lam ni hpe kapyawn nna chyoi
pra san seng ai ngu masat ai re.
(B) Arawn alai san seng ai masa lam: Arawn alai san seng ai ngu ai gaw, yu maya re ai lam hta
grau hkrak ai, grau hkum tsup ai ngu ai hpe tsun ai re. Ga shaka dingsa prat na Myihtoi ni gaw,
nawku htung shadik ai hku nna san seng chyoi pra shakut ai hta, shani shagu Karai a man hta
arawn alai kaja hte asak hkrung ai lam hpe she grau san seng chyoi pra lam re ngu madung dat
tsun sharin ma ai (Esaia 58:13-14; Amos 2:7). Hkungga jaw ai wa tinang a asak hkrung lam san
seng ra ai. Dai hpe "Tinang hkum hpe kashin kau mu; tinang dai jasan jaseng mu; nanhte a n
hkru ai amu he, nye a man kaw na yeng seng kau mu; n shawp ai arawn alai kau da mu. Kaja ai
amu galaw na sharin la mu; ding hpring ai hpe hkan shachyut mu; nni nkri hkrum ai ni hpe
karum mu; chyahkrai ma ni a matu teng man ai hku jeyang mu; gai da gaina ni hpe tau mu ( Esia
1:11-17)" ngu sharin da nga ai.. Ga sha ka ningnan hta mung, san seng chyoi pra ai Karai Kasang
a shingni maka ni hpe kam sham ai ni a asak hkrung lam hta myit masa arawn alai hku shadan
shadawng nga ra ai lam tsun sharin da nga ai ( Mk 6:20; Eph. 1:4; 5:27; I Thes 4:7; Titu 1:8; Heb
12:10,14). Dai gaw, Chyoi pra ai Wenyi a chyeju hte, myit masin kata kaw nna nan galai shai
nna, tinang a tigyeng ni hpe n dang kau let, Karai Kasang sharawng awng ai hku asak hkrung ai
lam hpe tsun ai rai nga ai (I kor 7:14; Rom 15:16; II Htesa 2:13; I Pet 1:2; Korlo 1:10).
(C) Yesu a marang e chyu sha lu la mai ai: Shinggyim masha gaw, Karai Kasng a man hta san
seng chyoi pra lam hpe tinang hkrai shakut nna n lu la mai ai. Shinggyim masha yawng gaw
yubak galaw ai ni re majaw, Karai Kasang a arawng sadang hpe dumhprut kauai re. Rai tim,
jahpu n ya ai sha, Karai Kasang a chyeju hte, Yesu Hkristu a htingrai htingrat ya ai a gawp e sha,
ding hpring ai lam bai lu la ai re ( Rom 3:23-24). Dai majaw "Nanhte gaw anhte a Madu Yesu
Hkristu a mying ningsang hte, anhte a Karai Kasang a Wenyi e kashin kamun kau ai mung,
 2

shachyoi shapra ai mung, ding hpring ngu ai mung, hkam la manit dai (I Kor 6:11)" ngu nna
Yesu Hkristu a marang e chyu sha san seng ai wa tai wa lu ai lam, tsun sharin da ai re. Yesu
Hkristu hpe hkap la kam sham ai ni gaw, yubak a mayam n tai sai, Karai Kasang a ali ma ni tai
sai majaw, chyoi pra hkam na akyu lu la ai ni re (Rom 6:8-11; 19-22). Dai rai nna, Yesu hta rai
nga yang asak hkrung lam ting gaw san seng wa ai re.
(D) Karai Masa Ningmu: Chyoi pra san seng ai ngu ai gaw, Karai Kasang a matu ngu nna san
da ai (sh) Karai Kasang a amying ningsang hpung shingkang shadan jahkung nga ai masa hpe
tsun ai re (I Yawhan 1:5). Dai gaw Asak hkrung lam nnan hte magam lit nnan ngu ai tsaw ra
myit hta npawt de ai sak hkung masa hpe tsun ai re. Tsawra ai myit hte teng man ai ga tsun nga
yang Hkristu ngu ai baw hte lam shagu hta kaba rawt wa ai asak hkrung lam hpe tsun ai re (Ehp
4:15). Dai majaw san seng ai ngu ai gaw, san san ginhka da ai lam (sh) san san ginhka nna nga
pra ai hpe tsun ai n re. Karai Kasang hpe tsaw ra kam sham ai hte, tinggyeng matu sha asak
hkrung ai kaw nna, tsawra myit hte masha ni a akyu matu asak hkrung ai lam hpe tsun ai re.
Yesu Hkristu mung dai hku asak hkrung lai wa ai re. Dai she chyoi pra san seng ai ngu ai re.
Lamu tang hta Karai Kasang myit dik ai zawn ga ntsa e dik lit ga law ngu nna daw jau ai lam re.
Kaji htum ai ni hpe daw jau ai lam gaw Yesu hpe daw jau ai re (Mt 25:40). Mungkan kaw na
hprawng mat wa, makoi mat wa, yen mat wa ai lam n re. Karai Kasang a amying ningsang hta,
mungkan hpe tsaw ra myit hte daw jau ai de shanang sa wa ai asak hkrung lam hpe she san seng
ai ngu tsun ai re.
Dai rai nna, san seng ai asak hkrung lam ngu ai gaw, shingra maka ningnan hta asak
hkrung ai lam re. Yesu hpe tinang a hkye la madu hku hkap la kam sham ai lam rai n nga shi ai
aten na sak hkrung maka hte shai ai, Yesu gaw gap ya nga ai sak hkrung maka hta madat mara
gaw gap nga ai sak hkrung maka re. Yesu gaw "Myit san seng ai ni gaw a lu ma ai: kaning rai
nme law shanhte gaw K.K hpe mu lu na mara ai (Mt 5:8)" ngu nna, myit sawn/mang/hkam sha
hkam la ai myit masin san seng ra ai lam ahkyak da shadum jahprang ai re. Shinggan shingni hku
nawku htung tara sha shadik nna myit masin n san seng ai Hparishe ni, hkingjawng ni, laika ka
sara ni hpe Yesu daru ai re (Mahte 23). Masha a myit kata de nna, n kaja ai myit mang ai, num
shut hpyit na, lagu na, n hkru n hkra ai, hkalem ai, ngang ai, manawn masham ai, shatan nhkan
ai, gumrawng ai hte angawk angak re ai myit, pru wa ai. Dai n hkru ai lam nlang hte gaw kata de
nna pru wa ai rai nna, masha hpe awu asin di kau wu ai re (Marku 7:21-23). Myit san seng na
matu (1) Myit mang/sawn ai lam ahkyak ai hpe ayan dum ra ai. (2) Tinang hkum galoi mung san
jep yu nga ra ai (3) tinang hkawm sa asak hkrung ai makau grup yin hpe sadi maja ra ai. (4) san
seng ai myit masin lu la mayu ai myit rawng ra ai (5) Chyoi pra ai Wenyi a bau sin makawp
maga lam lu la na matu ayan akyu hpyi ra ai (6) Kaji htum ai ni dau jau ra ai (7) mungkan ngwi
pyaw simsa na matu daw jau ra ai.
Dai majaw san seng ai ngu ai lam gaw myit masin kaw nna, npawt de nna tatut asak
hkrung lam hta mai kaja ai arawn alai hte kaji htum ai ni hpe daw jau ai, mungkan hpe Karai a
amying ningsang hte dau jau ai asak hkrung lam hpe tsun ai rai nga ai. Myit masin hpe Yesu
Hkristu magra jum up hkang da ai hpe hkam la ai hte, de a asi mai kaja ai magam bungli
shachyen nna, Karai a hpung shingkang shadan shadawng nga ai asak hkrung ai lamhpe tsun ai
rai nga ai. To God be the glory.

Ginlen shalai ai,

Rev. Dr. Lahpai Awng Li
MIT, Insein. 24 January 2016.