PARLAMENTO

NACIONAL
Secretariado da Bancada Parlamentar de FRETILIN


KOMUNIKADU DE IMPRENSA

Díli, 12 outubru 2018

FRETILIN ALERTA BA PÚBLIKU KONA-BA TENTATIVA ATU DIFIKULTA

INKÉRITU PARLAMENTÁR

Inkéritu parlamentár ba ajudikasaun projetu infrastrutura sira, ne'ebé ministru balu

iha VI Governu Konstitusionál halo iha fulan Jullu 2017, loron lima molok hala’o
eleisaun Parlamentár, ameasadu atu la realiza tanba iha tentativa atu difikulta
prosesu harii komisaun parlamentár ne’e.

“Inkéritu parlamentár ida ne’e importante tebetebes tanba liga ho osan Estadu nian,
ho prosedimentu legál. Antes ita halo pagamentu ba projetu sira ne’e, ita tenke
verifika uluk legalidade tomak iha prosesu adjudikasaun sira ne’e. Ami la
kompriende, tansá iha fali tentativa atu taka dalan ba inkéritu parlamentár ida ne’e,
ne’ebé sei buka atu hatuur desizaun hotu-hotu iha lei nia okos,” Vise-Prezidente
Bankada FRETILIN, Reprezentante Francisco Miranda Branco esplika.

Tuir Reprezentante Francisco Branco, tentativa ne’e mai duni husi meza parlamentu
nian. “Bankada FRETILIN preokupa tebetebes tanba até agora, meza seidauk halo
ninia knaar loloos atu asegura estabelesimentu ba komisaun parlamentár ida ne’e.
Tan ne’e ami hakarak alerta ba públiku kona-ba tentativa ida ne’e,” tenik
Reprezentante Francisco Branco.

Iha suspeisaun forte katak prosesu halo ajudikasaun ba projetu 142 ho valór
$345.671.344.61 ba kompañia lubuk ida la tuir prosedimentu legál
aprovizionamentu no akizisaun beins no servisus.

Diretór Sekretariadu Grandes Projetos (SGP) rasik, Sr. Crispim Fernandes, iha nia
karta ba Ministru Planeamentu ho Investimentu Estratéjiku, 3/8/2017, informa katak
projetu sira ne’e “tama kategoria projetu foun no seidauk tama faze planeamentu,
orsamentasaun, no mós seidauk hetan aprovasaun husi Parlamentu Nasionál (PN)
no promulgasaun husi Prezidente da Repúblika.” Sr. Crispim Fernandes rekomenda

fb.me/FRETILINPN Pájina 1 husi 2

tan katak tuir Lei Fundu Infrastrturua ho Lei Jestaun Finanseira ho Orsamentu,
projetu sira ne’e seidauk bele hetan kontratu.

Bankada FRETILIN mós nota katak adjudikasaun ba projetu 142 ne’e inklui medida
oioin ministru sira ne’e foti atu evita intervensaun husi Kámara de Kontas tuir
Segunda Alterasaun ba Lei no. 13/2009 kona-ba Orsamentu ho Jestaun Finanseira,
ne’ebé vigora dezde dia 23 jullu 2013.

“Segunda alterasaun ba lei no. 13/2009 aumenta tan artigu ida hodi hatete katak
kontratu hotu-hotu ne’ebé boot liu $5 miloins tenke sujeita ba jurisdisaun Kámara
de Kontas nian. Maibé iha indikasaun katak ajénsia governu nian hanesan ADN fahe
fali projetu boot sira, ne’ebé ho valór liu $5 miloins atu hatún ninia folin, hodi nune’e
lalika hetan eskrutíniu husi Kámara de Kontas. Ida ne’e presiza hetan justifikasaun
ida di’ak,” Reprezentante Francico Branco esplika.

Irregularidade sira ne’e obriga Bankada FRETILIN, ho apoiu husi Bankada Partido
Democrático, halo rekerimentu ida hodi harii Komisaun Parlamentár ne’e iha dia 7
de Setembru. Maibé iha semana tuir mai hafoin hatama rekerimentu ne’e,
Prezidente Parlamentu deside hapara atividade Parlamentu tomak durante semana
ida. Desizaun ne’e atraza hotu prosesu oioin, inklui estabelesimentu ba komisaun
parlamentár ida ne’e.

“FRETILIN iha kompromisu boot ida ba boa governasaun no sei tane aas nafatin
interese Estadu nian. Nune’e, Bankada FRETILIN sei kontinua ho esforsu hotu-hotu
atu garante kumprimentu ba ninia kompromisu ida ne’e. Inkéritu parlamentár ida
ne’e halo parte husi ami nia kompromisu ba Povu tomak, atu mantén governasaun
ida moos, di’ak, no serví duni Povu ho Estadu. Inkéritu parlamentár ne’e tenke la’o
ba oin,” Vise-Prezidente Bankada FRETILIN, Reprezentante Francisco Branco
konklui.

RAMATA.

BA INFORMASAUN LIU TAN FAVÓR KONTAKTA ALEX TILMAN: 7782 4338 (WA) /
fretilinpn@gmail.com

fb.me/FRETILINPN Pájina 2 husi 2