stau carceratu inthra ste quatthru mura, int'anni aggiu scuntati de galera

ci m'ha nfamatu se diverte fore, a spassu cu li figghi e la mugghiere

me sentu comu se stau n'sepultura, comu nu surge inthra le tagghiola

aggiu cuntate le ure a una a una, e nutte e giurnu cu la ucca mara

lu core miu suffrendu se addolora, nu ttroa pace e se dispera ancora

pensandu a sta spaccime de galera, ca mie me dese sta mendula mara

tie palumbieddhru ca ieni ogne sira, su sta fenescia sempre t'ha mpuggiare
cu fezzulisci ttrei sempre na mila, le pene mei le sai le puei cuntare

o palumbieddhru spetta nu bbulare, aspetta cu te dau lu mangiare

ma nu favore tie me l'ha ffare, ane alla mamma e dinni ste parole

vola palumbu beddhru vola vola, la mamma mia sta spetta e stae sula
bba ddinni cu nu stescia scunsulata, la pena mia ormai l'aggiu scuntata

palumbu torna prestu nu tardare, nu lu pensieri nu me fare stare

ca quandu terni ieu t'aggiu llassare, cu me bba lleu sta spina de lu core

cumpagni mei de cella nu chiangiti, la branda mia stae ddhrai nu la tuccati

int'anni stu curdieddhru aggiu mmulatu, bba scannu ddhra carogna e su turnatu