1

TENGMAN AI SAPE
Yawhan 8:31-32 Nanhte nye a ga hta agrin nga myit yang gaw, nye a sape teng teng nanhte tai
nga myit dai: tengman ai lam mung nanhte chye lu na marin dai rai nna, dai tengman ai gaw
nanhte hpe shalawt dat na ra ai.
Ga Hpaw: Yesu a hpang hkan ai ni yawng hpe sape ngu shamying ai re. Rai tim, Yesu dinghta
mungkan asak hkrung ai aten hta Shi a hpang hkan ai ni lachyum amyu myu, myit mada lam
amyu myu hku hkan nang ma ai. Yesu lata la ai sape 12 nan mung Yesu hpe chye na ai lam amyu
myu, lachyum htai la ai lam amyu myu, myit mada ai lam amyu myu hte hkan nang ma ai re. Ga
shadawn - Yuda Iskarut Yesu a hpang hkan ai lam gaw amyu mi rai nga ai. Yesu rim la hkrum ai
shaloi mung sape ni yawng hprawng mat ai re. Petru gaw masum lang nyet kau ai re. Dai lam ni
a majaw Yawhan 8:31-32 hta Yesu gaw tengman ai sape ngu ai kaning re ai ni hpe tsun ai, kaning
re ai chyeju lu la na ngu ai hpe matsun ga, numhtet ga tsun da ai lam rai nga ai.
1. Tengman ai makam masham nga ra ai
Marai langai ngai gaw, Yesu htawn tsun ai lam yawng jaw ai, tengman ai ngu nna hkap la
kam sham ai aten kaw nna, Yesu a sape tai hpang wa ai re. Yesu htawn tsun ai Karai kasang a
lam, Karai Kasang a tsaw ra myit, yubak mara a lam, ngarai a lam, hkye hkrang la ai lam, sum
sing mungdan a lam ni hpe chye na nna Yesu hpe tinang a hkye la madu hku hkap la kam shan ai
lam kawn hpang ai lam re. Karai Kasang a lam chye chyang ai lam hta lani hte lani grau grau
kung hpan wa ai, Karai Kasang a daru magam hpung shingkang hte mai kaja ai lam hpe shani
shagu myit masin kaw na hkam sha lu ai lam grau grau kung hpan wa ai, Karai Kasang sharawng
awng ai hku asak hkrung mayu ai lam grau grau kung hpan wa ai, Karai Kasang a hpung
shingkang a matu shani shagu ta tut asak hkrung ai lam hta grau grau kung hpan wa ai lam ni
gaw tengman ai makam masham a shingni maka ni rai nga ai.
2. Karai Kasang a mungga hta agrin nga ai.
Karai Kasang a mungga hta agrin nga ai wa gaw (1) shani shaga Karai Kasang a mungga hti nna
madat mara nga ai wa re. Shi prat hpe gaw gap ai lam yawng gaw mungga hpe madat mara ai
lam hku sha madung dat gaw gap nga ai wa gaw mungga hta grin nga ai wa re. (2) Shani shagu
Karai Kasang a mungga hpe sharin la nga ai wa re. Chyum laika hti ai hku, mungga madat ai
hku, sharin hpawng ni hku nna Karai Kasang a mungga hpe grau grau chye na hkawn hkrang
hkra shakut shaja nga ai wa gaw mungga hta grin nga ai wa re. (3) Karai Kasang a mungga hpe
shani shana myit mang ai wa re. Tinang a lai wa sai aten, ya na aten, du na ra ai aten hte seng nna
Karai a mungga hta la kap let shani shana myit mang ai wa gaw mungga hta grin nga ai wa re.
(4) Karai Kasang a sharawng awng ai lam hpe yin la let madat mara hkan sa nga ai wa gaw
mungga hta grin nga ai wa re.
3.Tengman ai sape tai na matu tengman ai lam hpe chye na hkawn hkrang manu shadan
tsaw ra ra ai.

2
Masha a sak hkrung lam a lachyum, manu, ahkaw ahkang, akyu ara ni hpe tengman ai
hku chye na ai wa she tengman ai sape tai lu ai re. Mungkan hta shinggyim masha ni masat ai
tengman lam ngu ai amyu myu nga ai re. Nkau myi mungkan hpaji hpe madung dat ma ai. Nkau
mi, mungkan arawng aya hpe madung dat ma ai. Nkau mi mungkan sut rai hpe madung dat ma ai
re. Rai tim, hpan da ai Karai a lam hte, Karai a hpan da ai yaw shada lam chye ai wa chyu sha
tenmgan lam majing hpe chyen na hkawn hkrang ai hte manu shadan tsaw ra chye ai re. Chyum
laika hti, akyu hpyi let Karai Kasang a hpung shingkang a matu shani shagu asak hkrung ai hku
nna, Karai Kasang hte tut nawng kanawn mazum nga ai wa chyu sha, sak hkrung lam a lachyum,
manu, ahkaw ahkang, akyu ara ni hpe tengman jaw ang ai hku chye na lu nna, Karai Kasang hpe
tsaw ra kungga ai, tinang hkum tingna manu shadan tsaw ra ai, hpanda ai nga yawng nga pra hpe
tsaw ra manu shadan ai wa tai wa lu ai re.
4.Tengman ai sape gaw Hkristu hta shalawt dat hkrum ai wa rai nga ai.
Dai tengman ai gaw nanhte hpe shalawt dat na ra ai ngu tsun da ai hte maren, tengman ai sape
ni gaw Yesu Hkristu a marang e lam 4 kawn lawt lu ai chye ju lu la ai re.
(a) Hkrit myit kaw na lawt lu ai: Tengman ai sape gaw mungkan ntsa hta tinang hkrai asak
hkrung nga ai n re hpe atsawm chye ai. Karai Kasang hte rau sak hkrung nga ai majaw, Karai
Kasang a hpung shingkang npu hta hkrung nga lu ai majaw mungkan hpe n hkrit sai. Tinang myi
gawgnkya ai wa, n hkum tsup ai wa rai tim, Karai a kashu kasha re majaw, Karai a yu lahku bau
maka ai chyeju hta pra nga lu ai hpe chye ai majaw hkrit myit kaw na lawt lu ai lam re. Si ai
hkaraw a shingnip hta hkawm sa wa nga ra ai aten hta rai tim, htani htana asak lu da ngut ai wa
re majaw hkrit myit kawn tawt lai lu ai wa tai nga lu ai re.
(b) Tinggyeng machyu ai kaw na lawt lu ai: Masha dingsa (sh) shingra tara hta sha machyu ai wa
gaw tinggyeng machyu ai hku asak hkrung ai re. Rai tim tengman ai sape gaw Yesu Hkristu hpe
prat ting/ prat tup a matu kam hpa manoi ai wa re majaw tinggyeng machyu nna asak n hkrung
sai sha, Yesu Hkristu hta ningnan hpan da hkrum ai masha (sh) Hkristu hta ningnan tai ai masha
hku asak hkrung ai re. Tinang a matu numbat langai n myit ai sha, Karai Kasang sharawng awng
ai lam, Karai Kasang a hpung shingkang a matu she numbat langai tawn let prat hpe lachyum
hpyan manu shadan gaw gap asak hkrung ai re.Chyoi Pra ai wenyi a up hkang lam woi matsun
madun ai lam hta prat hpe gaw gap ai wa rai nga ai.
Shinggyim masha hpe hpa manoi ai prat kaw nna lawt lu ai: Dinghta mungkan a sat lawat gaw
masha langai ngai, ah na lu ai (sh) arawng aya lu ai wa langai ngai kaw kat hpa yat hpa rai ahkaw
ahkang a matu asak hkrung ai re. Masha dingsa (sh) shingra tara hta sha naw asak hkrung ai wa
gaw dai zawn kat hpa yat hpa rai ahkaw ahkang lu tam la ai hpe arawng la ai, kabu ai re. Rai tim
tengman ai sape gaw Karai Kasang chyu sha yawng mayawng hpe dang di lu ai, Karai Kasang
shagrau shatsaw la ai chyeju chyu sha manu dan ai hpe chye na kam sham ai wa re. Dai majaw
dai wa a asak hkrung lam hta Karai a hpung shingkang hpe grau grau mu mada lu ai, makam

3
masha grau kaba jat wa lu ai, Karai Kasang a man hta grau tengman dinghpring ai hku a sak
hkrung lu ai re.
(d) Yubak mara kaw nna lawt lu ai: Tengman ai sape gaw yubak mara ngu ai hpe atsawm chye na
ai hte, yubak hpe matsat ai sha n-ga , yu bak lam hpe kau da lu ai, kabai da kau lu ai wa re.
Agung alau hpe Karai Kasang hpe kam sham ai chyeju hte dang manga lu ai sha n ga, Karai
Kasang a hpung shingkang a matu asak hkrung lu ai wa tai nga lu ai re.
Ga Hpugndim: Karai Kasang gaw shinggyim masha yawng hpe Hkristu hta shang lawt ai ni tai
nga shangun mayu ai re.Tengman ai sape tai let dai chyeju hpe tinang nan hkam sha lu ai sha nga, mungkan de gam ginlen jaw ai ni tai nga na matu kam sham ai ni hpe chyeju jaw nga ai.
Tengman ai sape tai let shanglawt chyeju hpe mungkan de gam ginlen jaw nga ga! To God Be
The Glory!

Ginlen shalai ai,

Rev. Dr. Lahpai Awng Li

MIT, Insein,
23 Oct, 2016.