Blahz: Dawtea Diktea Atea Marina
Vol. 42 Thupui : Zu dawn ding,rui lo ding,nam king kiang ding!
Blahtorial.
“Min cho tiraw?”
“Cho lo”
“I rilruin ‘cho’ i ti!”
‘Cho lo’ ti na mawlh mawlh mawlh chung khan min han
hnek hram zel a,naupan lai nun kha a hahthlakin alo va
nuam si em.Kan invel a,a hnu lawkah kan inkawm leh mai
a,kan rilru kha ava lo tha em aw!
Kan lo thang lian a,kan han tlangval chiaha fing ber
emaw kan han inti ngei a,alo ni tawp si lo.
Hmanlai kan Mizo pi leh pu te duh ber mai pakhat chu
Zawlaidi a ni maithei.Mahse tun huna zawlaidi chu sum
leh pai hi ani tih chu hrelo kan tlem ngawt ang,sum hian
thil alo va tithei tehlul em.Lei theih loh a neilo achha chu
a ni e!
Mahsela sum leh pai ai hian hlimna leh hriselna hi a
pawimawh zawk fe ani tih hretu hi kei ai hian in thahnem
fe.Suma lei theih loh hlimna leh inkawmngeihna,inpawhna
hi ngai pawimawh theuh turin a mawl a mawlin ka’n ngen
teh ang che u!
Inkhel i en a,tan lam neiloin i en tluan chhuak parh thei
lovang.Chutiang chiah chuan pawl (party) ah ‘ka neutral’
i ti anih chuan thil awihawm a nilo,a theih loh.Tunah
keimahni khua bikah Kehilat B’nei Menashe kan din a,kan
inpumkhatna tur leh kan that tlanna turin hma an la mek
ani a,hotupa lumeh sak ninawm deuhin a sawi ang
khan,rawtna tha tak kan neih chuan hotute hnenah thlen
thin ang u.
Mimal inhuatna chu a awm thei,mahse mimal inhuatna
khan hnam thatna tura hma lakna kha tibuai suh se tih hi,
kei kam tam angreng deuh hian ka’n pik liam ve puat a
nge!
Israel-a kan hnam kan inlungrual theihnan theihtawkin
hma la ho ang u tih hi tunlaia ka rilru luahtu ani e.
Tuntum ka luanlian dan key chu kar hmasa ami aiin a
khawlh zawk inti anih pawhin eng han sawi thei ka ni tlat
lo nia. ‘A politics mah mah’ in tih chuan ‘mah mahlo’ ka ti
ang!
Shabbath Shalom vek ule. – Dta.
12 e-mail : margemadot@yahoo.com
Hmaa Stanley
Dated : 2.05.2010
Nitzan mixture leh I Lawrkhawm ang.
 Moatchei Shabbath kalta khan pu David Israel-chu
Equador lama hna thawk turin a liam thla leh ta vuah vuah
mai.Thla khat lai cham tur ani a,an nu pi Rosy-i lungleng
lutuk pawh a thau bawih bawih mai.Tluang takin rawn haw
leh vat se kan tihpui hle mai.
 Pu Gershon Chongloi chuan a kid-te ho Moatchei
Shabbath vek khan Ashqelon-ah Bowling a khelhpui
a,nuam an ti hle a,patling kal ve ho pawhin nuam an ti rura
mai.Hetianga naupang kilkawitu tha tak kan nei hi a
vanneihthlak tak zet.Patling kal zingah pu Stanley-a chuan
nuam a ti ber.
 Pu LDPA Awmpawng duat em em chu a boss ngawih
ngawih pi Deby-i chuan karkhat chhung paihna hun a
pe.Awmpawng leh nawhfe duh chuan a paih hma hian a
thlawnin a lak theih a ni.
 Avior-a s/o pu Amikhai Sailo chu tunkar Ningani khan
a kum thum tlin lawm pahin a sam an tan a,khawchhe
hnuaia a lawmpuitute zawng zawng chuang lawmthu an
sawi.An sachek siam a tui viau mai a,a eitu zawng zawngin
tui an ti.Tlangval fel tak rawn ni chho mawlh teh se.
 Marin Jojo-a Mizoram zin pawh tluang takin Israel a
rawn thleng leh ta,nupui a rawn hawn kan hrelo a,kuhva lei
tur erawh a rawn hawn.
 Kiriat Arba,Kharsina-ah zaithiam pakhat a awm a,a
hming chu pu Jew-a a ni.A zaithiam zia hi tawngkama
hrilhfiah zawh rual a nilo a,ngaihthlak ve phawt a
ngai.Inneihna velah zai turin rawih theih a ni thuai dawn a,a
hire man pawh a sang em em dawnlo niin kan lo hria.
 Pu Isaak-a te chuan an fanu birth day tunkar Ninangni
zan khan lawm an tum a,mahse an lawm leh lo.Tun
Moatchei Shabbath hian lawm an tum a niawm e,kan Mazal
tov em em.
 Thu bengluT.
Zurui chungin.
JOHANNESBURG - South African pa pakhat chuan
zu phal chin let ngaa tam inchungin minibus taxi (monit
sirut) a khalh a ,a khalh satliah mai pawh a ni
lo,naupang a la phur teuh zui.A motor hi mi 16 chuan
theihna ani a,hetah hian naupang 49 lai a la phur zui.
Hepa kum 26 mi hi police KwaZulu-Natal province
a a motor an tih din chuan a lo rui nasa mai a,naupang
kum 3 atanga kum 13 inkar sikul kal tur 49 lai a motor
ah hian a lo hnawh khawm tun mai bawk ani.Amah hi
an man nghal.
A uiin seh.
LJUBLJANA - Slovenian pa pakhat chu a uiin mi a
seh hnu ah pawh a tih hlum phal loh hnuin amah an seh
hlum.
Police thupuangtu Maja Adlesic chuan hepa kum 52
mi hi a ui pathumte hian Ljubljana hmunah an seh hlum
ani ati.
Kum li kalta khan heng ui pathumte hian an kawta mi
kal lai an bei thut mai a ,na taka an hliam avangin court-
ah an in khing hrep tawh a,chutih mek lai chuan an
zinga pakhat chuan midang a seh leh avangin an
khawtlang hruaitute chuan a neitupa hnenah a ui te hi ti
boral turin thu an pe a,mahse a ni hian a tihhlum phal
loh avangin court ah a khing let a,tun kum kalta june
thla khan court chuan a ui te chu a vulh zel an lo phalsak
leh ta ani.
Tichuan hmanni khan heng ui pathumte hian an mahni
that phal lo a,hum tang tangtu chu( lawmthusawi nan?)
an seh hlum ta ani.He thil thleng hi Slovenia ram a
nghawng viau ni tur a ni,an Kneset ah pawh sawichhuah
hial ani.Opposition party lam chuan heng ui te
khuahkhirh theilotu an Agriculture minister chu bang
turin an nawr hial ani.Heng ui pathum te hi tun
thawhlehni khan kahhlum an ni.
Games vangin mo.
Italy ram Turin khuaa rawlthar kum 16 mi chuan FIFA
Soccer 2009 Playstation video game vangin a pa hrawk
a zai.
Police te sawi dan chuan,he rawlthar hian games a
khelh lai hian a pa chuan a khelh dan tur a lo hrilh zuah
zuah a, 'pet rawh,pass rawh' alo ti chhen chu a ning
ngang aniang "Keimahin ka khel ve thei" tih pahin
anchhia a lawh zui a;chutah a pa thinrim chuan a thil khelh
lai chu a off sak ta hmak mai ani.He rawlthar thirim hian
ngawi rengin chokaa chemte a va la a,lo let lehin a pa
hrawkah a zaisak ta a ni.Hetia a pa a vih zawh hian chemte
chu a silfai a, roomah a mu daih.A hnu daihah a nuin anpa
thibual nuaih a lo let reng chu hmuin ambulance a ko nghal
a,an pa hi a boral lo hlauh ani.
2 Blah hi chhiar la , finvar nan i hmanglo anih pawhin mawl phah nan hmang kher suh!
He rawlthar hi juvenile correctional facility ah dah ani a,a
thiltih ah a inchhir thu a sawi.
Video Games leh Playstation ,X-box tih velte hi
thalai tana siam ani ber a,hengte hian ngawlveina leh
thinchhiatna a thlen niin zirmi te chuan an sawi.
Chichot (meatball)ah enge tel.
New York police a detective pakhat chu a thisen ah
Marijuana an hmuh avangin police atangin an ban a
,heihi lungawi loin New York City Police chu a hna
pelet leh turin court ah a khing.Hepa hian Court
zawhna chhangin a thisena marijuana a awm chhan hi
a nupuiin a Chichot(meatballs)eitur ah tip alo telh
vang ani ati.Court hian a chhuanlam hi an pawm lo
nge a hna chu a hmu let ta chuang lo ani.
Ipte lian.
SPRINGFIELD, Massachusetts khua police te chuan
pa pakhat kekawra a thilruk lotion bur 75 lai
hnawhpuar lung an man.
Police te sawi dan chuan Springfield khua Chamil
Guadarrama kum 30 mi chu Eastfield Mall ah kalin
inhnawih lampang chi zawrhnaa an lotion zawrh lai
chu a kekawr ah a thun ta hmiah hmiah mai a ,dawr
vengtuin a rawn hmuh chuan bur 75 lai a lo thun tawh
a,a tlanchhe nghal a ,mahse a kekawr tlang a puar
nasat em avangin a tlan hleithei lo a ,an man ta tho
ani.Police motor-a an dah luh dawn pawn a kun thei lo
a,lotion bur engemawzat an phawrh hnuah chauh a lut
thei ani.
Haiti PM-in US missionary-te sawisel
Haiti Prime Minister, Jean-Max Bellerive chuan an
rama lirnghinna hmun atanga naupang 33 hruaichhuah
tum, US missionary 10 an man takte thiltih dan chu
sawiselin, naupang rukbo tum niin a puh a,
missionary-te chuan an thiltih chu a diklo a ni tih an
hre reng niin a sawi bawk.
Prime Minister chuan missionary-ten hruaichhuah an
tum naupang zinga thenkhat chu an nu leh pate pawh
an la dam a, sorkar chuan zawnchhuah sak a tum mek
a ni a ti.
Hetihlai hian missionary-te chuan thil dik lo an ti tih
an hriat loh thu an sawi thung. An thupuangtu, Laura
Silsby chuan naupangte chu Haiti thenawm ram,
Dominican Republic-a fahrah enkawlna hmuna hruai
an tum niin a sawi. Silsby chuan, 'Naupangte hruai tur
hian lehkha ziah fel tur engmah a awm lo a, a tulna
chhan pawh ka hrethiam lo a ni. Dik lo takin naupang
rukbo tumah puh an ni. Helai hmuna tanpui hna thawk
tur hian kan neih zawng zawng chan huamin kan kal a
ni' a ti. (source : vanglaini.org)
 History huang.
VAI LEN THU LEH A KAIHHNAWIHTE.
Kumpinu sipai Mizorama an rammut thu (Lushai
Expebdition) kha ‘Vailian’ tih a ni thin a.Vailen khatna leh
hnihna tih ngawi a ni thin nghe nghe.Mahse a karah
‘Expedition (rammutna)’ tenau tam tak a awm a.Chungte nen
chuan tlemte i’n thli thuak thuak teh ang u.
A hmasa berin a hming hi a dik tawk lo deuhva ‘Vai len
thu’ ti lovin ‘British sorkar len thu’ emaw ti thin tawh ila a
dik deuh zawk awm e.
Kum 1760-ah East India Company-in Chittagong an awp
tan a,Chittagong atang chuan Mizoram (Lushai Hills) an hre
tan a.European mi Mizoram dai hmasa ber chu
Mr.Rehvell,Chief Engineer of Bengal a ni a,kum 1800-ah a
kal nia sawi a ni.Cachar District chu kum 1832-ah an awp tan
a ni.
Vai len dawn lai vela Mizoram awm dan kha a tlangpui tala
sawi loh theih a ni lo.Khatih lai hun khan Mizoram hmar bial
lam zawng chu Lallula thlah-ten an luah a.Hmar thlang lamah
Manga thlah te an awm a,hmar chhak lamah Lallianvunga
thlahte an awm a,a dawtah Lalphunga thlahte,a dawt lehah
Vanhnuailiana thlahte leh Thawmvunga thlahte,a chhim lam
berah Vuta thlahte an awm a.Chhim lamah chuan khawchhak
lam deuhah Pawih lalho an awm a,a dawtah Rolura thlahte an
inzar phei a,khawthlang lam berah Lianlula thlahte an awm
a,chumi chhim lam chhim thlangah Thangluah lalho an awm
a ni.
Mizovin Cachar phai an run hmasak ber kum chu 1826 a
ni,mahse a runtu hriat a nilo.Sir,Alexander Makenzia-a ziaka
a lan dan chuan ‘Kum 1826 – 1850 inkarah chuan kum tin
run loh lai an nei lo’ tih a ni.Kum 1842-a Arakan an run leh
chumi kum veka Syhlet thingzaiho an run thu an sawi pawh
chung zing ami chu ani ve ngeiin a rinawm.
Kumpinu sorkar chuan an awp chhung ram runtu Mizo lalte
chungah phuba la turin a sipaite a tir thin a.Chutianga lal
pakhat emaw lek bei tura an rammu chu ‘Expedition’ tenau
tiin vuah mai ila a tha awm e.
Kum 1842 kuma Mizovin Arakan an run phuba la tur chuan
Arakan atangin Kumpinu sipaite an kal a,an hotu chu
Mr.Phayre a ni.Chu chu ‘Mizoram Expedition’ tenau an neih
hmasak ber a ni.Mahse Phayre chuan phuba la han tih turin
tumah hrem leh thil tihchhiat a nei lo.
Expedition tenau vawihnihna chu Sibuta tupa Lalchuailovan
kum 1844-a Syhlet Light Infantry,Capt. Blackwood-a hovin
an thawk leh a.December 1/1844-ah a chhuak a.Lalchuailova
khua chu an han hual a,an buh-te an halsak a,mahse an khua
chu an luh chhuak thei mai lova,Lalchuailova chu inpe turin
an thlem a.A tawp a tawpah chuan a nunna zuah sak an tiam
avangin a inpe (surrender) ta a.Mahse an in ngaidam nia a
inngaih laiin Blackwood-a te chuan an lo man leh ta mai si
a.Lalchuailova’n a thiamthu a sawi ngial hnu pawhin barah
an khawn duh lova,an man lui a,damchhung lungin tang turin
an ti zui leh ta nghal a.
Lalchuailova an hrem dan chu Mizo chuan an ngaithiam lo
hle mai a.Capt.Blackwood-a chu tiam ang hlen duhlo leh
rinawm lovah an puh a,an dem hle a ni.British sorkar leh
Mizo lalte indawrna ah pawh chumi tuma an rinawm lohna
chu Mizo lalten rinhleh phah nan an hmang fo nghe nghe.
3 Sawisel tur zawngmi tan chuan phunna tur a awm reng.
Lakher hovin Chittagong tlangrama Phru-ho 1847 – 48
lai vela an run thin avanga phuba la tura Lt. Hopkinson-a
ho thawk chhuak chu Expedition tenau vawi thumna a ni ve
leh a.Mahse an hlawhtling lo hle.Lakher ho chuan
Hopkinson-a te pal tur khuate chu an lo be lawk a,lo tanpui
miah lo turin an lo ti lawk vek mai a,an kal ta ngei a,ei leh
in tur nei mumal lovin kawng mumal lovah an vak vel a,an
che hlei thei lova,engmah an anglo a ni.
Chumi hnu kum 1849 November thla-ah chuan Syhlet ah
te,Tripura bialahte,Cacharahte inrun thawm a lo awm leh ta
a.Cachar bial runtu chu Sentlang lal Lalngura nia hriat a ni
a.Expedition tenau vawi lina atan Sentlang khaw bei tur
chuan Col. Lister-a hovin Syhlet Light Infantry bawk an tir
chho leh ta a,kum 1850 January ni 4 –ah Silchar atangin an
chhuak a,ni 11 an thang a,January ni 14 ni takin Sentlang
khua chu an thleng a,an bei nghal a.Sal chu an lo kawl
hnem ngiang mai a;sipai ho chuan 400 lai an chhuah a,an
khua chu an hal darh vek bawk a.Mihring erawh chu an
khawih lo a niawm e.Sal zingah chuan sipai hovin an
chhuahtir laia chhuak ve duh lo 20 emaw lai an awm
a,chungho chu Sentlang khawho thinrim chuan an that
phiar a ni an ti.
Mary Winchester an man.
Kum 1871,January ni 16 ah Kumpinu sorkar leh Mizo lal
Suakpuilala ten inremna Sa-ui an tan a.Chumi hnu lawk
chuan Cachar an run a.Lalburha hovin Monterkhal an bei
a,sipai 7 lai an that a.Thanhranga hovin Nudigram khua an
bei a,sipai 6 an kap hlum a,1 an hliam a.Hailakandi chhim
lam Alexandrapur thingpui huan leh Jhalnacherra leh Karli
cherra pawh Sailam lal Bengkhuaia khuate leh Lianlula
thlahte inkawpin an bei bawk a.Hmun dang chu an lo inring
hman a,an hlawhtling lova.Alexandrapur erawh chu zing
lamah an bei a,an hlawhtling hle.Huan Maneger Sellaro-a
hnena Mr.Winchester-a te pafa an len tuk tak a lo ni a,a
runtute chuan an va thawng thut a,Winchester-a leh kuli
engemaw zat an that nghal kau va.Tichuan Mary
Winchester leh tlanchhuak hman lo midang tam tawk tak
chu salah an hruai ta a ni.
Hemi hnu a thla leh February thlaah Cachar biala
Jhalnacherra-ah te,Manipur leh Tripura leh Syhlet bial
lamah te inrun thawm a lo awm ta zel a.Chhim lamah pawh
Lakher hovin Bohmong ho an lo run leh bawk a.Chung lo
pawh chu inrun dang tam tak a awm ni tur a
ni.Rev.Liangkhaia ziak Mizo History –ah chuan heti hian a
inziak ; ‘Kum 1854 Report ah chuan hemi kum hma lam
kum 17 chhungin Mizovin phaitual vawi 19 an run a,mi
107 an that a,mi 186 salah an hruai bo tiin a ziak a ni,” tiin.
Chutianga inrun rura pui pui chu a lo awm belhchhah zel
tak avang chuan lal pahnih khat lek nena remna siam chu a
sawt loh zia an hre ta a.Mary Winchester mantu
Bengkhuaia khua leh Monierkhal runtu Lalburha chunga
phuba la tur leh Mary Winchester leh sal dangte hruaikir
leh an ral lakte lakir leh turin Kumpinu sorkar chuan
Mizorama rammut zai an rel leh ta a.Chumi tum chuan an
inpuahchah dan a pui ta zet mai.
( He thu hi pu C.Chhuanvawra ziah laktawi a ni,a sei viau
mai a,hmunin a daih tawh silo.Remchan dan a zirin kan
chhunzawm dawn nia. - Bl.)
 Hla huang.
(‘Thlahtu bul atan ilo that hi,Pachuau theuh theuh inlo
inang lo hle mai’ tih sms avanga he hla hi rawn piang ani ti
ila a sual awm lo e.Nia,Pachuau theuh theuh hlaphuah pawh
an lo inthiam hleih khawp mai.Chal a chil inhnawm hmasa
sa an huai zawk kher lo te pawh a tih theih awm e.He hla hi
han ‘Chepa kai’ a chakawm khawp zu nia! -Bl.)
Khawnge A Awm Tak Hmana Ma-i kha!?
Ate Sela Pachuau
Hmanah ka thai chang tura ka hel,
Ka hmangaih ka Ma-i ngei kha;
Tunah run hmunah lengin hlimlaini kan chen,
Mahse Ma-i ka chan Khuanu ruat;
Tuarthiam har ka ti Bawihteeee-i pa’n.
Kan sumtual lung leh ka pheikhawk,
An chang zota em ni ka doral?
Ngenmu iangin an sur e ka tawnah.
Ka ngen che Ma-i khawngaih takin,
Bawihtei pa i kawplai hian;
Kan runin chhung sumtualah hian Reng lal ianga,
Lal ve ka chak asin Ma-i;
Khawnge a awm tak hmana Ma-i kha?
Min dem bik suh u lenrualte u,
Ka hmangaihna kawng bumboh hi;
Ka tuar zel zawk nange hmangaihna vangin,
Insum lo la ka thai Ma-i;
Tuar zel nange Bawihtee-i vang hian.
(Ma...at mishtage!)
Khaih ! khaih ! khaih!
Dam ten kum 2010 kan lo thleng leh ta a,Purim pawh
a hnai leh ta.Nitzan kan awm hnuah programme duang
lawk lovin a tla chawpin kan la hmang char char a,a ho
riau.
He ‘Chan’ khuaah hian tun Purim chu nuam deuha
hman dan tur ruahmanna siam chhin a ni a,a
ruahmantute an phur viau mai.Gush Kativ kan
awmlaia Thalai hovin Carnival an buatsaih ang deuh
khan kumin Purim-ah buatsaih ila an ti a,mipui lamin
kan phurpuia kan tawiawm ngei chu a ngaih hmel.
A hmun tur chu a hun a rawn thlen hmain kan rawn
tlangau leh a nga,a nuam leh hlimawm thei ang bera
kan hman tlan theuh theihna turin tun atang hian
hmalak mek a ni.
Tun Purim hi Nitzan kan awm hnua programme siama
kan hman hmasak berna tur anih avangin khaw
dangah hman tum lo la,mikhual a tam thei ang ber
thlen tum zawk teh khai.Hlawhtling leh felfai taka kan
hman chuan kum dangah pawh hman chhunzawm zel a
ni ang.
4 Zai ngaina mi tan chuan hla sak tur a awm reng thin.
Fiamthoos.
☻ TLANGAU SEXY!
Khaih khaih khaih!!! Naktukah a khawnawtin hnatlan
tur. A hmun Sialinu chhu hmun chhak makpazangkang
ruam kawhtebel hmun bulah chem zanglawr kengin ui chhu
me hmun sam tur a ni e!!! kal vek i tum ang u.
☻ Mitthi lumennaah a khawsak danin midang a ti
thlabar hle a ni awm e. Ruang a pawm kual a, ‘a zai lo lo ka
sehtir dawn,’ i ti e lo maw??? MARIN (aka Sachhetea).
☻ "America Got no talent a tel tur in Marina ka
nominate e!" by Laldinpuia of Dinthar,Mizoram.
(He fiamthu chimawm angreng tak hi Laldinpuia,Dinthar
venga kan nau pakhat rawn thawh a ni.Marina te nen hian
zan khat chu hepa bike hian kan in trio a,Marina hi a laiah
a thu nghe nghe.Chumi tum chuan Marina hian tlan chak a
ti deuh a niang, “Hey tlan chak suh aw,fa pathum chawm
lai nei ka nih hi,” a ti.Khata tang khan a rawn ngam riau
che anih hi Marin.He thu hi e-mail atanga a rawn thawn
anih nghe nghe hi.)
In zawhna te.
Q : Blahtor b’day hlaa pu Stanley-a’n ‘Sazu tur’ a tih
kha enge a awmzia? A chhiartu te lu a hai hle mai. –
Shalemi.
A : A awmzia lo.Hla thu kalhmang engmah a hre lo a,
kha hlaphuahah khan tel a duh ve si.Ni thum leh zan
thum a ngaihtuah hnuah ‘Sazu tur’ tih kha a rilru-ah a
rawn awm ve ringawt a,rem leh rem lovin Si-hlerh-
hlerha khan a telh ve ta mai anih kha.I zawhna ber kher
hi,i rilru a hmul tih a hriat hle mai!
Q : ‘A rei tawh law’ng e thlawithat nghah hun’ tih kha
enge a awmzia le? - Marema of K4.
A : ‘thlawithar’ tihtur a ni zawk,chhut sual palh a ni.A
phuahtu kha a tawngvai aniang!
Q : The Three Cherz pawl an indin ngam maw? The
Horrible Thauz din ve ila tu’n nge member ngah zawk
ang? - Maroa
A : Member chu in ngah zawk hrim hrim
ang.Chairman/leader/president tur pawh inchuh luih
luih tham in awm ang.
Q : NCC ho hi an va reh ta ve,an keh darh zo ta elo
maw? - Yoel Misao
A : Keh darh lo e,khaw vawh vang mai mai
mawle,khawlum deuh hunah an rawn inlar leh han
beisei teh ang.
Q : Pa Maia’n Marina hnenah doctor atanga zuin
phalna neih dan kha engtinmaw a hrilh? - Uztea (U
Zotea)
A : Doctor hnenah kal la,nitin zu um hnih ka in thin ti
la,nikhata zu um chanve in phalna lehkha alo pe mai
ang che a ti.Tih ve ilo tum ngawt a nge!