AMERICAN JINGHPAW WUNPAWNG HKALUP NINGHTAN HPUNG HPAW

HKALUP HKRINGHTAWNG LABAU RUM AI JIWOI JIWA NI A MYIT HKRUM LET SHAMYING HPANG AI
NINGHTAN HPUNG NGU AI HPE BAI JAI LANG

Amerika mungdan hta sa du shanu nga sai Jinghpaw Wunpawng Hkalup Hpung sara ni myit hkum let
hpaw ninghtan da ai Kachin Baptist Ministers Council (KBMC) gaw Karai kasang a Sasana magam grau
majen je lu na matu hte America mungdan shara shagu chyam bra du shajang nga sai Jinghpaw
Wunpawng Hkalup hpung masha ni yawng hpe grau zinlum lu na matu yaw shada let yawng shang
lawm lu mai ai Amerika du Jinghpaw Wunpawng Hkalup Hpung Ginjaw/Wuhpawng langai mi hpe hpaw
ninghtan sa wa na matu 2013 ning May shata hta Florida mungdaw e galaw ai Kachin Christian Family
Camp hta ndau (statement) shabra wa sai hte maren, dai hpe tatut hkrang shapraw sa wa lu na matu
Buga Hpung Kasa Zuhpawng Hkyen Lajang Komiti (Conference Preparation Committee) hpaw ninghtan
let Amerika mungdan shara shagu du chyam bra nga sai Jinghpaw Wunpawng Hkalup hpung sara ni,
gaw de nga sai Hkalup nawku hpung ni hte hkalup kanawn masum hpung ni yawng hpe saw shaga let,
2014 ning June Shata 21 ya shani e Kachin American Baptist Local Churches Delegate Conference hpe
Jacksonville Jinghpaw Wunpawng Hkalup Hpung a nawku htingnu hta buga hpung shawa ni a nsen hte
daw dan minute ni gun nna du sa ai Buga Hpung 8 a dat kasa ni hte Hpung sara/sarama ni hte hpawn
tingnyang up, ka matsing galaw ya ai KBMC Hpung Woi ni shang lawm let hkut hkut nai nai bawngban
nna myit yu ai hte bawngban dawdan ai hta, America mungdan kaw sa du shanu nga sai hte tinang
Jinghpaw Wunpawng myu sha ga hku nawku dawjau lu ai Karai Kasang a chyeju hpe shakawn let ndai
wuhpung hpe American Jinghpaw Wunpawng Hkalup Ninghtan Hpung, English ga hku Kachin
American Baptist Association (KABA) ngu kabu gara hte shamying la let gaw de hpang dat lu sai.
Ndai American Jinghpaw Wunpawng Hkalup Ninghtan Hpung hte Ninghtan Hpung a mu gun ni gaw,
buga hpung shagu a awm dawm ahkaw ahkang ngu ai local church autonomy hpe hkungga lara let
buga hpung ni jawm myit hkrum da sai ndai Ninghtan Hpung a amu bungli hte ningpawt ninghpang
gawda ai tara (constitution and by-law) hta jaw da ai ahkang aya hta lai nna laksan ahkaw ahkang jai
lang ai lam nnga ai Wuhpung Wuhpawng rai na.

Ndai Ninghtan Hpung a Yaw Shada ai lam ni:
1. America e hpaw hpang tawn sai American Jinghpaw Wunpawng Hkalup Hpung ni yawng
kahkyin gumdin ai hte n-gun langai sha tai wa nna sasana magam bungli ni hpe rau sha ta
gindun let grau masan sa wa hkra jawm bawngban let galaw sa wa na.
2. America mung e gaw hpang wa ai Jinghpaw Wunpawng Hkalup Hpung ni hpe anhte
Jinghpaw wunpawng sha ni hpe hkalup hpung a sasana hkinhtawng sa gat hkai jaw ai ndai
ga na Hkalup Hpung ni hkan sa ai ladat hte bung pre ai hku hpung de lu hkra karum shingtau
hkat na.
3. Ndai Ninghtan Hpung kaw nna USA mungdan kata mungdaw shagu de nga pra nga ai hpung
masha ni hpe ni nawn ai nawku hpung ni hte matut mahkai let kawan katsan zinlum sa wa
na.
4. Htingbu Hkalup Buga Hpung ni hte mung, America mung e nga ai Hkalup Hpung Ginjaw ni
rai nga ai ABC, SBC ni, kanu mungdan e nga ai KBC Ginjaw ni hte kaga Hkalup Hpung Ginjaw
ni hte mung sasana amu mgam ni hpe Ginjaw langai mi hku nna Ta Gindun Sasana
(Partnership Mission) hku matut mahkai let jawm galaw sa wa na.
5. Sasana Hkringhtawng, Jinghpaw Wunpawng Laili Laika hte Amyu ga hpe htawm hpang
kashu kasha ni hpe ginlen ya let Amyu sha bawngring lam hpe mungdan kata shinggan
yawng hte ta gindun let jawm galaw na.
6. American Jinghpaw Wunpawng Hkalup Ninghtan Hpung hta shang lawm ai buga hpung
shagu gaw, tinang a htingbu nawku hpung ni hte mung, kaga hkalup hpung ginjaw ni hte
mung matut mahkai ai sasana magam bungli ni hta ndai Ninghtan Hpung kaw nna, banhkum
dinglun ai lam n nga na.

Ndai KABA hpe woi awn sa wa na mugun ni hpe 4 ning kalang lata san la nna, 2014 2018 ning Mugun
Ladaw a matu lawu na Mugun ni hpe lata san da sai lam ndau shabra dat ga ai.
(1) Ningbaw - Rev. Dr. Gam Seng Shae
(2) Ningtau Ningbaw - Rev. Dr. Lasaw Yawba
(3) Amu Madu - Sara Saga Gumjat
(4) Ningtau Amu Madu - Rev. Dr. Hkangda Naw San Dee
(5) Kunhting - Sarama Htawshe Nu Hkawn
(6) Ningtau Kunhting - Sarama Lacham Ze Naw

Hpaji Jaw myitsu ni:
1. Rev. Dr. Labya La Seng
2. Duwa Lahtaw Zau Yaw
3. Sarama Kaba Hpauyam Mahkun
4. Rev. Sumhka Seng Nan
5. Rev. Lamung Tu Lum