SIMEIKHU KARTIN CHHUAK THINGSULTHLIAH

5 October 2013 (INRINNI) PHEK- 2

RAMSA HUMHALH Thingsulthliah sub-town ram leh dai hnai velah ramsa an rawn inlar leh zauh thin a. Kan hriat angin Tlangnuam-ah chuan dai hnai mai nilovin khawchhungah hial Hauhuk a rawn tla lut a, khaw mipui ten tunhma rilru pu lovin a venhim leh humhalh hna an thawk a, hetiang rilru kan pu hi a lawmawm tak zet a ni. Hauhuk mai nilo, ramsa dang dang pawh kan dai hnai emaw khaw chhung deuh thawah te an rawn inlar leh mai thin a, silai chelek mai lova, humhalh duhna rilru kan pu thei zel hi a lawmawm. Ramsa mai nilo, chungleng sava, luidung nungcha chenin a humhalh hna thawhna rilru hi kan put thiam zel a pawimawh a; naupang sairawkherh keng hmuh tur pawh an awm ta lo hi a lawmawm hle a ni. School hrang hrang leh YMA ten ramngaw kan humhalh a, Park te siamin nungcha te an zalen em em mai hi a lawmawm. Mitin ten ramsa leh nungcha humhalh hi tum zel ila, kan tu leh fate kan zirtir uar zel pawh a pawimawh hle a ni. PRAYER TEAM LO KAL DAWN Naktuk Pathianni hmang hian S.A. Central South Division SAY Prayer team ten Thingsulthliah Corps an rawn tlawh dawn a. SAY Rally Pandal sakna tur Playground leh khaw chhung hmun hrang hrangah tawngtaiin hun hman an tum. Zan inkhawm banah an haw leh ang. HAUVI LUNGLEN TLANG-AH Karleh Nilaini (9.10.2013) hian Thingsulthliah C.O.Bial Home League te chuan Pi Hauvi Lunglen tlang (Durtlang)-a Prayer Centre-ah Thlarau lam Ni hman an tum a, Pathianthu leh hla-a inpawlhona neiin, a tam thei ang ber tawngtaia hun hman an tum. BDO CHAWHLUI KILPUI Tlangnuam Branch YMA OB leh Senior Adviser ten ni 3/10/2013 khan BDO thar Pu Zothanmawia Khiangte kawmna an nei a; Pu C.Lalduhkima Inah inkawmna hun hi hmangin BDO leh a thiannu te hi zanriah an kilpui nghal a ni. FAINA HAPTA HMANG Tunkar ni 2 Oct 2013 kha Pu Mahatma Gandhi-a piancham a ni a, Hemi kar hi Faina Hapta-a hman thin a ni. Kan lo hriat danin ni 2/10/2013 khan Don Bosco Zirlai te Group hrang hrangah inthenin kawngdung tihfai hnatlang an nei a; Samaritan R/Run thleng an tifai. He Faina Hapta hi DBS zirtirtu ten an ho a, chawhnu herah an hna te zovin an bang chauh niin thu kan lo dawng.

TUNGE NGAIHSAN TUR - Sawmzela pu Kan khaw tlangdung zia hi mite sawi dan tam berah chuan, Tumah ngaisang bik lo, engmah ni bik lo pawhin tu dang ngaisang lova hmasawnna tur pawh ngaihtuah thiam chuang lo, tal ve mai mai khua tih a ni fo mai a. tak tak a nih chuan a lungchhiatthlak ngawt ang. Hetiang ang rilru pu kan nih chuan kan hmaa thil lo thleng pawh a chhia emaw a tha emaw lamtang atana bawh huam huam kan ching ang a, hmelma tan hneh kan sam ngawt ang. Ruihhlo tha loin min chim pawhin kan pawmzam zel ang a, Politician ten an duh thalin min bum ang a, beisei takin, engmah neih belh si lo hian kan phun ral ve mai mai ang. A titu tur leh hma latu turin kan inpuh tawn mai mai ang a, Chu chuan chhiatna leh tlakhniamna bak a thlen lo ang a, a fing var hmasa apiangin min pemsan zel ang a, a neinung deuh apiang rinhlelhna a kan khah thin dawn avangin awm rengna tlakah min ngai ngai lovang. Anih leh tunge kan ngaihsan ang? Mahni hna leh eizawnna kawnga taima leh rinawm te hi. Hetiang mite hian mi an rel mai mai hman lova, khawtlang leh chhungkaw changkan nan an hun leh ngaihtuahna tam ber an hmang fo thin. Mi tak tak, mahni thusawi hlen chhuak tura theihtawp chhuah mi, Khawtlang hmangaihna a tak taka tilang thin te hi. Chutiang kawnga kan inen chuan Kohhran mi, Politician, NGO hruaitu tam tak chu an tla mai thei, mahse tan lak thar nan hmang zel ila. Zirlai chuan zir tlat rawh se. Nu leh Pa chuan an fate hi an rohlu ber a ni tih hriain enkawl rawh se. Rawngbawltu chuan taima takin, NGO hruaitu chuan member te duh dan thlir chungin. Eng kawngah pawh kal ila, Mi Rinawm, Taima, Thil ti mai mai lo, Tawng aia a taka thawk tam te hi ngaisang ila, hetiang mi hi nih tum theuh bawk ila Khatwlang tan malsawmna a thlen ngei ang.// OXYGEN GENERATOR Bialtu MLA & Home Minister Pu R.Lalzirlianan Seling Branch YMA hnena ni 28/8/2013-a damlo Oxygen mamawhtute hman tura a pek Oxygen Generator chu kar kalta ni 24/9/2013 khan an la fel ta a, tunah hian he Oxygen Generator hi Pu Lalhuliana, Treasurer-in a kawl a, kan sub-town damlo, mamawh tan hman theih anih thu kan lo dawng. Hetih laiin Branch Committee chuan a hman Dan tur felfai tak hi Committee neiin an la rel dawn bawk a ni. SELING TUILAK PHASE-II Seling Tuilak Phase-II chu Tualbung ram Tuikhawhthla ami lak tura ruahman a ni a, tunkar chhung khan Seling VC & Tui Committee leh Worker te riakin an thawk chho a; he Tuilak PhaseII atana hnathawktu turte mi 20 vel riah theihna tur buk an sa zo a; karleh atang chuan PHED lam te Seling Tuilak Phase-II hna buaipuiin an thawk nghal thei dawn a ni. TUIRINI PRESBYTERY KARLEH-AH Karleh ni 10 13 October 2013 chhung hian Tuirini Presbytery vawi-8na chu East Phaileng Bial, Kepran Kohhran-ah neih a ni dawn a; Khawmpui Thupui Lalpain a duh a ni Luka 19:31 tih a ni ang. Tun Presbytery-ah hian Thingsulthliah Pastor Bial chhung atangin Upa nemngheh tur pahnih an awm a, chungte chu Pu Rosiamliana Hospital Veng leh Pu H.Lalhleia Seling te an ni. HOME LEAGUE SUNDAY Naktuk Pathianni hi Home League Sunday a ni a, Home League te pualin hun hman a ni ang. Hemi pual hian Thingsulthliah Corps HL te chuan Chhiahtlang a Adult Rehabilitation Centre tan Buhfai leh chawhmeh chi hrang hrang bakah Rs. 1000/- an pe. Zing Ni chhuah hun : Dar 5:12 am Tlai Ni tlak hun : Dar 5:03 pm