SIMEIKHU KARTIN CHHUAK THINGSULTHLIAH

28 September 2013 (INRINNI) PHEK- 2

KHUALLIAN PU ZIRA SAWI KHA Issue hmasa-a kan rawn tarlan tawh Thingsulthliah Sub-Town Football Tournament Final ni-a Khuallian Pu R.Lalzirliana, Home Minister-in Tst playground chung-changa a thusawi, Sorkarna an chang leh anih chuan Tst Field hi Stadium puitling-a siam anih tur thu a sawi tia kan rawn tarlan kha, Kan hriat dan leh dawnsawn dan a inang lo deuh a; Stadium ni lovin Field puitling tih zawk tur a lo ni. Engpawhnise, Tst Field hi players 9 khelhna ni lovin 11 khelhna-a siam a pawimawh ber a. Stadium pui pui anih loh pawhin Field puitling hi kan mamawh ber chu a ni. HMING SIGN LOVA Sd/- HI Lehkha hi kan dawng thin a, a hnuaiah a thawntuin hming sign lem lovin khawl chhutsain a hming chungah emaw a hming bulah Sd/- a rawn ti ringawt hi a dik lo. Ama kutziak ngeiin a sign tur a ni. Official taka lehkha thawnah phei chuan a kutziak ngeia a sign hi tih ngei ngei tur a ni. Sd/- tih ringawt hi chu miin
thu tlingah an ngai lo anih pawhin a thawntu thiam loh a ni tlat.

YMA HIAN RUIHHLO DO TAWH LO SE Lh.Sailo

Kamkeuna: YMA in theihtawpin ruihhlo a do a. Mut hun leh ei hun mumal nei lovin an chhuak awl lova. Kawng chhia leh khawchhia, karen thim leh zan thimin a tibuai pha hek lo. Sum sengin an thawk a, an tha thawh rul tur tal pawhin lawmman an beisei ngai lo. Chuti khawpa an thawk chung pawh chuan rem a hnekin a pung tual tual emaw tih tur a la ni fo; Ruihhlo tak hi chu aw! He ruihhlo pui roh hian lamtang a ngah zek. Thian siam a thiamin a thilphal phian a, a kawplawr peihin a inphal zau viau bawk a. Hmun tawp a ten lova, bawlhhlawh a thinhrik hek lo. A tlat tawhna apiangah chuan a leng halh zel a, amah pantu apiang a lo pawm zel thei leh tumah a hnar duh tlat lo mai hi a zei ru riau! Hausa leh rethei a thliar lova, hmeltha leh chhia, lian leh te a thlei chuang lo. Mimawl apiang a kawprem thiam a, rimchhia hi rimtui a ti a, mi pawlawh leh zelthel te hlei hlei hi a ngaina ru riau! Hei vang hi ni maw, a zuna uai tawh te hian thlah leh mai an ui a, zun danglam tak zawng a nei a ni phawt mai. Thil lo thleng tur: Davida hunlaia zawlnei ni mah suh ila, ruihhlo thlah zalen avanga thil lo la thleng tur puan lawk theih ka nei; heng te hi: 1) Zawng an pung ang: Ruihhlo inrawlh hmaa thiana leh thiani te kha ruihhlo a inrawlh chinah tawh chuan Zawngi/ zawnga an lo ni leh tawh ang a, kar lovah zawng an pung hluai dawn; tu nge kap ang? 2) Thlengthlawk thei a pung ang: Planet danga cheng, UFO chanchin kan sawi lo; pa rorelna inchhungah ruihhlo a inrawlh chuan thlengthlawkthei a pung dawn! A khalhtu pain a hnehsawh em a, a thlawk zit leh par par ang. 3) Mittui a pung ang: Chutia, pa berin thlengthlawkthei a thlawhtir tawh chuan chhungpuinu leh fate mangang thlabar mittui chu dan rual lohvin a lo luang zawih zawih ang a, thiante hmaa tap ngai lo fapa mit atang chuan mittui a va pung nasa dawn em! 4) Tlawmngai over an pung ang: Thlan laih a lo hun ang a. Mi dang zawng aia tlai ruihhlo thianpa chuan chingpirinu rim nam rum rumin thlan khur rawn luh a chuh tlai khawhnu ang, mawi leh mawi lo pawh sawi lovin. Ruihhlo tel lova tlawmngai thei te tai deuh ranin a tlawmngai over ang a, a tellovin tlawmngaihna hi an chhawmnung thei tih erawh a hre si lovang. 5) Nuthlawi/ pathlawi an pung ang: He thil kher chu, sawi a timawm dui mai. Mithiamte chuan, Nupa inthen chhan tam ber chu ruihhlo vang a ni, ti thin mah se, an awih duh tlat lo vang a. Intih thiam loh vang tiin an nui tut tut ang a, an harhfim hunah a nuihzatthlak lohzia an hre chhuak leh fo si ang; mahse, mite ngaihah thlawi a ni tawh tho tho! 6) Thlaraubo an pung ang: Hei zet chu, kan berampute rawih ka chak hle mai. Fing deuh deuhho khan, Baibulah pawh Isuan uaiin a tipung, chuti khati. an ti leh dawn; ni e, a tipung chiang khawp mai. Mahse, thlarau meuh a boral hunah zawng Isua hmaah ngei thiamthu sawi tur an tlachham ve teh ang chu! Khap tawh su le: Khai le, YMA-ho khan lo ngaithla ru le; nunau thlabar tur uap lum a, mi tawrawtte pawngpawrh tur tudai chunga ram leh hnam in hmangaihna au aw hi an hre duh tlat lo a nih hi; in tihthat za tam sawi aiin in rahpelh pakhat sawichhiatna ri a rin chhung chuan lo khap tawh lo mai ta che u. Khing, a chunga thil lo thleng tur kan tarlan tak te khi a lo thlen hunah meuh zawng YMA hming an la rawn lam khu leh chuk awm si a. Chumi hma zawng chu, tawrh kan inhuam tlang a ni ang e, induh ve larh khawpin ruihhlo hi lo do tawh lo mai ta che u??//

GOLDEN JUBILEE MONUMENT Tarlan tawh angin Govt. Tst High School chuan kumin Dec ni 11&12-ah Golden Jubilee an lawm dawn a, hemi atan hian Monument an siam chu tunkar khan High School tualah an phun fel ta a, karleh remchangah Jubilee Org. Comt pawh thutkhawm an tum a ni. TST SANITATION HNATLANG Vawiin inrinni hian Thingsulthliah Sanitation Committee member ten nileng hnatlang an nei dawn a, khawchhung veng hrang hrang kawng dung leh luikawr te leh kawngko fai leh failo te enin tihfai ngai te an tifai nghal zel dawn a ni. Hnatlang te hian
bawngtuthlawh leh chem thawhchhuahpui tura inhrilhin tlaiah chawhlui an kilho nghal ang.

SOCIAL AUDIT NEI DAWN Ni 100 inhlawhna kan tih mai, NREGS sum chungchangah Social Audit neih a ni dawn a; Seling-ah chuan ni 3/10/2013-ah neih a ni ang a, Tlangnuam-ah ni 4/10/2013 leh Tst-ah ni 7/10/2013-ah Social Audit hi neih a ni dawn a ni. YMA KUMPUAN DUTY
Tlangnuam Branch YMA Kumpuan te tunkar chhung khan chhun leh zanah an duty a, tunkar nilaini zan thleng khan mi 9 hnen atangin zu(a sen chi) um 9 an man. Heng zu te hi BRTF Camp atanga an lak/lei a ni hlawm a, mi 9 zinga 2 hi Tlangnuam mi an ni a, a dang 7 te chu khaw dang mite an nih thu kan lo dawng.