SIMEIKHU KARTIN CHHUAK THINGSULTHLIAH

Dt. 21 September 2013 (INRINNI) PHEK- 3

LETTER TO EDITOR (..hi Editor ngaihdan a ni vek kher lo) Ka pu, I Chanchinbu Dated 14th Sept 2013-a Letter to Editor-ah Pu Lalnuntluanga, H/A Vengsangin Thingsulthliah Group Congress Committee Lawmthu sawina chungchang tlang dang atanga a thlirna kha han sawi ve ka duh a. A thlirna tlang tehna kha a hniam em avangin a thil hmuh pawh a chiang lo hlein a lang a. Chuvangin, I chanchinbu hmanga hmuh fiahtir min phalsak ka ngen a che. Higher Seconadary School hi Congress Ministry 1993 98 laia lo chhuak a ni a. Mizoram khua lian deuh leh remchang a dah tur a ni a. Chung zingah chuan beiseiawm pawlah kan inngai ve a. Hetih lai hian Pu Zira hi MLA a la nilo. Saitual Bial hi dinna atan a beisei avangin hma lo la lawkin Saitual-a dah turin tan a la a, a hlawhtling ta reng a ni. Kum 1998-ah MNF Sorkar a lo piang a, VC-ah pawh MNF kan thlang tling a, VC te pawhin HSS kan neih theih nan theihtawp an chhuah a, MNF sorkarin min ngaihsak lova, kan bei a dawng a nih kha. Kum 2003-ah Congress VC kan nei a; anni hian NGO hrang hrang te rawtna thlen turin a ngen a. Rawtna hrang hrangah Plus-Two private-a din rawtna chu tung dingin vantlang inkhawmin lungrual takin a pass a ni. Ruahmanna fel tak a siam hnuah VC te chu dissolved an nih tak avangin Advisory Board-in a chhunzawm a, a hnu VC apiangte pawhin thahnem ngai takin vawiin thleng pawhin an la enkawl zel a ni. Khawtlang lungrualna a nih avangin kan duh ang kan la thlen lohnaah inpuhmawh kan tum a nih chuan Pu Lalnuntluanga ai hian sawi tur leh puh tur kan nei tam zawk fe ang. Naupang ngah, Result tha si engatinge Lump-Sum chauhin sorkar hmasa khan min dah? Naupang tih tham nei lo, Result nil si te Adhoc Grant-in-Aid a dah khaw eng emaw zat a neih si? Model School a min dah hi kan Bialtu hian a la duh reng. Mahse hei hi Central lam thuneihna a ni a,hemi Scheme hi Central in a titawp a, kalpui theih a ni lo. Sorkar hmasain tlin leh duhna avangin School thahnem tak a Upgrade avangin sum a indaih lo a, tunah hian khawi School mah Upgrade a la ni lo. School Upgrade an awm dawn a nih chuan kan HSS hi kan tel ve ngei ang. Private School-ah chuan Building nei tha ber kan ni ngei ang. Hei hi kan MP leh Bialtu MLA te hmalakna leh thahnemngaihna a ni. Building mai nilovin Furniture tha tak tak Computer, Water Cooler te leh a dangte khi a hmunah han kal se kan Bialtu MLA hmalakna chu a hmu ngei ang le. Hmasawnna hmuh tur a awm lo an ti tawng mai hi, he School a kal Zirlaite, Zirlai Nu leh pa leh Managing Board Committee leh V/C mai bakah MP leh Bialtu MLA te a zah lo hle niin a lang. High School kawng chu Cheng Nuai 25 hmanga siam tur a nih thu a sawi a, he thu pawh hi a ti leh thei lova a tih hi, hetiang hi thil nihphung zawk chu a ni. He Pawisa hi Central atangin Mizoramin 200 crore a hmuh tur atanga ruahman a ni, vanduaithlak takin he project sanction hi Centralin a rawn sanction theih leh tak loh avangin H/S Road hi siam theih a ni ta lo a ni. He project sanction hi Mizoram mai nilovin NE state zawng zawngin an hmu lo vek a ni. Bialtu MLA mawhpuh chi a ni love. Hetiang hi a lo nih takah chuan kan khawchhung kawng pawimawh siam nan hian MGNREGS Material Component atangin Cheng Nuai 15 min pe hi khawtlang mipuite hian lawmna chang kan hre dawn lom ni? He kawng chhiat zia hria a a siamna tura remchang chang lo pawtkhawm ta pawh nise kan kawngpui ber a that chuan kan khawtlang tan a pawina enge awm? Home Minister Bial kan nih hnua kan khawtlang hmasawnna hrang hrang te hi sawi vek sen a nilo. MNF kum 10 sorkar chhunga an tihpuitlin theih loh SIRD tihpuitlin te, Community Hall leh Bazar thar kan neih te, khawchhung hmun hrang hranga Culvert leh side-drain kan neih te, High School Road Foot-path te leh Boys & Girls Hostel sak mek te, Damdawiin quarters sak thar te, Internal Road panga(5) Black-top thar te, MLA Fund atangin Hospital Area YMA Hall leh MHIP H/A Hall sakna tur Cheng Nuai thum leh nuai li te, MP Fund atanga Cheng Nuai 10 Hospital Area YMA Hall sakna tura a dil chhuah sakna tur te, Camp Area YMA Hall sakna atana NLCPR atanga Cheng Nuai 9 leh Social Education atanga Cheng Nuai 2 a pek te, Kohhran School hmun hnih-a panna kawng te hi tu min siam sak nge? Heng bakah hian pawl hrang hrang te tana thil min tih sak zozai te hi sawi sen a nilo. Heng zozai te hi khawtlang tana hmasawnna a ni thei dawn lom ni? Phek dinglamah zawm a ni.

A LO NIH TAK CHU AN TI - MLA Inthlan a hnaih zawh poh leh khawtlang hrauitu & NGO vote leh zu zuar vote hlut lam a inang tih an kan chiang tawlh tawlh ang an ti. - Vawksa kan ei nasat ang aiin a vulh lam hi chu kan taima vak lo an ti. - YMA Gen Conference-a kal thei hi an tlem tial tial ang em an ti. -Anganwadi kal hun tura sorkar ruahman ang hian an kal lem lo an ti. - Khawchhak vawk lakluh hi a hri kan hlauh vang a ni tlangpui a, a hmunah chuan a hri lam hi an sawi bik lo an ti. - MLA candidate hnenah thil dil hi kan uar leh viau ang em an ti. - Dan inti hria nazawng hian an hre zik tluak lo an ti. ZIRTIRTU THAR Thingsulthliah Govt. M/S-II a zirtirtu turin Mary Lalrindiki chu Phulmawi M/S atangin rawn sawn a ni a, Order hi a chhuak tawh a, he thu kan buatsaih lai hian a la rawn zawm rih lo a ni. SELING PES BUILDING Seling Presbyterian English School Building sak hna chu kalpuii mek zel a ni a. Kan rawn tarlan tawh angin Seling Primary School-I Building chu cheithat mek niin a bulah Building thar Ft. 48x18 a lianin sak kal mek a ni a, a sakna tur sum hi Synod atangin Cheng Nuai 3 hmuh a ni. Tluang taka an thawh kal zel chuan kumin October thlaah sak zawh hman beisei a ni a, kumthar 2014-ah Building thar hi luah hman tura beisei a ni. KAN LAWM Tunkar chu Simeikhu kan chhutna Computer kan tichhe thut mai a, Pu K.Lalhmingsangan a Laptop min hman tir a, a chungah kan lawm hle a ni. Ed & staff.
MNF kum 10 sorkar chhung khan khawchhungah Damdawiin leh Tourist Lodge an sa a, a hnathawktute kha Aizawl mi deuh vek an ni. Tuna kan Bialtu hi chuan a khaw neitu deuh vek a thawhtir te hi ava lawmawm em. Sorkar sum kan thenawmpa ten an tel hi khawdang pa ten an tel ai chuan kan khawtlang tan a hlu zawk lom ni? Chuvangin, hmangaihtu dik leh diklo chu mi a nileng tan lo chuan hai chi a ni lova, hmangaihtuin min hmangaihna a lantir zel theih nan thil ti theiah kan siam zel dawn lom ni? Pu Editor, enge I ngaih ve dan? I rintlak, C.Sangkunga, Thingsulthliah D/A