Editor: H.

Malsawmtluanga
Ph: 9615425400 / 9436784572 sawma6970@gmail.com

Thingsulthliah Students Union

Jt. Editor: Lalromawia Ph:2370285 Correspondents: K.Khualluna : 9862217691 Lalbiaktluanga : 9612322711 Ramngaizuala : 9862386148 ramngaiahmar@gmail.com

Thingsulthliah Sub - Town Weekly Newspaper

VOL. VII

No. 35 THINGSULTHLIAH

Ni 14 September 2013

(INRINNI)

THINGSULTHLIAH SUB-TOWN FOOTBALL TOURNAMENT Tunkar ni 10/9/2013 atang khan Thingsulthliah GSA buatsaihin Tst Sub-town Football Tournament neih tan a ni a; Tournament senso hi Bialtu MLA & Home Minister-in a rawn tum sak a ni. He Tournament-ah hian Team 12 an chhuak a, Group 4-ah inthenin tunkar ningani khan Group League match khel zovin nimin zirtawpni khan Quarter Finals khelh a ni a, vawiin-ah semi-Final khelh a ni ang a, karleh thawhtan-ah 3rd place match leh Final khelh a ni ang. Final-ah hian Tournament sum donate-tu Pu R.Lalzirliana, Home Minister chu khuallian atan beisei a ni. (He Tournament Quarter-Finals-a intum tur leh Final thlenga Fixture chu phek 4-naah tarlan a ni.) SELING PREMIER LEAGUE : Tunkar ni 10/9/2013(thawhlehni) atang khan Seling GSA bultumin Seling Premier League khelh tan a ni a, Team 10 awmin an inkhel kual vek ang a, kartin match 5 zel khelin kar 9 chhung khelh a ni dawn a ni. Lawmman Champion Rs. 5000/- Runners-up Rs. 2000/- bakah Team chhuak zawng zawng hnenah Lawmman pek vek tum a ni bawk. MASTER DEGREE NEI THAR TE Kan sub-town atangin Master Degree nei thar kan nei nual mai a, tuna kan hriat theih chin chu heng a hnuaia mite hi an ni : 1. Lalhruaitluanga S/o Lalbiakthuami D/A M.Com. I 2. Thanchampuii D/o C.Lalduhzuala(L) H/A MSW II 3. Lalparliani Khiangte D/o K.Laldangliana, D/A M.A(Pol. Sc) II 4. Sicily Lalnunthari D/o R.Kaphnuna, Tlangnuam M.A.(Pol. Sc) II 5. Lalnuntluanga S/o Lalpiandenga, Seling, M.A.(Geog) II 6. Lalawmpuii D/o Zoluta, Seling, M.Lib. I 7. Teresa Lalmuanawmi D/o Robert Lalhmingliana, Seling M.A(Ling) I (Master Degree nei thar zawng zawng te Simeikhu leh Thingsulthliah Students Union(TSU) chuan a lawmpui tak meuh meuh a ni.)

LUNGNGAIH DAR RI Pu V.Lalrammawia(49) B/o V.Liandawla chu ni 8/9/2013 dar 6:30 pm khan Lungna avangin Durtlang Damdawiinah a boral a, lumenpui niin a tuk chhun dar 11:00-ah Tirhkoh A.Lalhmingsanga, Mizoram UPC-in a vui. Pu V.Lalrammawia hi a nupui nen Tuirini, Saitual kaiah an khawsa thin a, a ruang hi a unaupa Pu V.Liandawla(L) In, Tlangnuam Hmar Veng-ah lak a ni. INNEI Ni 12/9/2013 khan Zaithanmawii D/o Chawnghmingliani, H/A leh Lalrampana S/o Lalenga, Maubawk te Maubawk UPC(NEI) Biakinah an innei. Zaithanmawii hi ni 11/9/2013 khan an In Hospital Area Venglai-ah thlahna nei a ni. Ni 12/9/2013 khan Zothanmawia Khiangte(Jim tia koh/hriat lar), BDO, Thingsulthliah RD Block leh Rebeka Lalhlimpuii D/o Rev C.Sangliana, Thuampui Veng te Aizawl Venghlui Presbyterian Biakinah an innei. BIALTU MLA-IN PE Tunkar nilaini khan Bialtu MLA, Home Minister ni bawk Pu R.Lalzirliana chuan Tst ZDU Branch hnenah thingpui in no(steel) 50 a pe. Bialtu MLA hian Tlangnuam Branch YMA hnenah Drum-Set leh Rangva Bundle 4 a pe a, Tlangnuam Branch MHIP hnenah Rangva Bundle 4 a pe bawk. Thilpek dawngtute Bialtu MLA chungah an lawm hle a ni. CAREER GUIDANCE Thingsulthliah Development Committee(TDC), Aizawl ten ruahmanna an lo siam tawh angin karleh zirtawpni(20/9/2013) hian Thingsulthliah khawchhunga High School chin chunglam zirlai naupangte pualin Career Guidance neih a ni dawn a, a hmun Thingsulthliah HSS a ni ang. Hetah hian HSS naupangte bakah Tst Govt. H/S leh Radiant Hearts School(H/S Section) te an tel dawn a ni. He thu kan buatsaih laia kan lo hriat danin TDC, Aizawl atanga lokal turte hi Dr. Lalchhuanawma Tochhawng, Er. R.Lalrammawia leh Er. PC Lallianthanga te an ni.

FAINA THUZIAK TAR

Thingsulthliah Students Union(TSU) chuan MLA Fund Cheng Sing thum an hmuh hmangin tunkar thawhlehni khan Faina lam hawi thuziak an siam chu khawchhung hmun hrang hrang hmun rukah an tar. Thuziak(Hoarding) an tarnna hi Diakkawn-ah hmun thum, Hospital Veng-ah hmun hnih leh Camp Area-ah hmun khat a ni. Thuziak tar hi zan lamah pawh Electric eng ringa chhiar theih turin siam a ni a, hemi kawngah hian Tst P&E Dept ten an lo tanpui avangin an chungah lawmthu an sawi a, tin, mimal heng Pu MS Dawngkima D/A Pu R.Zakamlova H/A leh Pu R.Lalngilneia D/A ten a tul anga an lo tanpui avangin an chungah pawh TSU chuan lawmthu a sawi a ni. Heng Thuziak tar te hi mipui ten dimdawi taka enkawl sak turin TSU chuan mitin te a ngen nghal bawk a ni.

SELING PES HMUN TUR

Seling Govt. P/S-I hmun chu Seling Presbyterian English School atan tih a ni a, tunkar thawhtan ni 9/9/2013 khan cheithat a ni. He School thlangah hian Building thar 48x18 ft-a zau sak hna tan mek a ni bawk. School cheithat leh sak nan hian Synod atangin Cheng Nuai 3 hmuh a ni a, kumthar lamah School thar hi luah hman tura ruahman a ni.