SIMEIKHU KARTIN CHHUAK THINGSULTHLIAH

31 Aug 2013 (INRINNI) PHEK- 2

SIMEIKHU HI A tam zawk chuan kan hre tawh nain, han sawi nawn leh te pawh tul chang a awm thin a. Kartin ningani-ah chanchinbu hi kan chhu thin a, zirtawp zingah Aizawl-ah email bakah pendrive-in kan thawn thla a, tlai Sumo-ah Simeikhu hi phurh haw a ni thin. Sumo-a min phurh sak thin tute chungah
lawmthu pawh kan sawi thar leh nise.

Teachers Day pualin. Dr. S. RADHAKRISHNAN CHANCHIN Dr. S.Radhakrishnan hi zirtirtu ropui, mite rawngbawltu rinawm, mifing, India palai rinawm, mithiam hmingthang leh mihringte chunga hmangaihna lantir thintu leh ang khata mite en thintu a ni. Thusawi thiam hmingthang a ni a, amah anga khawvel changkanna tura inhmang zo hi an tam lo viau awm e. Philosopher ropui a nihna hian Politics lama a ropuina hi a hliah zawk mah mah a ni. Chhungkaw rethei tak atangin kum 1888 September ni 5 khan Tamil Nadu-ah a lo piang a. Madras University-ah kum 1909 khan M.A. a zawh hnuin Oxford University-ah kum 1936 khan M.A. a zo nawn leh a ni. Lehkhabu ziaktu ropui a ni bawk a, The Philosopher of Rabindranath Tagore tih te, Indian Philosophy tih te, Liberty of Philosophy tih te leh lehkhabu dang tam tak a ziak bawk a ni. Kum 1926 khan Culcutta University aiawhin Cambridge-ah leh Havard University-ah a kal a. Heng University-ah te hian thu a sawi hlawm a, chunga a thusawi avang te chuan England-ah leh Americaah te a lo lar ta em em mai a. England-ah phei chuan Christian Biakin-ah thusawi turin heng Oxford, Manchester, Liverpool leh Birmingham-ah te hian an sawm hial a ni. Christian ni silo, Christian Biakin-a thusawi hmasa ber a lo ni. Kum 1949 khan Pu Nehru hun laiin Moscow-a Ambassador ni tura thlan a ni a. Russia mite chuan an lo ngaisangin khatih lai khan India leh Russia inlaichinna pawh a tih tha a, khawvel hnena India hming tithatu leh ti zahawmtu a ni. Nihna hrang hrang sawi sen loh a chelh thin a. Kum 1952-ah India Vice President niin a hna tlin takin a thawk a, Rajya Sabha member te chuan an zah em em a ni. Kum 1957-ah Vice President atan thlan nawn leh a ni a, 1962-ah India President atan thlan a lo ni leh zel a ni. President a nih hnua a thil tih langsar hmasa ber chu, a thla khat hlawh tur Rs. 10000/- chu Rs. 1900/-ah a tihniam a ni. Tin, a duh apiangin phalna la hmasa kher lovin amah hmuh theihna hun thla khatah vawi hnih a siam sak bawk a ni. Chawimawina sang tam tak a dawng a. Pu Nehru-a chuan, Zirtirtu ropui ber tiin a vuah a, Bertrand Russel chuan, Hun khirh laia remhre chungchuang, India chawimawitu tiin a ko ve thung a ni. Hetiang taka miropui, India leh khawvel tana mi tangkai ni bawk hi kum 1975 khan lung lam that lohna avangin a lo boral a, a uihawm tak meuh meuh a ni. A pianni hi kum 1962 atang khan Teachers Day atan hman a lo ni ta a ni. SUMO A THILBO HI - Fel Fela pu Sumo-a thilbo han tih hian hmuh leh mai theih a bo leh hmuh harsa zawka bo a awm leh tlat mai thin hi thil pawi tak mai a ni. Ka han sawi duh tak zawk chu hmuhchhuah harsa zawka bo, a ruka ruk hi a ni. Kum 5/6 kalta tawh khan ka fapa phai kal tur chuan a Sumo chuannaah ngei a Pawisa dahna (Purse) a tibo tawh a, a bo tih a hriatna chu Zemabawk dai, Tawngtaina-ah a ni. Min rawn Phone a, Pawisa pe turin a tlai a tlaiin Aizawl ka kal phah tawh nghe nghe a ni. Chu mai a nilo, kar hmasa mai khan ka fanu Aizawl atanga rawn haw lamin a Pawisa(Purse) a tibo leh hlauh mai pek a. Sumo chhunga bo nge, a mutthluk hlek lai emaw, reilote a chhuahsan hlek laia bo a nih rin a ni. Purse-ah chuan Pawisa tlem-a-zawng leh Chabi bawr pawimawh tak mai leh Damdawi Lehkha pawimawh tak te a awm si a, a buaithlak duh khawp mai. He thilah hian ka han sawi duh zawk tak chu, Sumo Driver te hi chhungkaw intodelh nana sum hmuh chu sawi loh mipui rawngbawl an nih inhriain passenger mangang au aw hi hriain, an thlavang hauh nan motor-ah ngei han in-dap/check ngam thin se a va tul ve le. Chutianga passenger te thlavang hauh ngam chu mipui pawhin dawr/chuan sak zel a chakawm khawp ang. Tun hnu zelah chuan Driver te hian a tul dan a zirin passenger te thlavang hauh ngam thin se tiin ka han fuih a ni e.//

Simeikhu chanchinbu hi Facebook lamah pawh kan rawn post nghal thin a, Simeikhu Group mai bakah Thingsulthliah Group leh Tst SubTown Group-ah te Simeikhu hi chhiar theihin a awm a ni. TEACHERS DAY Karleh Ningani (September 5) hi Zirtirtute Ni vawi 52-na a ni a. India ram pumah he Ni hi Zirna In-ah te hman a ni ang. Thingsulthliah Subtown-ah pawh hetiang hian hman tum a ni. Thingsulthliah-ah chuan chawhma lamah School hrang hrang ten mahni School-ah theuh mahni remchan anga programme siamin hman a ni ang a. Chawhnu dar 1:00 atangin Tst HSS-ah Thingsulthliah Teachers Association-ten Programme siamin an hmang ang a, tlaiah ruai an theh nghal ang. Tlangnuam chuan he thu kan buatsaih laiin an hman dan tur an la rel lova, mahni School-ah theuh an hmang mai thei niin thu kan dawng. Seling-ah chuan School hrang hrang naupangten zingkarah khawchhung tifaiin hnatlang an nei ang a, chhun lamah mahni School-ah theuh Programme siamin an hmang hlawm ang. Tuikhurhlu School pawh zingkarah Tuikhurhlu-ah khawlai tifaiin an hnatlang ang. MITTHI RALNA NEI Tunkar ni 28/8/2013(nilaini) khan Bialtu MLA & Home Minister ni bawk Pu R.Lalzirliana chu lo chhovin Edenthar, Phaibawk leh Seling-ah te mitthi ralna hun a rawn hmang a; nikum 2012 Dec 12 leh kumin 2013 Aug 27 inkara boral mi 13 te inah lutin ralna Rs. 500/- theuh a hlan. Office chawlh hun remchang hmasaah Tlangnuam leh Thingsulthliah-ah mitthi ralna hi rawn neih leh a tum niin kan lo hria. Minister Pu R.Lalzirliana hi BDO Pu Zothanmawia Khiangte leh Party workers thenkhat ten an lo tawiawm a ni.