SIMEIKHU KARTIN CHHUAK THINGSULTHLIAH

Dt. 1 June 2013 (INRINNI) PHEK- 2

editorial :

KHAWTLANG NUN SIAMTHAT

Kan Sub-town hi han thlir ila, kan Khawtlang Nun siam that a ngai kan tih loh pawhin Siam that a ngai lo, a tha alawm kan ti phal ang em? Veng thenkhatah Paho Tangrual Pawl te din a ngai a, VDP lam an duty ngawrh hle tih te, JAC din te tul kan tih bawk chuan, kan Khawtlang Nun hi kan ennawn a ngai tihna a ni a, Siamthat ngai lai chu huaisen taka siam pawh a tul awm e. Hman Kum 1970-80 bawr vel khan, Zurui insual tih thawm khaw tinah hriat tur a awm thin an ti a, tunah hian kan hre thar leh ta em? Hetiang thawm hian khua a titawp a, Khaw hming a tihmelhem a, VC, NGO leh Kohhran te kan tanrual chu a ngai hle. A pawimawh ber chu Nu leh Pa bawk kan ni tih hriat thar hi a tul hle niin a lang. Column dinglam ami zawmna mi dang a siamtha zawk thei tih kei ngei pawh hian ka paltlang tawh avangin tun hnuah min tilawm zual thin. Hremna pumpelh zawnga naupang chhan i chin chuan i la inchhir ang. Sawi tur a tam hle mai. Ruihhlovin zirlaite a tihbuai tawhzia pawh sawi a chakawm hle a, entawn leh chhan awm lova chawlh fo mai te pawh sawi zui a chakawm, remchang a awm chuan kan la tarlang leh turah ngai ang. Sikul thaa lut naupangte hi an thiam ber chuang lova, in lama kan lo enpui leh tuipui hi a pawimawh ber zawk. Zirtirna tha dawng eng ang mah se a chhunzawm lam an peih tlat loh chuan zirlai hlawhtling a ni ngai lovang. Tunhnai kan sub-town result en hian zirna hi a hniam lo tih a pawm ngam. Talent a awm a, a zawng hmu thiam leh taimaten mi bakin a thatna an hmu thin. Van Pathian auh hi a tha ngei e; mahse, kan lei pathian nu leh pate leh zirtirtute inpekna phena zirlaite inpekna hi lungrual taka suihkhawm a ni loh vaih chuan beisei tur a awm chuang lo. Dikna ngaina ringawt lovin i nunpui ang u.//

CORRUPTION LEH ZIRLAITE Lh.Sailo He thu hi hun rei tak ka zir chian hnua ziak ka nih chauh avangin a pawmtlak hle turah ka ngai. Corruption chu eirukna a ni mai. A awmzia kan hre theuh nain hmehbel bik erawh kan nei tlangpui. Sum leh pai diklo taka la lut thin te hi mi corrupt tiin kan sawi deuh ber awm e. Chutihrual chuan, kan nitin khawsak phunga kan chettlatnaah pawh inthlahrung lo takin corruption hian min chenchilh chho mek chu a nih si hi. Tui sem chung changah te, hman phal loh electric current thuk kan hmang lui talh te, tan hun nang lova tlai fo mai te, vantlang ram kan nek lui viau mai leh Rickshaw Fair diklo chawi thleng hian corruption a ni vek. Hei vang tak hian, inthlahrung lo takin zirlaite zinga corruption inphum thin hi a ruh lang rawtin kan tarlang dawn a ni. Zirlaite hminga tarlan ni zawk mah se a bul tumtu erawh nu leh pa kan ni tih kan hriat a tul ang. Fail reng chung sia pass: He corruption lian tak hi naupang chungah a tla nain nu leh pa mawh a ni mah zawk. Zirna bung thar C.C.E (continuous & comprehensive evaluation) kan kai atang hian a hluar zual niin a ngaih theih? Fail theih tawh loh tih ri thangkhawkin kan beng leh thluak a suk nasat vang nge, zirlai exam-a fail chiang em em te zingah mahni result pawm ngam tlat lo kan pung. Zirtirtute leh sikul thuneitute khawngaih beisei vanga zahthlak khawpa huangtau ngam pawh kan awm ta ! Zirtirtute hian zirlai naupang, a pianphung leh theihna te, a kum leh mizia te enin a result-ah tling zo lo mah se pawl sawntir tura thutlukna siam hun chu an hre khawp. Mahse, fail nazawng tih pass hram hi an ba lo tih kan hriatpui a ngai. Fail reng sia pass result neihtir tum talh te zinga thil thleng tur chu, Tling thelh apiang pawi tih a zual tih thu dik tak hi Tling lo mah ila ka tling leh tho ang tih thu puarpawlengin a thlak ang a, corruption bawihah an tlulut a ni nghal ang. Pawl bawh kan: Naupang zingah thiam thei fal zual deuh te, an pawlpuite aia kum lama an upat fal bik vang te, laklawh thil dang eng emaw bik riau vang tein pawl bawhkan an awm fova, heng mite hi chu hriatthiamna sang tak nen pawmpui theih an ni awm e. Mahse, dik taka thil tih hi a tlo ber fo ! Pass hram hram, a then phei chu khawngaihna avanga pass te an ni hlawm; chhuanlam fahrah te te neia pawl bawhkan hreh lo kan awm fo ta mai hi eng zia nge maw ni dawn ni? Heng mite hian a tlangpuiin an luhna sikul ngaiah admission an ti ngam lo tlangpui a, sikul dangah dawt phuahchawp deuh leh eng emaw chhuanlam siamin pawl bawhkan an tum thin. A chunga kan sawi, fail reng chung sia pass nen khian inkungkaihna thuk tak an nei lehnghal a; thil mak deuh chu, fail reng chung sia pawl bawhkan tho te pawh zu han awm tawh a ! Hrem phal loh: Hei hi sawi thui a chakawm hle. Mi tam takin zirlai naupangte hi hrem theih tawh loh nia ngaiin vui leh vaina kan ngah sawt hle. A tlangpuiin naupang thuawih lo, chimawm, hnawksakten hremna an tuar thin. Hetah tak hian an chhungte lo vuipui danin a zir loh chuan naupang siamthat lam aiin tihsuakbakna lam a thleng chawk. Naupang lo vuipui hian an rilru a tinova, a tipangchanga, chhelna an tlachham bik thin. Bible-in, I fa chu vaw rawh, a thi dawn si lova min ti a, thi si lova hremna lekkawh hi zirtirtute tan pawh phal a ni a, mahse uchuak taka hremna pek erawh khap a ni. A tlangpuiin naupang that duhna leh hmangaihna vangin zirtirtuten naupang an hrem thin. Hremna lekkawh ngai miah lohna sikul hi sikul tha a ni duh lo khawp. Khawvela lang phak khawpa sikul thate hian zirlai awm tha duhlo te lakah hremna an lek na thei hle. Chutihrual chuan, naupang an fel a, thu an awih na na na chuan hremna lek kher a tul lo thung. Zirlai chhel tak, hrehawm tuar ngam, puithiam leh lehkha ziaktute hmaa a thiamthu sawi lova ngawi reng beramno anga inngaitlawm fa nei tur chuan vuipui fo loh a him zawk tihna a nih chu. An thiam reng chung sia hremna an tawrh chuan complain thehluh pawh a pawi lovang, an thiamawm e. Mahse, kan ti leh zel teh ang; anmahni ngeia engkim an tawrh chhuah hian nakin hun atan an tangkaipui zawk tih hria ila, thiam lohna nei miah lo chunga midang ai hremna tawrh palh pawh hian.. Veilam column-ah zawm a ni