Marku

1 Bidaya ta ingil ta Yesua Mesiah Jena ta Alla. 2 Uwo moktub fi Ishaya al nebi, “ Ana bi
rasulu marasula tatai gidam taki, al bi jahizu sika tataki—soot ta wahid gi nadi fi sahara,
‘zahizu sika le Rabuna, mamar abu dukuri le uwo” 4 Fa ashan kida Yuhanna ja, gi amidu
fi karia abu sahara wa gi basiru mamudia ta touba le gufuran ta katiyaat. 5 Kura ta
Yahudiya kulu wa ma ta Urshelim masi le uwo. Gi iiterif be katiyaat tatomon, amidu
umon ma uwo fi bahar Urdun. 6Yuhanna libisu gumasaat salawu min gilit ta jemel, ma
gasgelit fi sulba tatou, wa uwo akulu jarajaraat wa asel ta gaba. 7Wa de yau kabara tatou:
“Baad ana wahid tani bi ja, guwa tatou futu tatai, ana ma bi istahik dengir gidam tatou
ashan fiku habil gizma tatou. 8 Ana gi amidu itakun be moyo, lakin uwo bi amidu itakun
be Roho al kudus.”

Maamudiya wa Tegiriba ta Yesua

9 Fi zaman dak Yesua Mesiah ja min Galili wa amidu uwo ma Yohanna fi Bahr Urdun.
10Ze ma Yesua gi tala fogo bara min moyo de, uwo ayinu samawaat gi fata wa Roho
Kudus gi nenzil le uwo ze hamam. 11 Wa soot ja min sama: “Ita gena tatai, al ana bi hibu;
ana moksut shedid ma ita.” 12 Tawali Roho rasulu uwo bara le sahara, wa uwo kan fi
sahara hinak arbeyin yom, gi geni jeribu ma Shitan. Uwo kan hinak ma hayuwanaat ta
gaba, wa malaikaat geni istakal le uwo.

Nadi ta talamis al awel-wahid

14 Baad maa kutu Yohanna fi sijiin, Yesua ruwa dakalu fi Galili, gi bashiru kabara kwes
ta Alla. 15 “Zaman ja kalas,’” uwo kelim. “Molokut ta Alla biga gerib. Tuub takun wa
amin takun” kabara kwes de!”
16 Ze ma Yesua kan gi dowuru jambu Bahar ta Galili de, uwo ayinu Simon ma aku tatou
Anduru gi jada sabaka juwa Buhera, ashan umon kan seyadiin. 17Taal, taal wara tai,”
Yesua gaal, “wa ana bi amulu itakun sayadiin ta nas.” 18 Tawali umon sibu sabakaat
tatomon wa ruwa waratatou. 19 Baad ma uwo ruwa gidam masafa suwiya, uwo ayinu
Jemis gena ta Zebadeyo wa aku tatou Yuhanna fi juwa murkab gi jahizu sabakaat
tatomon. 20 Bidun akir uwo nadi umon, wa umon sibu abu tatomon Zebadayo fi murkab
ma nas al ajiru wa umon ruwa waratatou.

Yesua turuju roho batal bara

21 Umon ruwa le Kapernahuma, wa zaman Sabata ja, Yesua dakalu fi hayikal wa bada
derisu. 22 Nas kan mustagarabiin ma durus tatou, liannu uwo derisu umon ze zol indu
sulta, ma ze mualimin ta gonun. 23 Fi nefsa wookit wahid rajil tani fi hayikal tatomon de
al kan maliyan ma roho batal kore be sout alih, 24 “Ita der sunu ma aanna, Yesua ta
Nazereta? Ita ja ashan demiru aanna? Ana bi aruf ita munu—zol kudus ta Alla. 25 “Askut
sakit! Yesua gal shedid. “Tala bara minu! 26 Tawali roho batal de hizuhizu zol shedid wa
tala bara minnu be korerak.
27 Nas del kulu istagarab hatta umon asaluasalu badun, “Mana ta de sunu? Deris jedid—
wa be sulta? Uwo gi wodi awamir hatta le arwah al bataliin wa umon iktaram uwo.” 28
Akbar an uwo inteshir guwamguwam le kulu akalim ta Galili.

Yesua Aliju Nas kutar

29 Tawali baad ma umon sibu al hiyikal, umon ruwa ma Jamis wa Jon le bet ta Simon wa
Anduru. 30 Nesiba ta Simon kan fi serir indu humma, wa umon wori le Yesua an uwo. 31
Fa uwo ruwa le uwo, amsuku inda tatou wa saidu uwo gum min serir. Huma tatou de sibu
uwo wa uwo tawali bada kadimu umon. 32 Fi misa dak baad shemis waga nas jibu le
Yesua kulu nas al ayanin wa al indu arwah al bataliin. 33 Medina kulu limu fi baab ta
beet de, wa Yesua aliju nas kutar al kan indu amraat barawbaraw. Uwo kaman turuju
arwah al bataliin ketiir bara min nas, lakin uwo ma wodi fursa le arwah al batalin dels
ashan bi wonusu liannu umon arufu kan uwo munu.

Yesua seli fi mahal al mafi zol fogo

35 Sabah bediri, ligo wata lisa bilel, Yesua gum fog, sibu beet al uwo kan gaid fogo wa
ruwa le maha al mafi zol fogo, mahal al uwo seli fogo. 36 Samaan wa nas al kan ma uwo
ruwa fetishu uwo, 37 wa fi zaman al umon ligo uwo, umon kelim: “Kulu nas gi fotishu
ita!”
38 Yesua juwabu, “kede aanna ruwa fi mahal tani barawu—le bwondohaat al geribiin ini
—ashan ana bi akider basiru hinak kaman. De yau sabab ana ja le dunia.” Fa uwo
safirsafir fi Galili kulu, gi basir fi hiyikalaat tatomon wa gi turuju abaliis bara.

Zol indu Jengeli

40 Zol indu jengeli ja le uwo wa asalu uwo ligo uwo arka gidam tatou, “Kan ita der, ita bi
akider amulu ana nedif.” 41Malau ma hannan, Yesua middu ida tatou wa lemesu rajil de.
“Ana der,” uwo gal. “Keli ita kun nedif!” 42 Fi nefsa wokit jengeli ta zol de sibu uwo wa
aliju uwo.
43Yesua rasulu uwo bara tawali be inzar gowi: 44 “Kun haris inu ita ma bi wori haja de le
ayi zol. Lakin ruwa, wori nefsa tataki le kuhana wa gedimu zabihaat al Musa amiru le
tahara tataki, ka shihada le umon.” 45 Min kan uwo bi Amule ze de, bel aks uwo ruwa
wonusu be huria, gi waza kabar al kwes de. Be sabab de Yesua biga ma bi akider dakalu
fi ayi medina ze zaman lakin uwo geni bara medina fi mahalaat al mafi nas fogo. Fi de
kulu nas lisa ja le uwo min mahalaat kulu.