Documenti di Didattica
Documenti di Professioni
Documenti di Cultura
Sia Thang Siangh peen Conference lunggulh vai ah tha hong pia mahmah khat ahihmanin
Conference vai a phuut beh leh a phu zom ding iin Mission sia te lak ah muan peen khat hong
suak ahihmanin 1989 year-end session ah 1990-1991 pan kum 2 sung teng Upper Myanmar
Mission ah hong makaih ding in session nominating committee ah a kinget sak tentan ahi hi.
Tua hi aa Conference a tha piak man iin Upper Myanmar Mission President a suak lawh,
Conference ii gah a lemlawh leh a phawhlawh a ne kha masa peen hi napi UMM President
panmunh hong let taktak ciang iin ama sep sung iin Conference status ngah theih nading
phuutpihna officially iin bang mah sem khia lo hi. Sia Siangh in ama ngimna leh tupna mun
ngah khinta ahihmanin “Hi bang iin sem zom suak thei peuh lengg Conference ih cih zongh
kisam tuan se ahia” ci iin Sia Mungno kiang ah a gen bang iin Conference vai a daph koih ahi
hi. Sia Siangh in Upper Myanmar Mission president ngah suak hiam Myanmar Union Mission
president or secretary panmunh khawng ngah thak hiam khat hi peuh mah leh Conference a
kisapna om a sa nawn lo ding ahi hi.
Hih 1991 Union session ah Upper Myanmar Mission pan Pr. Htein Nan leh Sia Paupu te
nominating committee sung ah na kihel uh hi. A thu leh a la hong kigen het lo ahihhangin Sia
Siangh bel Upper Myanmar Mission President ding iin Union makai te in deih nawn het lo uh hi
cih peen kilangh tang iin kimu thei hi. Banghang cih leh U Kan Nyunt peen Mandalay ah a teng
hi aa UMM in delegate ding aa a teel hi het lo napi Yangon Attached District pan aa lay delegate
1
ding iin MYUM in teel hiau mawk uh hi. U Kan Nyunt ii sep theih leh a sep zongh bang mah
om tuan het lo hi. Tua hun laai aa Union maikai te in a maan vet lo a sep uh khialhna lianpi khat
kilatna hi aa Far Eastern Division ah zongh hih khialhna hang aa lungkimlohna thu lai khak iin a
kiza sak ahi hi. Upper Myanmar Mission ah makai ding a kiteel ciang iin Pr. Htein Nan leh Sia
Paupu te in kum nih sung bek Sia Thang Siangh in UMM President a sem kha suak mawk
ahihmanin term khat beek ngah beh laai henla a sep masuan khat peuh a tawp dong zom suak leh
deihsak uh ahihmanin Sia Siangh a dingin nominating committee sung ah deihsakna takpi tawh a
nget sak uh aa a thuum sak uh hangin Myanmar Union Mission makaipi te’ muhna leh
nominating committee member dang te’ muhna ah piiang thei sa vet lo hi ding uh hi ven Pr.
Sandy Dee in vote tawh a zo a ngah ahihi. A banban in kiteel toto aa a tawpna ah Sia Siangh
ading panhmunh khat zongh awng nawn lo hi. Zomi AWR speaker ding in koih ding khawng
kivai hawm ta hi. Tua ciang in Sia Paupu in a sanggampa a itna leh a deihsakna tawh “President
ahi ngei sa khat AWR speaker ah koih liang ding cih peen kilawm mahmah buang kei in mun
khat hong geel pih hamtang un” a cih tentan ciangin Pr. Ba Khin, Union Secretary, ii
lungkimpihna hang mah tawh personal ministry ading in kiforward hi. Tua Personal Ministry
panmunh ading iin Sia Lawrence Gyi zongh ki forward ahihmanin Sia Siangh tawh vote a kituh
suak uh hi. Sia Paupu’ genna ah “Sia Siangh vote a pia ding peen kei leh Pr. Htein Nan bel
peel lo hi ungh. Tua ban ah Union makai Pr. Ba Khin, leh Pr. Do Hen Pau te in hong piak
pih ban ah a dang khat leh nih in ka ngetna hong panpih uh hi kei leh tua bang aa kitelna ah
vote tawh Sia Lawrence Gyi bel a zo ding hi vet lo hi” ci hi. Hih peen piakkhong (consolation
prize) cih ding hi mai aa ih lungdam mahmah ding thu khat ahi hi. Myanmar Union Mission ah
Sia Siangh in Personal Ministry panmunh hong ngah thei iin Church Ministries Director ahi Pr.
Moses Po’ khut nuai ah Associate Director tanh panmunh khat a ngah kik ahi hi. Union makai te
tawh ih deih a kituak lo kha thei hi bek aa amau zongh a hi thei ciangciang ah a hoih thei peen
mah ngaihsun a hih lam kimu thei hi. Hih panmunh peen a niam hi peuhmah lo, panmunh hoih
veve khat hi napi Associate Director level in ukh theihna vangg (executive power) a neih loh
man iin Sia Siangh peen lungkim zo mahmah lo hi.
2
Kham Khen bang in zongh “tua bang in hih leng ih credential te hong kidok kik ding hi” a cih
peen ka bil kha in zaza laai hi.
Sia Thang Siangh’ lungkim lohna ah a paulap te January 13, 2006 leh March 15, 2006 ni aa a
laigelh te tungtawn iin pawl khat en pak lengg:
1. Term Cinglopi Kiteelna bawl: A zenzen iin Upper Myanmar Mission president or mission
dang khat peuh ah mission president hiam Myanmar Union Mission President or Secretary
cih hiam khat a ngah kha hi peuhmah leh term cinglo pi aa MYUM session in mission
president or union president or union secretary hong piak uh peen veto power a zangh uh hi
in policy tawh kituak lo hi ci iin hi bang iin sin soso iin phunphun het lo ding hi. December
13-19, 1991 hun sung aa Myanmar Union Mission session aa kiteelna a kizawh khit masiah
hih session kibawl vai ah Sia Thang Siangh in “a hun (term) cing lo pi in ki teelna” (Thang
Siangh, March 15, 2006) a kibawl ding ahih lam a gen leh a lungkim loh lam ka za ngei het
kei hi. Kiteel khit ciang bek aa hong ging khiasan kammal ahi hi. Theih ding thu khat ah
kum nih khit ciang aa a kiteelna a om kik ding peen 1989 session aa a kigen sa ahi hi.
Banghang cih leh 1989 Union session peen SAD (Southern Asia Division) pan FED (Far
Eastern Division) ah ih lut ih peem thak zawh session masa peen ahihmanin Division luui
SAD aa Union session hun leh Division thak FED aa Union session hun te a kituak diamdiam
theih nading iin a lephna uh aa kum 2 khit ciang aa session a om kik ding aa a kisehsa limlim
ahi hi.
2. Veto tawh Sandy Dee hong koih: Ki teel khit ciang iin mawh zonna bek iin“policy tawh
kizuilo pi veto tawh hun cinglo pi in, Sandy Dee hong koih” (Thang Siangh, January 13,
2006) uh hi ci in gen hi. Veto tawh Sandy Dee a teel ding uh hi leh Union session sap kul lo
ding hi. Kiteelna ki bawl aa Sia Siangh in a cing kik a ngah kik zo lo bek ahi hi. Union
session aa kiteelna pan Sia Siangh in a ngah kik loh man iin kiteelna ah a ngah Sandy Dee
peen veto tawh kikoih bang aa gen peen thu langgen ahi hi. Myanmar Union Mission ah
Associate Director dinmunh ding zongh a kinget sak tentan ciang aa Union makaite leh
nominating committee member te panpihna tawh a ngah thei liai ahih zawk lam a kicing iin a
tung aa “1991 kum bei Union session ah kiteelna” cih thulu sung ah ih gen khin zo hi.
3. Section dangte kikheel om lo: “Term cinglo a hih kiteelna pen UMM ngimna bek
ahihmanin Section dangte kilaih kikhel omlo hi” ci in SIHNA GUAMSUNG PAN 5 sung
ah March 11, 2010 iin Sia Thang Siangh in amah a kideih loh man bek aa Myanmar Union
buppi in Mission 4 leh Yangon District pan aa officer teng, worker leh lay delegate tampi te
sam iin sum leh paai, tha leh ngal, tampi bei lawh iin session a neih lawh zaw zen ding bang
iin a gen mawkmawk hang iin tua bang thu om thei ngiat lo hi. Tua ban ah UMM President
panmunh pan Sia Thang Siangh lak khiat na ding in Division in Union session a kum a kha
seh tawm ngei lo ding aa Sia Thang Siangh hang iin kitelna leh session bawl leh vaan dingin
sum leh hun tampi bei in Division pan makaipi te hong pai ngei lo ding uh hi. UMM
president panhmunh pan Sia Thang Siangh a lak khiat nop man un Union session bawl
ziaizuai ding cih peen gending leh ngaihsut aa neih ding in zongh lungmawl vai lua thu khat
ahi hi. Leitung kipawlna paizia a tel nai lo, ngaihsutna picing a nei nai lo te in a um kha
phial uh zongh iin ngaihsutna picing a nei mi ciim te ading iin uph theih ding thu hi lo hi.
Hih bang aa Sia Thang Siangh in “UMM ngimna bek ahihmanin Section dangte kilaih
kikhel omlo hi” ci aa a gen keei peen a maan tatak mah hiam or political propaganda bek
3
hiam cih a tel nuam te ading iin December 13-19, 1991 sung aa Myanmar Union Mission
session ah Section makai teng leh Union Departmental level pawl khat a kikheel diamdiam te
a nuai aa bang iin kimu thei hi.
Ciapteh ding:
1. Nasepna mun bulphuh aa kigual hi.
2. December 13-19, 1991 kiteelna pan a panmunh luui leh a sepna mun mah ah a kip a sem
suak mi thum bek om aa tua te in San Nyunt, Than Khuma, leh Thangpu te ahi uh hi. Tua
thum teng lo buang kikheel dimdiam aa Thang Siangh bek a kikheel hi lo hi.
AYM=Ayerawaddy Mission SEM=Southeast Mission
CMM=Central Myanmar Mission UMM=Upper Myanmar Mission
CM=Church Ministries YAD=Yangon Attached District
MYUM=Myanmar Union Mission N/A=Not applicable/available
4
kitelna ah a lamet panmunh a ngah kik zawh loh ciang iin amah a deihsak mahmah leh a
panpih te tung ah lungdam koh ding sangsik iin a Zomi pih khempeuh te tung ah amah ading
a deihsak peen te ahi Sia Paupu, Sia Lianpu, leh Sia Mungno te unaau in amah a lehhek,
minam a zuak bang keek iin January 13, 2006 ni iin taang_ngalliam@yahoo.com email
address tawh zomisda@yahoogroups.com pan mawh sakna taangko zaw sop mawk hi.
Sanggam khat, Zomi pih khat in panmunh a ngah kik loh a kidah pih kawm kaal ah Sia
Siangh in a sanggam te hong langbawl ding kipan zawsop mawk ahihmanin sanggam khat a
sup beh ka suak dih zen ban uh ah a sanggamte tung ah a bawl dan peen mulkim huai
mahmah hi.
A mawhmatna te a tom iin a nuai aa te ahi hi. 1991 Union session ah Sia Siangh in Upper
Myanmar Mission President a ngah kik loh akipan paulap tuamtuam leh midang te tung ah
mawhmatna te hong pankhia aa lammaan lo ahi tutphah ot loh ding thu ah Sia Paupu in a panpih
zawh loh man iin Sia Paupu te unaau in Sia Siangh a lehheek leh Conference a langpan bang
keek iin hangsan tak iin Zomi te lak ah taangko iin zuau phuak ek mawk hi. “Paupu pen sumleng
thahaat laitak hi a, ka-innah hong kibuphual uh hi. Anaute Mungno leh Lianpu zong kihel ahih manin
so mahmah uh hi. ------------ Conferenc adeih kaseppih mi thum unionte tawh hong kop uh hi. ----------
Niangtui haikhat tawh ih minam kizuak ngam lai hi. Tua thei uh ahih manin, position tawh akaih
pawl om, dangka tawh a den pawl om, US visa tawh azol pawl om tua ten bel a goal uh nanai koih lua
uh hi.” (Conference vai, Thang Siangh, January 13, 2006) ci in zuau thu thehthaang hi. A taktak
ci lengg, “tu tung taang UMM President ka ngah kik zawh loh hang iin hi zah dong aa ki deihsak
aa maa ih pankhawm theih lungdam hangh. Ei unaau sung ah no te geel beek hong kip laai ucin
lungdam hang ei. Ki mang ngilh lo iin ki en ki dom to diamdiam ni” cih bang hi leh bang zah ta
iin et lawm ding hiam? 1991 Union session ah Sia Lianpu in Ayeyarwaddy Mission treasurer
ngah iin Sia Mungno in Upper Myanmar Mission treasurer a ngah peen hong lungdampih het lo
iin Union in “position tawh akaih pawl om” hi ci se hi. 1990 kum GC session ah lay delegate
ding iin Sia Paupu kiteel iin va pai ahihmanin lungdampih ning ci lo iin Union in “US visa tawh
a zol pawl om” hi ci in pawlpi makai te leh Sia Paupu gensiatna kammal mah zangh hamtang hi.
Sia Siangh zongh Myanmar Union ah Associate Director hi aa panmunh niam hi het lo napi
hawm thawh lua mahmah pha diak iin Section president panmunh bek mah mit suan iin nei
ngeungau mawk ahihmanin tua mun a ngah kik zawh loh peen Conference hang aa amah a kipiik
khia dan leh Union makai te in Zomi te hong kideidanna hang suak sak dih zen iin Zomi sung ah
holhthawh kawikawi ahihmanin ama lungsim tawng a thei lo, minam it leh conference deih cih
ciang bek a ngaihsun te in maan sa mahmah kha aa tu ni ciang dong khem cip zo hiau mawk hi.
A taktak iin 1990 kum GC session peen Indianapolis, Indiana, ah a kibawl hi aa lay delegate ding
aa Sia Paupu a forward peen Pr. Kip Za Nang ahi hi. Upper Myanmar Mission aa Sia Kip Za
Nang iin President a sem laai tak aa amah a laih ding aa Sia Thang Siangh a phuum vauvau peen
Sia Paupu ahi hi. Sia Siangh’ lungsim puak bang Sia Kip in nei hi kha leh GC session aa pai
ding iin Sia Paupu forward het lo ding hi. Sia Paupu te unaau in Sia Kip te innkuan it mahmah
hi. Sia Kip te innkuan in zongh Sia Paupu te unaau it mahmah hi. Sia Paupu te unaau in a U
Siangh te innkuan tu ni dong it iin ngai mahmah uh hi. Sia Siangh in zongh 1991 Union session
masiah Sia Paupu te unaau it mahmah hi. Ahihhangin 1991 Union session aa Sia Paupu in Sia
Thang Siangh peen Upper Myanmar Mission president ding aa a phuum a nget aa a ngah pih
zawh loh ciang leh tutphah ot loh ding thu ah Sia Paupu in a panpih zawh loh akipan Sia
Siangh in Sia Paupu te unaau it nawn lo pah mawk iin gensiat ding kipan pah hi. Panmunh,
position, politics, bekbek Sia Siangh in ngaihsun leh mitsuan lua lawmlawm ahihmanin a
5
ngaihsutna siangtho thei nawn lo hi. Vantung aa kidona lianpi (The Great Controversy) ka sim
sial leh ka ngaihsut khak sim iin Satan bang aa panmunh deih lua leh politics a uuk lua te in thu
tokh nawi tawntung ahih lam ka phawk kha den hi. Mawhna a nei ngei nai lo vantung mi thum
sim ah khat in Pasian sang iin Satan’ thu um zaw thei mawk ahihteh leitung mawhnei mi, ei
Zomi SDA pawlpi, sung aa ih buaina te zongh Satan’ mah makai zel ahihmanin a kibuai thei
ding mah hi in cia ci in ka kihehnem mai hi.
Hih 1991 kum bei aa kiteelna gah (result) peen 1989 kum bei aa kiteelna gah (result) ih saansiam
mah bang iin ih san theih ding thupi mahmah hi. 1989 kum bei session nominating committee ah
Sia Paupu leh Pr. Mai Don in Sia Thang Siangh ading a ngetsak tentan uh mah bang iin 1991
kum bei aa kiteelna ah zongh Sia Paupu leh Pr. Htein Nan te in Sia Thang Siangh in term thak
khat hong sep beh theih nading iin ngetsak leh thuumsak tentan kik na pi uh ngah zo tuan
mahmah lo iin Pr. Sandy Dee in vote tawh zo aa Pr. Sandy Dee in Upper Myanmar Mission
President hong sem ahi hi. 1989 kum aa kiteelna gah (result) tawh kisai Sia Kai Dal in February
16, 2007, ni aa a gen ahi “Sia Siangh in president a ngah hunta ahihmanin a ngah theih
nading in a kimu thei lo thu khat in amau tung bang ci tawsawn aitam cih ngaihsut huai hi”
ci aa a gen thumaan mahmah (principle) peen mah 1991 kum Myanmar Union session kiteelna
gah (result) ah zongh ih ciin (apply) kik ding kisam hi. Sia Paupu leh Pr. Htein Nan te in bang
zah iin deihsak iin thuum iin a ngetsak uh hang iin Topa’ Khasiangtho in nominating committee
member dang te’ lungsim a makaihna tungtawn iin Pr. Sandy Dee in vote tawh a zo ahi hi. Tua
hi aa Sia Sandy Dee in Upper Myanmar Mission president a ngah hunta ahihmanin a ngah
theih nading in a kimu thei lo Khasiangtho in nominating committee member dang te lungsim
sung ah bang ci tawsawn aitam cih ngaihsut huai mahmah hi. Ei deihna lam bek a maan bang
iin seh ding hi lo aa thungetna tawh hoih tak aa akigeel nominating committee ii khensatna peen
ih pawlpi ading aa a hoih peen hi ih cih theih ih san theih ding thupi mahmah hi.
Ei Zomi makai ih neih sunsun te lah Upper Myanmar Mission president panmunh lel khawng
ngahkik loh man iin a dam thei lo cancer natna vei bang iin a maan lo pi aa a hehna te uh dam
thei lo iin khasia den keei mawk iin SDA pawlpi nangawn langdo lawh liang na ve uh, Elder
Robert S Folkenberg bang General Conference President dinmunh pan iin a hun cing lo pi iin a
kikheel hi napi General Conference makai te, Divisions, Unions, Conferences makai te leh SDA
pawlpi himhim langpan iin gensia ning ci het lo iin tu ni ciang dong lei tung bup ah zin kawikawi
iin Pasian thu taangkona ah maa pang iin hanciam mahmah laai hi. Pastor tek tek, makai sem
ngei tektek, ahih uh hang iin SDA pawlpi a it dan uh, kipawlna (organization) sung aa kalsuan
khuasak zia leh a kha lam khangcinna (spiritual maturity) te uh kikim het lo cih kilangh mahmah
hi.
Mungno Gualnam
Friday, January 27, 2011
*Topa in inn lam kei leh a lam mite’ na sepna peen a mawkna ahi hi. Topa in khuapi hu kei leh
khuapi cingte’ cinna peen a mawkna ahi hi. Late 127:1)*