Sei sulla pagina 1di 6

1

HKYE SHALAWT AI HTE SENG AI KARAI MASA


(LIBERATION THEOLOGY)
Ga Hpaw
Liberation theology gaw Yesu a wudang hta si hkam ai lam hpe shanglawt la ai lam a
kasi hku yu la ai Karai masa rai nga ai. Lachyum gaw, Yesu Hkrsitu a wudang ntsa hta
tsin yam hkam sha let hkye la ai lam gaw, mayam shatai sha, dip sha, roi sha, zingri
sha hkrum ai tsin yam kaw na shalawt ya nga ai ngu ai lam rai nga ai.1 1960 ning
daram hta Latin America kaw na shalat dat ai Karai masa rai tim, dai ni na aten hta
gaw grai dam lada ai hku theology hta jai lang nga sai re. Latin America ni a
Liberatiion Theology masa hta ra rawng ai lam ni, n hkum tsup ai lam ni law law nga
ai ngu dinglun ai lam ni law law nga tim, liberation theology masa a mungga madung
rai nga ai shalawt dat ai hte seng ai Karai masa gaw tinang a buga ginra masa
(context) hte mahkri jashawn nna jai lang na manu dan nga ai ngu hkam la ai ni law
law rai nga ai.
1. Liberation Theology a Npawt Nhpang Labau Gadun
1960 a daram hta Latin America gaw sut masa a majaw shinggyim nga pra
masa madang n bung hkat ai lam grai kaba wa ai hte, de a n pawt hpe sagawn ai
shaloi, arang lu, lu su ai ni a, n tara ai hku arang kata masha ni hpe dip sha roi sha ai
majaw re ai hpe mu chye lu ma ai. Dai hku byin ai lam gaw, lu su ai ni (sh) arang lu ai
ni, matsan ai ni (sh) arang nlu ai ni hpe n tara ai hku dip sha roi sha lu shangun ai,
shinggyim nga pra masa lam hte seng ai hkrang masa (social structure) a majaw re
ngu hkam la ma ai. Dai majaw n tara ai hku, dip da hkrum roi sha hkrum ai kaw na
lawt lu na matu shakut ai shanglawt masa byin pru wa ai rai nga ai. Brazi mungdan na
tara kasa rai nga ai, Paulo Freire gaw Latin America shara shagu hta laika hpaji n
chye ai asak ram sai ni yawng hpe laika hpaji chye hkra ngu ai masing kaba langai
woi galaw wu ai.2 Yaw shada ai lam gaw, tianang a byin da masa ni hpe hkrak chye na
lu ai atsam lu la nna, dip da roi sha hkrum ai shinggyim nga pra masa hte seng ai
hkrang masa (social structure) hpe shading sharai la lu na matu rai nga ai. Paulo Freire
wa a woi shakut ai ladat hte maren sut masa madang bung ai ni, hpaji madang bung ai
ni, mayak mang hkang hkrum sha ai lam bung ai ni wuhpawng law law hpaw nna,
tinang hkrum kadup nga ai dip da roi sha hkrum ai kaw na lawt lu na matu jawm
shakut ma ai. Rau jawm nawku ai, chyum laika rau jawm hti ai, shada karum shingtau
hkat ai lam ni galaw ma ai. Liberation Theology gaw, dai zawn wuhpung wuhpawng
ni hpaw rai, lawt lu na lam shakut ai lam ni kaw na npawt hpang wa ai re. Dai lam ni
hpe Medellin mare e galaw ai bishops ni a the second Latin American Episcopal
Conference kaw bawng ban ai hte, Liberation Theology gin shalat jai lang hpang wa
ai re. Peru mungdan na Gustavo Gutierrez wa Liberation Theology ngu ai laika buk
hpe dip shapraw let woi jasu jahprang ai kaw na Liberation theology masa hpe grau
dam lada ai hku jai lang wa ma ai.3
2. Liberation theology a Dai Pawt Dai Hpang ni
a) Shinggyim masha a nga pra lam hpe awng dawm lawt lu ai lam rai ra ai ngu
ai myi jut hte, byin nga ai mabyin hpe gawn jep yu ai hte, du na ra ai aten hta grau
mai kaja ai hku galai shai hkra gaw gap ra ai ngu ai lam yan hta dai pawt dai hpang
tawn ai karai masa re.Tinang a ahkaw ahkang (rights) ni hpe chye na matu sharin
1

K.P Kuruvila, The Word Became Flesh: A Chritological Paradigm for doing theology in India (Delhi:
ISPCK, 2002), P.194.
2
Leonardo & Clodovis Boff, Salvation and Liberation (Quezon City, Philippines: Clarentain
Publications, 1986), p.28.
3
Tony Lane, The Lion Concise Book of Christian Thought ( Oxford, England: Lion Publishing Plc,
1984), P. 247.

2
achyin ya ai hte, dai ahkaw ahkang ni gaw gap la lu na matu tatut shang lawm gun
hpai ai wuhpawng ni gyin shalat la nna, mung masa sut masa shinggyim nga pra masa
ni a hkrang galai shai hkra shakut ai ladat re.
b) Chyum laika hpe shalawt dat ai hte seng ai ru di laika buk hku hkam la ma
ai. Chyum laika hpe hti nna lachyum htai la ai shaloi matsan jam jau ai ni a myi
jut hku htai la ra ai ngu hkam la ma ai.4 Karai Kasang gaw Egutu kaw mayam tai nga
ai Israela myu ni hpe shalawt la ai, Babylon e bawng dung ai kaw na hkye shalawt la
ai lam ni gaw, shinggyim labau hta Karai Kasang shang lawm nna shalawt la ai a
sakse ni rai nga ai. Karai Kasang gaw Yesu Hkrsitu hku nna, kaw si hpang gara hkrum
ai ni, tsin yam tsin dam hkrum ai ni, dip sha roi sha hkrum ai ni, shinggyim masha
hku n sawn la hkrum ai ni yawng hpe hkye shalawt la na matu shinggyim hkum
hkrang dagraw let shinggyim masha ni a lapran hta kasi yu la na matu hkye shalawt ai
magam bungli galaw dan sai re. Luka 4:18-19 hta Yesu a hkye shalawt la ai lam gaw
wenyi hte hkum hkrang lahkawng yan hte seng nga ai. Karai Kasang gaw dip sha roi
sha, n tara ai hku bawdaw amyat htuk sha ai hpe ninghkap ai Karai re. Dai majaw
kam sham ai ni yawng gaw, Karai Kasang galaw ai magam bungli hta ap nawng
galaw gun hpai ra ai, ngu hkam la ma ai.
c) Liberation theology gaw Karl Marx a Masha wuhpawng hte seng ai jep
sagawn masa hpe mung jai lang ma ai. Marx a ningmu hta moi shawng na prat
(mungding prat) hta masha gaw yu yu si si rai nga nna, ngwi pyaw sim sa ai
wuhpawng hku nga lai wa ai re. Rai tim, sut masa tsang madang gin hka ai lam ni lani
hte lani rawt tsaw wa ai shaloi, dai moi shawng na prat hta lu la ai ngwi pyaw simsa ai
lam ni hkoi mat wa sai. Sut lu nga mai lam hpe sha madung dat mat wa ai majaw
wuhpawng hta dip sha, baw daw sha ai lam ni byin pru wa sai. Dai majaw Marx gaw
masha a mang hkang ni yawng a npawt gaw, n dai zawn sut lu nga mai lam madang
nbung ai lapran na dip sha , baw daw sha ai lam kaw na byin pru wa ai re ngu kam wu
ai. Dai zawn re ai lam ni hpe shabyin ai a ru di madung gaw arang madu masa (sh) sut
madu masa (capitalism) re ngu hkam la wu ai. Dai lai masa hte myit jasat masa ni,
mung masa, sut masa, shinggyim nga pra masa hta nga nga ding sa shinggyim
wuhpawng gaw ngwi pyaw simsa lam n lu la lu ai. Dai majaw, dai hkrang masa hpe
galai shai kau ra ai. Sut masa hta yawng jawm madu ai hkrang masa de galai shai la ra
ai ngu hkam la wu ai.5 Liberation theology gaw dai Karl Marx a social analysis hpe jai
lang nna, matsan jam jau ai ni hpe roi sha lu shangun ai social structure gaw yubak
mara hpe shabyin nga ai. Dai majaw tsi kau ra ai ngu hkam la ma ai.
3. Liberation Theology a Karai Masa Hkridun
Makam masham hte seng ai tara ni, hkam la ai lam ni gaw ta tut asak hkrung
lam hpe akyu jaw ai lam n rai yang, dai gaw teng man ai Karai mungga n re. Hpa
majaw nga yang, dai gaw lu su ai ni, arawng aya lu ai ni a matu sha akyu nga ai. Dip
sha roi sha, baw daw sha hkrum ai masha ni a matu kabu gara shiga n tai lu ai. Dai
majaw Hkristan ni, hpa baw hpe kam ai ngu ai hta sha tsun htai lai nna myit dik nga ai
baw n re. Hkristan ni, n dai mungkan grau tara rap ra ai mungkan, grau ngwi pyaw
simsa ai mungkan tai wa na matu, mang hkang hpyan jasan ai lam hta shang lawm ra
ai ngu ai Karai masa pru wa ai.
Dai masa hta mahta nna, Peru mungdan na Karai masa ninghkring Gustavo
Guitierrez gaw liberation theology karai masa hpe ningshawng shaw woi tsun

Paul L. Schrieber, Liberation theology and the Old Testament: an exegetical critique, in Concordia
Journal, Vol. 13, No. 1, Jan. 1987, pp. 27-46.
5
D. D. Webster, Liberation Theology, in Evangelical Dictionary of Theology, ed., by Walter A. Elwell
(Grand Rapids, Michigan: Baker Books, 1984), p. 636.

3
shapraw dat ai rai nga ai.6 Liberation Theology a Karai masa hkridun gaw (1) mung
masa, sut masa, shinggyim nga pra masa, myu ru sai masa, gender hte seng ai masa,
makam masham masa ni hta dip da, roi sha hkrum ai hpe hkye shalawt la, lakawn la
ra ai. (2) Karai masa (theology) ngu ai gaw, shinggan shara ra kaw na la jashawn bang
la ai baw n re; Hkristan wuhpawng kaw na npawt nhpang paw pru wa ra ai baw she
re. Dai Karai masa gaw (a) tsin yam kaw na lawt lu na matu shakut nga ai matsan jam
jau ai ni hpe chyum masa hta mahta nna, myit mada shara gaw gap ya ai lam re. (b)
Wuhpawng hte dai wuhpawng a myit jasat masa ni hpe sawk sagawn dinglun yu ai
hte; matsan ai hte lu su ai tsang madang gin hka nga ai wuhpawng kaw na, tsang
madang ginhka ai lam n nga ai (tinang a htingbu wa hpe tinang hkum hte maren tsaw
ra ai) wuhpawng byin tai na matu matsan masha ni maga tsap let ap nawng dawjau ai
lam re. (c) Nawku hpung a magam bungli ni yawng gaw matsan jam jau ai ni hpe
shalawt dat ai hte seng ai lam rai ra ai ngu ai lam ni rai nga ai.
4. Liberation Theology gin shalat ai lai masa
Matsan jam jau ai ni hpe shalawt ra ai ngu ai masa kaw ru di tawn ai re. (1)
Seeing , liberation theology gaw matsan mayan ni hte dip sha hkrum ai ni, shanhte a
prat hpe shanhte gara hku mu mada ai ngu ai masa hpe jep sagawn yu ai lam hte n
pawt hpang ai re. N tara, n rap ra nga ai ngu ai hpe mu chye la ai kaw na hpang ai.
Karai a myi jut hku dip sha roi sha ai ngu ai gaw, kaning re ai lam ni rai ta? ngu ai hpe
chye la nna, hpa majaw matsan jam jau hkrum, dip sha roi sha hkrum a ta? Dai zawn
hkrum sha shangun ai a ru di n paet hpa rai ta? ngu ai hpe sawk sagawn la ai re. (2)
Judging, dai zawn re ai byin da masa hte seng nna Karai mungga gaw ganing ngu
tsun nga a ta? Kaning re ai magam bungli ni gaw dai zawn n tara n rap ra ai masa hpe
galai shai kau ya lu a ta? Ganing re ai masing masa ni jai lang na rai ta? ngu ai hpe
daw dan ai re. (3) Acting, daw dan masing jahkrat da ai hku ta tut shang lawm gun
hpai let matsan jam jau ai ni hpe shalawt dat lu na matu shakut ai lam re.7
Dai hku nna matsan jam jau ai ni, mung masa, sut masa, shinggyim nga pra
masa lam yan yawng hta shanglawt lu na matu woi shakut ai lai masa rai nga ai.
5. Liberation Theology hpe Dinglun ai Lam Ni
(1) Liberation theology gaw Yesu a asak hkrung lam hte si hkam ai lam hte
seng nna, shinggyim nga pra masa, sut masa, mung masa ni hte sha tsun jahta nna;
Yesu Hkristu chyu sha teng man ai Karai re ngu ai lam hpe tsun shaleng ai lam n
galaw ai majaw, dai lam hta gawng kya ai.8
(2) Aloysius Pieris SJ. wa dinglun ai gaw, Latin America Liberation Theology a social
analysis hta cultural appraoach n lawm ai majaw n hkum tsup ai ngu ding lun wu ai.9
(3) FR. Tissa Balasuriya O.M.I wa dinglun ai gaw, Latin America Liberation
Theology gaw matsan ai (poor) hte dip sha hkrum ai (oppressed) ni a lam sha madung
dat nna, Latin America na masha n sawn hkrum ai myu kaji ni (marginalized racial
groups) a lam hpa n tsun shalawm ai majaw n hkum tsup ai. Bai nna, Latin America
na mang hkang ni hpe mungkan ting hte mahkri shawn nna myit mang mahtai
shapraw ai lam n galaw ai majaw n hkup tup ai ngu ding lun wu ai.10
6

Robert S. Goizueta, Liberation, Method and Dialogue: Enrique Dussel and North American
Theological Discourse (Atlanta Georgia: Scholars Press, 1988), p.21.
7
James R. Whelchel, The Path to Liberation: Theology of Struggle in the Philippines (quezon City,
Philippines: New Day Publishers, 1995), p.44.
8
D. D. Webster, Liberation Theology, in Evangelical Dictionary of Theology, ed., by Walter A. Elwell
(Grand Rapids, Michigan: Baker Books, 1984), p.637.
9
Franklyn J. Balasundaram, Contemporary Asian Christian Theology ( Bangalore, India:ISPCK,
1995), P.119.
10
Ibid, p.35.

4
(4) Vatican(1984) gaw Latin America Liberation theology a matsan mayan ni hpe
madung dat ai theology masa hte, Hkristan ni gaw shinggyim masha ni a sari sadang,
shanglawt ahkaw ahkang hte tara rap ra lam a matu shakut ai lam ni hta shang lawm
ra ai ngu ai theology masa ni hpe aja awa madi shadaw wu ai. Rai tim, ndai dinghta
mungkan lam ni kaw na lawt lam hpe nam bat langai ahkyak da nna, yubak mara kaw
na Yesu Hkristu shalawt la ai wenyi asak hkrung lam hpe nam bat lahkawng hku sha
ahkyak da ai gaw shut ai ngu ding lun wu ai. Bai nna, Karl Marx a social analysis gaw
shinggyim labau mabyin masa kaw ru di tawn ai re. Latin America Liberation
Theology gaw dai analysis ntsa kaw Hkristan ni a makam hkridun yang hpe lachyum
htai la ai hku rai wa ai majaw shut ai ngu dinglun ma ai.11
(5) N kau mi gaw Latin America Liberation Theology jai lang ai Marxism masa gaw
shinggyim masha hpe tinang hkum tinang machyu nna prat hpe hparan la ra ai ngu ai
masa hpe byin pru shangun ai hte, Karai Kasang a hpan da hkrum ai shinggyim masha
ngu ai hkam la ai lam hpe yawm mat wa shangun ai ngu dinglun ma ai. Shinggyim
masha ni n dang hkawn hkrang lu ai Karai Kasang a chyeju ni, hkri tung mara
(original sin), myit malai ai hte Yesu Hkristu hpe kam sham ai ngu ai lam ni, htani
htana ningngai nga na sumsing mungdan a lam ni hpe Latin America Liberation
Theology gaw n tsun shalawm ai majaw n hkum tsup ai ngu nna mung dinglun ma
ai.12
6. Dai Ni Na Nawku Hpung Ni Hte Liberation Theology Masa
Latin America Liberation Theology a ntsa dinglun ai lam ni law law nga tim,
Latin America Liberation Theology a ru di masa hpe la kap nna Third World
Theologies, Feminist Theogy, Black Theology etc. ni gin shalat la mat wa ai re. Karai
Kasang a up hkang ai lam (Gods reign) ngu ai kaw n pawt de ai hte, de n tsa mahta
nna nawku hpung a sasana magam bungli ngu ai hpe jep jen yu ra ai, dinglun yu ra ai.
Ra wa yang, shading sharai ra ai, hkrang galai kau ra ai ngu ai masa lam ni gaw manu
dan nga ai. Karai Kasang gaw tara rap ra ai Karai rai nna, shinggyim wuhpawng hta
tara rap ra lam lu la nga na matu sharawng awng ai Karai re. Shinggyim labau hta
matsan ai ni hte dip sha roi sha hkrum ai ni hpang maga tsap nna shalawt ya nga ai
Karai re.Karai Kasang gaw shinggyim labau hta tatut shang lawm let dip sha roi sha
hkrum ai ni hpe shalawt la nga ai zawn, Karai Kasang hpe kam sham ai Hkristan ni
mung Karai Kasang galaw ai magam bungli hta shang lawm gun hpai ra ai. Matsan ai
ni hte dip sha roi sha hkrum ai ni hpe shalawt dat ai magam bungli hta ta tut shang
lawm gun hpai ra ai ngu ai Karai masa lam ni gaw Latin America Liberation Theology
jaw ya nga ai manu dan ai Karai masa rai nga ai.
Karai masa (Theology) shagu gaw tinang a ginra masa (context) hta gaw gap
la ra ai majaw, Latin America Liberation Theology masa hpe direct copy galaw ai baw
gaw n re. Tinang a ginra masa (context) hta Karai Kasang a hpaw hpyan dan ai sasana
bungli masa (revelation) nga chyalu re. Latin America ni gaw gap ai Liberation
Theology hpe kasi yu la nna, tinang a ginra masa (context) hta htap htuk ai Liberation
Theology masa hpe gin shalat jai lang yang akyu kaba mai pru nga ai.
Anhte myu Chyurum W.P sha ni, mai gan amyu ni hpe sasana mung galaw nga
ga ai, mungkan shara shagu hta ningngai nga lu ai ni mung lawm sai; ja gumhpraw lu
su nga mai ai ni, hpaji degree kaba lu la ai ni mung lawm sai; Lu su ai buga hpung ni
law law nga saga ai. Rai tim lam shagu hta awng dawm lawt lu ai amyu tai sai ngu
tsun lu na i? Anhte Chyurum W.P sha ni a myu sha lam yan masa, sut masa,
11

Tony Lane, The Lion Concise Book of Christian Thought ( Oxford, England: Lion Publishing Plc,
1984), P. 249.
12
Stanley J. Grenz & Roger E. Olson, 20th Century Theology: God & the World in a Transitional Age
(Downers Grove, Illinois: InterVarsity Press, 1992), Pp.223-224.

5
shinggyim nga pra masa ni ngang ngang kang kang hte rawt galu kaba sai i? Karai
Kasang a shaman chyeju ni law law hkam la lu nga ga. Rai tim, matsan jam jau hkrum
sha nga ai ni law law naw nga nga ai. Mung masa, sut masa, shinggyim nga pra lam
ni hta n tara ai hku dip sha roi sha hkrum ai lam ni mung grai naw nga nga ai, ngu ai
gaw adan aleng rai nga ai. Yesu Hkristu shinggyim hkum hkrang dagraw let sasana
bungli galaw ai aten hta, Yuda myu ni sut su ai ni, hpaji chye ai ni, hkik hkam ai dum
nta lu ai ni nga ai sha nga; hkik hkam ai Yerusalem htingnu ni hte rai gumrawng nga
ai aten re. Shingre ai aten hta Yesu kaw si hpang gara ai ni, tsinyam tsindam hkam sha
nga ai ni, dip sha roi sha hkrum nga ai ni, shinggyim masha n sawn la hkrum ai ni hpe
shalawt la ai sasana bungli galaw lai wa sai re. Dai hte maren, Chyurum W.P sha ni,
lam magup hta lawt lu ra ai lam ni law law nga nga ai. Dai majaw, Chyurum W.P sha
ni hta hkye shalawt dat ai hte seng ai Karai masa gaw ra nan ra ahkyak nga ai.
Chyum laika hpe shadawn jit na shatai let, Latin America Liberation Theology
hta na kaja ai ni hpe jai lang; ra rawng ai lam ni hpe jahkum shatsup la nna, Chyurum
W.P sha ni a liberation theology masa hpe gin shalat jai lang ra ai. Yesu a hkye
shalawt dat ai masa hta mahta nna, Chyurum W.P sha ni a hkye shalawt ai hte seng ai
Karai masa hpe gin shalat la ra ga ai. Yesu a ladat gaw (1) Jep ai tara hta mahta nna
wuhpawng hpe gaw gap ai masa kaw na, Karai Kasang a mungdan hte Karai Kasang a
up hkang ai lam (the reign of God) hta mahta nna gaw gap ai Yuda wuhpawng shatai
kau dat ai ladat re; (2) Yubak lu ai ni hte ding hpring ai ni ngu Yuda wuhpawng hta
sawn la hkrum ai ni yawng hpe Karai Kasang a up hkang ai lam hpe hkam la shangun
nna, lak lai galai shai ai sak hkrung lam de galai shai ya ai re. Dai hku nna, Karai
Kasang a hkye hkrang la ai mahkrum madup namchyim hpe hkam la lu shangun ai
ladat re; (3) wuhpung wuhpawng ni a hkrang tara masa ni yawng mung Karai Kasang
a mungdan a kasi hte maren tsaw ra ai, tara rap ra ai, ngwi pyaw sim sa ai ngu ai lam
masa ni hte gaw gap mat wa shangun ai, ladat rai nga ai. Dai hku nna, Yesu gaw
shinggyim masha langai hkrai hpe galai shai wa shangun ai zawn (personal
transformation); wuhpung wuhpawng hpe mung galai shai mat wa shangun mat wa ai
re (social transformation). Yesu gaw shinggyim masha langai hkrai hpe yubak ngarai
kaw na hkye shalawt la nga ai sha nga; shinggyim masha shada da lapran nhkru
nshawp ai hku maw mawn ai majaw byin pru wa ai lam ni (matsan jam jau ai, dip sha
roi sha ai, n tara n rap ra ai, tsaw ra myit hte ngwi pyaw simsa lam nnga ai, shinggyim
masha a sari sadang n lu la mat ai, etc.) yawng kaw na mung hkye shalawt la nga ai
re.
Dai majaw, Chyurum W.P sha ni a liberation theology masa hta, Latin America
Liberation Theology ni lang ai Karl Marx social analysis ladat hpe ga shadawn tawn
let, anhte a htunghking ningli nga pra masa the byin nga ai lam ni hpe dinglun yu ra
ga ai. Karai Kasang a mungdan ngu ai shadawn jit na hte, tinang a Karai jaw da ai
nga pra masa (context) hte htuk manu hkra mahkri jashawn let, Yesu a shinggyim
masha langai hkrai hte shinggyim wuhpawng hpe galai shai mat wa shangun ai
(transformation) ladat hku, mung masa, sut masa, shinggyim nga pra masa ni hta
mayma shatai da, dip da, roi sha, baw daw sha hkrum ai lam ni kaw na, lawt lu ai
amyu ni tai hkra jawm gaw gap la mat wa ra ga ai. Yesu woi awn nga ai hkye shalawt
ai magam bungli hta anhte Chyurum W.P sha ni yawng shang lawm dawjau let, hkye
shalawt ai hte seng ai Karai masa (liberation theology) hpe jai lang sa wa ga law. To
God be the glory!
Ginlen shalai ai,
Rev. Dr. Lahpai Awng Li (MIT, Insein. 14.2.2016)