SIMEIKHU KARTIN CHHUAK THINGSULTHLIAH

24 Aug 2013 (INRINNI) PHEK- 2

Tst High School : GOLDEN JUBILEE HRIATRENG NAN - Lalromawia, Jt. Editor Kan hriat angin Thingsulthliah Govt. High School chuan a kum 50-na Golden Jubilee lawm turin a inbuatsaih nasa hle a. Thawktu, zirlai leh mipuite pawh kan phur tlang hle niin a hriat. He Jubilee ropui tak kan lawm tur denchhen hian rawtna pakhat tal han thailan ve ka duh a, chu chu hei hi a ni.
Kan MP(Lok Sabha) zahawm tak Pu CL Ruala Fund hmangin High School Field hung hna chu thawh mek a ni a. Hei hi duh tawk mai lovin Field pumpui hi hung chhunzawm zel tura hmalak dan ngaihtuah nise. Chutih rualin Field hung ringawt hi duhtawk mai lovin Field chhung hi hman tangkai dan ngaihtuah tel ni thei se. Hriat angin he Field hi Football Field puitling chu a ni thei hauh lo mai a. Mahse, Field chhungah hian Tennis Court te, Volleyball leh Basket-Ball Court tha tak te a siam theih dawn a. Sum erawh a ngaih belh zel ang. Thingsulthliah khua hian Public playground pakhat kan nei a, chu pawh chu kan hriat angin a la puitling lova, a diak reng a, tihpuitlin ngai tak a ni. A chunga kan tarlan tak Tennis, Volleyball leh Basketball court erawh khawiah mah kan neilo. Chuvangin, Golden Jubilee lawmna kal zelah High School Field hung ringawtah duhtawk mai lovin Court hrang hrang neih dan hi kan khawtlang hruaitute leh kan politician te pawhin ngaihtuahna-ah hmang zui zel se. Institution chhunga awm pawh nise, kan khawtlang ro a ni zel a ni tih hriain hma lak zui zel a that ka ring. A tul hunah phei chuan Pawl/Kohhran hrang hrang te pawhin Khawmpui lian dawn nan te pawh an la hmang thei zel turah ngai ila. (Chu erawh a neitute phalna lak a ngai ang a). Hmun fianrial, Noise pollution kan tih chhen pawh hi khawchhung tan a ziaawm dawn a ni. Kan High School Golden Jubilee atang hian khawtlang tana tangkai pahnih khat tal kan neih belh chuan a hlu dawn em a ni.

NI PAWIMAWH KAN HMAN DAN HI - Awmi pa Ram leh Hnamin ke a pen rualin kan sub-town pawh a kal ve zel a. Khawpui ber ni chiah lo mah ila State Capital hrul/daiah kan awm avangin, kan rama thil thleng pawh kan hriat dan a up-todate viau thei zel a, a lawmawm hle thin. Hetih lai hian Mizoram mai ni lo, India ram Ni pawimawh heng: Remna Ni, Independence Day, Republic Day etc. kan hman thin dan erawh hi chuan duhthu a sam zo lo thin hlein a lang. A bik takin, National Day bik kan hman thin dan hi duh aiin a ho lam mah mah em aw a tih theih. Kan hman dan tam berah chuan, Zingkar(Dar 7:00-7:20 am) velah B.D.O.Complex-ah Sorkar hnathawk te an ko khawm a, Chief Guest (BDO) in hnam puanzar pawt pharhin School pakhat naupangin National Anthem an sa a, thuchah pawimawh tak tak ngaihthlak hnuah thingpui leh chhang eiin Sweet te sem thin a ni a, nimin piah lawkah pawh hei hi India Independence Day kan hman dan a la ni zel a ni. Sawrkar Department Head hrang hrang leh Sub-town V/C kalkhawm ten BDO hova an rel a ni a, sawisel phak rual chu a ni hauh lo. Amaherawhchu, heti teh ngawt lo deuh hian hman dan a awm thei ang. Chief Guest thusawi a pawimawh em em a, mahse hretu an tlem em em si a. School naupang khawm kim theih hun ber turah School pakhat bakin item a neih theih loh a, hetiang a nih chuan India ram ni pawimawh hian Naupang thinlungah hmun pawimawh a luah a beisei awm loh. Chuvangin, tun aia huap zau leh sei deuh hian hman ni thin ta se. Item eng emaw berah Sub-town huapa inelna te buatsaih ni ta se, a nih loh pawhin a hma lamin Football Tournament te buatsaihin Final match khelh nan te hmang ila. Vantlang mipui khawm a harsat pawhin Zirlai te kim takin ko kal ila. Flag-hoisting leh School naupang ten March-past te nei thin se, hetianga Khawtlang huap leh nghawr zawnga kan hman fo chuan kan ni pawimawh te hlutna leh kan ram leh Hnam tana rim taka lo beitute hian thuk zawkin mi rilruah bu a khuar ngei ang. Kan hman liam tawhte chu lo liam ta se, kumdangah chuan heti teh tlawng lo deuh hian hman dan ngaihtuahin, roreltute pawhin ngaihtuahna thar hmang se a duhawm hle a ni.// TLANGNUAM ANTI-TOBACCO COMMITTEE NGENNA Kan lo hrisel zawk theih nan leh mite tana hnawksak kan nih lohna turin mi zawng zawngte Vaihlo leh a kaihhnawiha inthiarfihlim turin kan ngen a. Heng puipunna hmun Damdawiin, Zirna In, Office, Committee Building, Bazar, Community Hall, Khelmual, Hotel, Restaurant, Maxi Cab, Taxi, Auto-Rickshaw, Bus, Taxi Stand, Bus Stand, Bus Station, Airport, Auditorium, Shopping Mall te leh mipui pun khawmna hmun reng rengah ti lo turin kan ngen tak meuh meuh a ni. Heng hmuna meizuk hi Section 4 COTPA 2003 chuan a khap tlat a ni. Mimal tinte hian boruak thianghlim(Fresh air) hip hi kan chanvo(right) a ni tih hria ang u. Sd/- Lalthangmawia Sd/- K. Lalchhanhima Secretary Chairman Anti-Tobacco Committee: Tlangnuam. UI NEITU TE HNENA NGENNA Thingsulthliah Village Council hruaina hnuaiah kan khawtlang a lo fai a, a lo thianghlim leh hrisel zawk nan MUP Unit I & II te chuan Ui zawn hna a kalpui mek a. Zanah leh zingah leh chhunah te a remchan angin a kalpui zel dawn a ni. Ui neitu ten mahni ui tha taka khuahkhirh turin kan ngen tak meuh che u a ni e. Kan ngenna min tihhlawhtlin sak chuan kan lawm em em ang. Sd/- F.Rohmingthanga Sd/- H.Lalruala Secretary Chairman Mizoram Upa Pawl, Joint Committee, Thingsulthliah.

M.P. FUND HNA THAWK NGAWRH Thingsulthliah High School Golden Jubilee lawmna denchhen atana Pu C.L.Ruala, MP(Lok Sabha) in a Fund atanga Cheng Nuai 10 a pek hmangin Tst H/S Field hungna(Boundary Wall) 100 mtrs a thui siam hna chu ngawrh takin kalpui zel a ni a. Vawiin hian hna zualpui chu zawh hman beisei a ni. Boundary Wall RCC Plaster an zawh fel
vek hnuah rawng hnawih leh tur a ni ang.

MLA FUND HNA THAWK ZO

Tst H/S Golden Jubilee lawmna denchhena School hmalam hungna tur Bialtu MLA & Home Minister in a Fund atanga Cheng Nuai khat a pek hmangin School hmalam chu Angle-Rod(ban) leh thirlen hmangin tunkar khan hung zawh a ni.