Sei sulla pagina 1di 12

MUSIC ZIR ILA..

RI KALPHUNG DIATONIC SCALE Music zir dawna hriat tur pawimawh tak pakhat chu ri indawt dan (Diatonic Scale) hi a ni a, ri indawt dan hi chi hnihin then a ni a, chungte chu Standard Scale leh Relative Scale te a ni.Tunah in lo bih chiang teh ang. Standard Scale Relative Scale Number Solfa Cd1 Dr2 Em3 Ff4 Gs5 Al6 Bt7 Khing a chunga kan sawi takte khi a chung lam atanga chhiar thlak khian a key a sang thla tial tial a. Khi tiang khi ri indawt dan chu a ni a, Instrument i hman dawn pawhin a chung ami ang khi a key san dan indawt a ni nghal tih hria ang che. NOTE Music-a ri san zawng inang lo chhinchhiahna hrang hrangte hi Note an ti. d, r, m, f, s, l, t, or C,D,E,F,G,A,B te hi Note chu an ni. OCTAVE A chunga kan sawi - ri bu khat / hlawm khat, ri indawt dan a bul atanga a tawp (Note7) thleng khi Octave chu a ni. Tichuan C atanga B leh d atanga t thleng khian Octave khat chu a ni. CHROMATIC SCALE Chromatic Scale-ah chuan ri (note) 12 octave khatah a awm a, ri pangngai (natural note) 7 leh ri kartla (non- natural note) 5 a awm. Heng a hnuai ami ang hi a ni. Standard Scale Relative Scale Cd C# - Db de - ra Dr D# - Eb re - ma Em Ff F# - Gb fe - ba Gs G# - Ab se - la Al A# - Bb le - ta

Bt Music Zirna 3 Note : Chromatic Scale-a ri kar tla (non-natural note) awmte lam dan chu hetiang hi a ni. C# = C Sharp Db = D Flat D# = D Sharp Eb = E Flat F# = F Sharp Gb = G Flat G# = G Sharp Ab = A Flat A# = A Sharp Bb = B Flat de = di ra = raw re = ri ma = maw fe = fi ba = bei se = zi la = law le = li ta = tha INTERVAL Interval chu note pahnih inkar hlat zawng sawina a ni. A chunga kan tarlan d leh r inkar te, C leh D inkar te khi Interval chu a ni. ACCIDENTAL Eng note pawh hi a awmna pangngai atangin a sang zawngin emaw, a hniam zawngin emaw a tihdanglam theih a, hetianga tih danglam hi Accidental an ti. RI PUITLING (Whole Note / Full Tone) Ri inthlauh danah hian a note a zira inthlau thui deuh leh tawi deuh a awm thin a. Ri pangngai / ri puitling hi Whole Note or Full Tone tiin an sawi thin. A chung ami r, m, s, l, t -te khi ri puitlingte chu an ni. RI CHANVE (Half Note / Semi Tone) Ri puitling tling phalo ri puitling chanve ho hi ri chanve (Half Note/ Semi Tone) tiin an sawi thin. A chung ami d leh f te khi ri chanvete chu an ni. A awmzia chu m leh f inkar hi ri chanve a ni a, t leh d inkar pawh hi ri chanve chauh a ni tihna a ni. SHARP (#) Ri pangngai / Note thut hmun pangngai atanga ri chanvea sang hi Sharp chu a ni. Entirnan, C key chu ri chanvea kan tihsan chuan chu key chu C Sharp (C#) a ni, chutiang zelin a dang pawh. DOUBLE SHARP ( X ) A nihna pangngai atanga ri chanve pahnih / ri puitlinga tihsan hi Double Sharp chu a ni. C key chu ri chanve pahnih / ri puitlinga kan tihsan chuan D key a lo ni tawh ang a, D key chu CX tihna a nih chu. Chutiang zelin a dang pawh.

FLAT (b) Ri pangngai / Note thuthmun pangngai atanga ri chanvea hniam hi Flat chu a ni. Entirnan, D key chu ri chanvea kan tihhniam chuan chu key chu D Flat (Db) a ni, chutiang zelin a dang pawh. DOUBLE FLAT (bb) A nihna pangngai atanga ri chanve pahnih / ri puitlinga tihhniam hi Double Flat chu a ni. D key chu ri chanve pahnih / ri puitlinga kan tihhniam chuan C key a lo ni tawh ang a, C key chu Dbb tihna a nih chu. Chutiang zelin a dang pawh. Note : Sharp, Double Sharp, Flat leh Double Flat-te hi Standard Scale-ami sawina a ni a, Relative Scale-ah chuan hming bik an nei vek. NATURAL ( ) Note pangngai atanga tih danglam hnua Note ngaiah bawk letlehna hi Natural a ni. Natural sign ( ) a awm reng reng chuan Note ngaiah let leh tur tihna a ni. TECHNICAL NAME Thiamna peng hrang hrangte hian anmahni bikah chuan thil sawina bik, thil danga hman ve loh tawng bil an nei thin a, chutiang chu Technical name a ni. Music hian Chord-ah te, harmonization chungchangah te, instrument hman dan chungchangahte technical name bik a nei a, chung Technical name-te leh a hman dan chu lo sawi ila. 1 d C Tonic 2 r D Super Tonic 3 m E Mediant 4 f F Sub-dominant 5 s G Dominant 6 l A Submediant 7 t B Leading Note/Tone A HMAN DAN Relative Scale-ah chuan hla key (root note) apiang kha Doh a ni mai a, hla key a danglam apiang khan Doh awmna kha a danglam ve zel mai a ni. Chuvang chuan Doh chu Tonic a ni reng a, Ray pawh Supertonic a ni reng a, Me pawh Mediant a ni reng a, chutiang zelin a dang pawh eng key-ah mah a danglam ve ngai lo. Chuvang chuan Relative Scale-ah chuan chhinchhiah a awl bik em em a ni. Standard Scale-ah ve thung chuan a Key (Root Key) apiang kha Tonic a nih zel avangin hla key a danglam apiangin Tonic a danglam

ve zel. G key a nih chuan G kha Tonic a ni a, E key a nih chuan E kha Tonic a ni a, B key a nih chuan B kha Tonic a ni leh mai, chutiang zelin a dang pawh Tonic atanga chhiar chhohvin a hming chu vuah chhoh zel mai tur a ni. Heng Technical name-te hi Chordah lo sawi ta ila, C key-a kan zai chuan C chu Tonic a ni a, D keya kan kal chuan Supertonic chord-ah kan kal tihna a ni a, F-a kan kal chuan Subdominant-ah kan kal tihna a ni. Chutiang zelin a dang pawh a chhut vek theih a ni. **********************************

LESSON - 3
MUSICAL TERM & SIGN METRONOME Music ran leh ran loh tehna hmanrua a ni a, thil inkhawng ti tlek tlek tih muana tihran theih chi a ni. Metronome chu minute khata a rik zat sawina a ni. Entirnan, Electronic Keyboard-ah chuan metronome kan on chuan thil in khawng ri tlek tlek a awm thin a, kha in khawng ri kha 120 velah lo dah ta la, minute khat chhungin vawi 120 a in khawng ri hman dawn tihna a ni. TRANSPOSE Hei hi a key sanna/hniamna a ni a, entirnan Keyboard hmangin hla Doh is C chauhin beat thiam ta la, key danga tih danglam a lo ngaihin Transpose atanga tih danglam tur a ni. Keyboard-ah Transpose tih a lo in ziah chuan a key sanna leh hniamna a ni tih hriat tur. MODULATION Music chu ri/note hrang hrang in rikchhawk kual reng a ni a, chung vir kual vel a thluk inthlak danglam chhen te chu Modulation kan tih chu a ni. SOPRANO/TRIBLE/AIR Hei hi hla sak dan pangngai, a cheimawitu ni lo hi a ni. Solfa-a a tlar chung ber hi a ni. Hmeichhiain an sak chuan Soprano tih tur a ni a, mipain an sak chuan Trible tih tur a ni a, Instrument hmanga tum/sak a nih chuan Air tih tur a ni. CONTRALTO/ALTO Hei hi hla cheimawina part chi khat a ni a, solfa-a a tlar hnihna hi a ni. Hmeichhiain an sak chuan Contralto tih tur a ni a, mipain an sak chuan Alto tih tur a ni. SLUR/IRREGULAR SLUR Tonic solfa note pahnih emaw pathum emaw a hnuaiah rin phei a lo awm chuan Slur a ni. Hetianga a lo awm chuan a note hmasa ber chauh kha sak tur a ni a, a note rin zawm dangte kha chu a

note awm a zirin thluk tur a ni. Rin pangngai ni lo chhunhan phei thliah thliah a lo awm chuan Irregular slur a ni a, hla chang hrang hrang a thu a in tam hleihin an hmang thin. A thu tam zawkah chuan slur lohvin a kal a, a thu tlem zawkah chuan slur-in an kal tir thin. DOUBLE BAR ( \\ ) Hei hi Tonic Solfa-ah a chang tawp chhinchhiahna a ni a, a note tawp ber kha a mawi tawk, a vuak awm bak pawh thluk theih a ni. FARMATA/PAUSE Hetiang sign hi a chungah a lo awm chuan a awmna zawn chu duh chen chen thluk theih tihna a ni a, a letlinga a awm pawn a danglam chuang lo, a inang reng tih hriat tur a ni. DA CAPO (D.C) Da Capo hi Italian tawng a ni a, Note chungah D.C a lo awm chuan D.C tih atang khan a bulah kan let leh ang a, kha note kan sak nawn hmang khan a hla thu erawh a hmabak kan sa chho zel ang. Note chunga Fine tih inziak a awm thlengin sak tur a ni. DAL SEGNO (D.S) D.S tih inziak atangin Segno sign ($) ah kir a, chuta tang chuan music ngai hmangin a thu hmabak sak zawm tur. FINE A tawpna turah dah thin a ni. Sign a nei hran lova note chungah Fine tih a lo inziak mai thin. Hla tluang pangngaiah dah a ni ngai lo va, let lehna (D.C, D.S) a awmin music tawp ber ni lo, a laklawha hla a tawpin dah thin a ni. REPETITUM (://:) Repetitum sign note chunga a lo awm chuan a chhinchhiahna awm zat hi a thu sak nawn tur a ni. PODIUM/ROSTRUM Zaipawl hruaitu (Conductor) din kanna dawhsan hi a ni. Englandah chuan Rostrum tih hi an hmang lar zawk. BATON Zaipawl/Orchestra kaihruaitu (Conductor)-in an hman thin tiang hi. Kan hriat awlsam theih nan Solfa veina tiang hi a nih chu. CAPO Guiter bana an vuah/hren chi, a key tihsan nana an hman thin hi a ni. Capo hi chi thum a awm a - String Capo, Nylon Strap Capo leh Crew Capo-te a ni.

PLECTRUM Plectrum chu tingtang hrui thai/perh rikna Plastic phek te tak te hi. SLIDE Guiter hmehna lam panga kut zungtanga an vuah thin, Guiter hrui nawh nana an hman thin hi a ni. GUITER EFFECT Guiter ri tihdanglamna hmanrua a ni. Kan effect hman a zirin kan Guiter ri kha a ri tliang emaw, a ri teng emaw, chi hrang hrangin a siam danglam theih a ni. ACCAPELLA Music tel lova mihring aw hlanga zai. A hanga zai a nih ber chu. ORCHESTRA/ORCHESTRE/ORCHESTER Music Instrument hrang hrangin a huhova hla an rem. CHEST NOTE Hei hi Relative Scale-a a ri hniam lam d atanga f thleng hi a ni a, heng note-te hi kan sak chuan kan aw chhuak chu pum, awm leh hrawk nena tangkawpin kan sa tur a ni a, kan hrawk chu a inhawng zau tur a ni. HEAD NOTE Hei hi Relative Scale-a a ri sang lam f atanga chung lam pang zawng hi a ni. Heng note-te hi kan sak chuan hrawk leh hnar hmanga sak tur a ni a, aw fiaka sak chi a ni. ROOT NOTE/KEY Root note or Root key kan tih ber chu a key nei tu kan sawina a ni. Entirnan, C chord kan hmeh chuan C, E leh G hmeh a lo ngai a, heta a key kengtu ber chu C a ni a, Relative scale-in lo sawi ta ila, Major Chord chu d, m, s a lo ni ta a, a Root note chu d hi a ni.

*************************
CHORD LAK DAN Music thiam tak tak tur chuan chord lak dan hi thiam ngei ngei a ngai a. Mi zai i rem sak dawn emaw sound track i siam dawn emaw anih pawhin i thiam ngei ngei a ngai a ni. Zaipawl hla Tonic Solfa hla i rem dawn phei chuan a pawimawh leh zual a. Chord lak dan hi i man fuh laklawh tawh chuan a hla thluk i la hriat miah loh pawh a solfa atangin a chord kal dan tur i ziak zung zung thei dawn a. Chuvangin kan sawi tur hi ngun takin en la, bel taka thiam tum ang che.

CHORD Chord chu ri chi thum emaw a aia tam emaw a ruala inchawih taka tih rik hi a ni. Chord hi chi hrang hrang tam tak a awm a, hla pakhat (tluangtlam deuh) rem nan hian a vai chuan kan hmang vek ngai lova, kan hman tlang lawn deuh deuh kan hriat tawk vel tur chu hengte hi a ni. 1) Major 2) Minor 3) Dominant 4) Sub Dominant 5) Seventh ( 7th ) 6) Relative Minor 8) Supertonic 9) Leading note flat 10) Diminish 11) Augment MIZO STANDARD SCALE Mizo hian music chord hi a key hminga sawi lo hian sawina hming hran bik kan nei a, hnam dang hian hetiang chiah hian an tih ve leh ve loh phei chu ka hre lova, thenkhat laiah chuan mizo sawi dan hi a remchan riauna lai a awm ve bawk. Chutiang Mizovin a chord hming kan sawina chi hrang hrangte chu kan hriatthiam theih nan Mizo Standard Scale kan vuah ve ngawt a. Mizo Standard Scale hi Root chord atanga teh a ni thin. Standard Scale kan sawi ang tho hi hming hran kan hriat thiam theih tur zawngin kan lo pe a, chumi sawina chu a ni ber. Mahse chord tam tak erawh kan nei lova, kan hman tlanglawn deuh thin, kan hlain a mamawh tawk chord ho chiah kan hriat thin avangin chutiang key tlemte chauh chu Mizo Standard Chordah hian a awm a ni. Tihian lo sawi ta ila. 1) Major Chord (Root key) = A key 2) Relative Minor Chord = A key lai 3) Dominant = A key hniam 4) Supertonic = A key hniam hniam leh 5) Sub-dominant = A key sang 6) Leading note flat = A key sang sang leh MAJOR CHORD Major chord kan tih chu kan hriatthiam dan tur zawngin sawi ila a key pangngai hi a ni. Major Chord = d, m, s (1,3,5) Piano/ Keyboard-ah chuan i zaina tur key kha A a lo nih chuan Aah tak khan i hmet ang a, A kha Doh (d) ah hmangin Soh (s) thleng i chhiar chho ang a, d,m,s kha i chhinchhiah bik ang a. Tichuan A Major key i hmeh dawn chuan d,m,s kha i hmet mai dawn a ni. Chutiang zelin a dang pawh. Tonic Solfa-ah part hrang hrangah d,m,s a awm chuan Tonic Major key (Root Key) hmeh tur tihna a ni. Tin, number zawng pawhin a chhinchhiah theih bawk

a, number solfa chuan 1,3,5 a ni leh mai. SUB-DOMINANT CHORD Mizovin a key sang kan tih mai hi a musical term chuan SubDominant a ni. Sub-dominant chu Tonic atanga 4-na zel kha a ni kan tih tawh kha. Tichuan f chu Sub-dominant tihna a lo ni ta a, f Major chord kan hmeh khan Sub-dominant chord kan hmet tihna a nih chu. Sub-Dominant Chord = f, l, d (4,6,1) I zaina tur kha A key a lo nih chuan A key kha Doh-ah hmangin chhiar chho la, f,l,d kha chhinchhiah bik la, tichuan A key sang (Sub-dominat) i hmeh dawn chuan f,l,d kha hmet mai rawh. Tonic Solfa-ah part hrang hrangah f,l,d a awm chuan Sub-dominant (a key sang) a kal tur tihna a ni. Standard Scale-in lo sawi ta ila, Root key atanga 4-na zel kha Sub-dominant chu a ni mai. Entirnan C chu Root key/Tonic a nih chuan C atanga 4-na chu F key a ni a, tichuan, C Subdominant chu F tihna a ni. Chutiang zelin a dang pawh a chhut chhuah theih vek a ni. Bung hmasa lama Scale table kan siam ang khan. LEADING NOTE FLAT CHORD Leading note Flat Key hi mizo chuan a key sang sang leh kan tih ang hi a ni. Entirnan, A key sang chu D key a ni a, D key sang leh chu G key a ni. A key hming i hriat duh chuan Dod atanga chhiar chhoh va ta kha a ni. A number zawng chuan 7b a ni. Entirnan, C kha tonic key a lo nih chuan Leading note flat chu Bb a lo ni a. Tichuan C key sang sang leh chu Bb key tihna a ni. Chutiang zelin a dang pawh. Leading note flat Chord = ta, r, f (7b, 2, 4) Key dang pawh a zawn chawp zel theih a, a chung ami ang khian a hriat theih zel a ni. C atanga chhiar chhohva 7b chu Bb a ni a, D atanga chhiar chhoh 7b chu C a ni. Chutiang zel chuan a zawn chhoh zel theih a ni. DOMINANT CHORD Dominant chu Tonic atanga chhiar chhohva a 5-na kha a ni a, mizo chuan a key hniam kan ti mai. Tichuan, d atanga chhiar chhohva a 5-na chu s a ni a, s key hi dominant key tihna a ni. Dominant Chord = s, t, r (5,7,2) Tonic Solfa ah s,t,r a awm chuan Dominant key-ah kal tur tihna a ni. A key hming i hriat duh chuan tonic atanga chhiara a 5-na zel kha a ni. Entirnan, C key atanga chhiara 5-na chu G key a lo ni a, tichuan G key chu C key hniam tihna a ni.

SUPERTONIC CHORD Hla kan sakin a key hniam hniam leha kal ngaih hun a lo awm thin a, chuvang chuan a key hniam hniam leha kal hun leh hmeh dan tunah lo sawi ve leh ila. A key hniam hniam leh chu Tonic atanga chhiara pahnihna kha a ni. Supertonic Chord = r, ba, l (2,5b,6) Key dang ang lo takin sawi fiah a ngai tlat mai, kan hriat tur chu Soh kha ri chanvea kan tih hniam khan sa ti lovin ba tiin an sawi thin. Tin, a Root key chu r khi a ni a, C key a nih chuan r chu D key a ni a. Tichuan C key hniam hniam leh chu D key tihna a ni. E key hniam hniam leh chu Gb, G key hniam hniam leh chu A. E leh F, B leh C key chu ri chanve chauhvin an inthlau va, ri puitlinga chhiar chhoh zel a ngaih avangin Gb leh Db a awm a ngai a ni. Chutiang zelin a dang pawh siam rem zel mai tur a ni. MINOR CHORD Hla thenkhatah Minor chord-a luh zeuh ngaihna lai a lo awm ve leh thin a, tin, Minor hla hrim hrim a awm bawk. Minor-a luh zeuh hian sak a tinuamin a nalh duh em em a. A hmeh dan chu hetiang hi a ni. Minor Chord = d, ma, s (1,3b,5) Minor Chord chu Major Chord tih danglam hret kha a ni mai a, d,m,s-a m kha ri chanvea tihhniam a ma-a dah khan Minor chord tihna a ni. RELATIVE MINOR/SUBMEDIANT MINOR CHORD Relative Minor hi mi tam takin Minor Chord nen kan sawi pawlh thin, mahse Minor chord tih ringawt a nih chuan a eng key pawh kha huap theih avangin Submediant minor chord tiin sawi ila a chiang deuh zawk awm e. Relative Minor Chord kan tih hi Mizovin a key lai kan tih mai hi a ni a. A hmeh dan chu hetiangin. Relative Minor Chord = l,d,m (6,1,3) Relative Minor chu Submediant Minor Chord a ni a, chutih a nih chuan C hi tonic a nih chuan submediant chu A a ni a, C relative Minor chu A minor tihna a ni. Relative Scale zawnga kan sawi chuan Lah (l) minor chord tihna a ni leh mai. SUB-DOMINANT RELATIVE MINOR/SUPERTONIC MINOR CHORD Sub-dominant (A key sang) Relative Minor chu Supertonic minor a ni a, a hmanna tur tunlai hlaah chuan a tam ta mai, mahse a key hniam hniam leh (Supertonic) hman hun nen hian a in hnaih em avanginn hman zawk tur hriat a har thei hle. Tonic Solfa a nih lem

loh chuan a nalh zawk zawk hman mai tur a ni. Sub-dominant Relative Minor Chord = r, f, l (2,4,6) DOMINANT RELATIVE MINOR/MEDIANT MINOR CHORD A key hniam Relative minor chord chu Mediant minor chord a ni bawk a, A hman hun leh a hmeh dan chu hetiang hi a ni. Dominant Relative Minor = m, s, t (3,5,7) Relative Scale-ah chuan Mediant chu me kha a ni mai a, tichuan mediant minor a nih chuan m minor chord tihna a ni mai. Standard Scale zawngin lo sawi leh ta ila, C Tonic a nih chuan mediant chu E key a ni a. Tichuan C key hniam Relative minor chu E Minor tihna a ni. SEVENTH (7TH) CHORD Seventh Chord hi hman hun a awm zeuh zeuh avangin hriat chian a ngai hle a ni. A hmeh dan tur chu hetiang hi a ni. Ta hi a ti sevent tu tak chu a ni. Seventh Chord = d, m, s, ta (1,3,5,7b) DOMINANT 7TH CHORD Dominant 7th chord hi hman duhna a awm ve leh zeuh thin a, signal-ah a tangkai em em bawk. f hi a ti sevent tu tak chu a ni. Dominant 7th chord = s,t,r,f (5,8,2,4) AUGMENTED CHORD Augment Chord hman hun leh a hmeh dan chu Major Chord (d,m,s) tlema siam danglam deuh hret a ni a, s khi note chanvein kan tisang hret ang a a ni mai. Augment Chord = d, m, se (1, 3, 5#) DIMINISHED CHORD Diminished Chord pawh Major chord (d,m,s)-a m leh s hi ri chanvein kan tihniam ve ve ang a, chu chu Diminished Chord chu a ni leh mai. Diminished Chord = d, ma, ba (1, 3b, 5b) MAJOR SEVENTH/MAJOR SIXTH Major seventh chu seventh tlema tihdanglam a ni. d,m,s,ta (1,3,5,7b) kha d,m,s,t (1,3,5,7) a kan tihdanglam khan a ni mai. Tichuan Major sixth Chord pawh d,m,s,l (1,3,5,6) a ni leh mai. MINOR SEVENTH/MINOR SIXTH Minor Seventh chu Minor Chord-ah khan a ti seventh-tu tur ta kan belh ang a, tichuan minor seventh a lo ni ang. Hetiang hian

d,ma,s,ta(1,3b,5,7b). Minor Sixth ve thung chu Major Sixth kha Minor Chord-in kan siam ang. Tichuan d,ma,s,l (1,3b,5,6) a ni. Tichuan hriat a awlsam zawk nan tihian Chord chart lo siam ta ila. THREE CHORD THEORY Hla beat tluangtlam, chord thum leka sak mai theih chi a awm a, chutiangah chuan major chord thumah a key kan thlak kual thin. Hetiang hi Three Chord Theory an tih chu a ni a, Primary Chord an ti bawk. Three Chord Theory-ah chuan Tonic, Sub-Dominant leh Dominant Chord-te hman thin a ni. Dominant Chord-ah hian 7th an hmang thin. FOUR CHORD THEORY Three Chord Theory ami bak, tonic atanga a 6-na (Sub-Mediant Minor/Relative Minor) Chord kan hman belh leh hian Four Chord Theoy an ti leh a ni. Four Chord Theory hi Secondary System an ti bawk. Relative minor hi Mizovin a key lai kan tih thin hi a ni. VUAK ( BEAT ) A Chord tluka pawimawh dang leh chu a vuak hi a ni a, hla reng reng a vuak a dik tawk loh chuan sak a hahthlak bik a, a vuak bikim hla reng reng chu sak a hahdamin music siam pawh a nuam bik. Tin, a vuak hi i thiam chian loh chuan Solfa chu sawi loh music-ah i lut thuk thei ngai lovang. Drumset vaw tur phei chuan i buaina a zual ting mai dawn a ni. Chuvangin hla beat kengtu ber chu Drums a nih avangin Drumer tan hriat chian a ngai leh zual. A VUAK ZAT CHHIAR DAN A vuak zat chhiar dan Tonic Solfa atangin lo sawi ta ila, Tonic Solfa-ah chuan Barpui, Barte leh Colon a awm a, heng ho hi a vuakte chu an ni a. Barpui atanga chhiar tana Barte leh Colon-te chhiar tel vekin Barpui awm leh hma zawng a mi kha chhiar thin tur a ni. Entirnan :1) \d :r = Vuak hnih 2) |d :r :m = Vuak Thum 3) \d :r |m :f = Vuak li 4) \d :r :m |f :s :6 = Vuak ruk A Chord lak dawn reng rengin Barpui, Barte leh Colon ami lak thin tur a ni a, chuvang chuan Chord leh Beat hi a inkungkaih tlat a ni tih hriat tur a ni. VUAK CHANVE Vuak chanve chu vuak khat thenna a ni a, vuak leh vuak inkar lai taka awm hi a ni. A chhinchhiah nan chuan fullstop (.) an hmang thin. Vuak chanve reng reng chu khaia lak tur a ni.

Entirnan, \d .d :d HMUN THUMA THEN Vuak khat hmun thuma then chhinchhiah nan chuan comma pahnih hman thin a ni. Entirnan \d ,d ,d :d HMUN LIA THEN Vuak khat hmun lia then chu vuak chanve chhinchhiahna sir ve veah comma dah belh a ni mai. Vuak khat chu hmun hnihah i then a, vuak chanve ve ve pahnih a lo ni ta a, vuak chanve pahnih chu i then leh ve ve a, vuak chanve veleh a lo ni leh a, tichuan, vuak khat chu hmun liah i lo then tihna a ni. Entirnan, \d ,d .d ,d :d ACCENT CHI HRANG HRANG Barpui = Strong accent (Uar taka sak tur) Bar te = Medium accent (Aw laihawla sak tur) Colon, Vuak chanve = Weak accent (Uar loh tur) A VUAK ZAT HRIAT THEIH DAN AWLSAM Hla reng reng a vuak zat awlsam takin a thluk atangin a hriat theih a, Tonic Solfa-a awmsa kher lo pawh Solfa emaw Sound Track emaw i siam dawnin a thluk a zirin a vuak zat awlsam deuhin a hriat theih a ni. A vuak zat a zirin Metronome te, Quantize te hman a nih thin avangin a vuak zat hriat hi Musician tan a tangkai em em a ni. 1) Vuak hnih / li = Mizo lengkhawm hla thluk, khuanghniha kan rem theih chi reng reng hi vuak hnih hla emaw vuak li hla emaw an ni tlangpui a, Country music, Raggae, Rock kan tih ho zawng zawng pawh hi vuak hnih emaw vuak li hla emaw an ni deuh vek.Vuak li leh vuak hnih hla hi hriat hran an har em em a, eng emaw laite chauh a inan loh avangin music nen lo chuan hriat chian a har hle. 2) Vuak thum / ruk = Hman lai mizo tingtang perh thiamho beat dan Thing rup rup Style-a kan beat theih hla reng reng hi vuak thum emaw vuak ruk hla emaw an ni deuh vek bawk. Vuak ruk leh vuak thum hla hi hriat hran an har hle, a tlangpuiin vuak thum hlaho chu a muang deuh.

Potrebbero piacerti anche