BMA AW

An Official Organ of The Bangalore Mizo Association Registered Under Societies Act of Karnataka No.: BLU-S188-2007-08 Date 7 May 2007
Vol. XVIII Issue No.30 Bangalore Mizo Association Pathian Nitin Chhuak Chanchinbu Date: 04th Nov., 2012 Phek Khatna

TUALCHHUNG
$$ Vice President haw dawn Bangalore Mizo tlangval zinga hriat hlawh ber pakhat, Bangalore Mizo khawtlang leh kohhrana mi tangkai tak Tv. Emanuel Lawmkima, BMA Vice President ni lai mek chu, chhungkaw mamawhna avangin tahrikni 6, karleh thawhlehni hian Mizorama haw hlen turin Bangalore a chhuahsan dawn ta. Tv. El-a hi kan uiin, a hma hun zelah duhsakna kan hlan e. $$ Naute thar nei Hun rei tak chhung BMA member ni tawh thin Pu Paul Lalchhanhima te nupa chuan fanu duhawm tak an nei a. Kan lawmpui e. $$ Calvin-a te unau an dam Kan member, Rev. Dingluaia fapa te pahnih damlohna avanga damdawi in lut chu, kar hmasa khan dam takin an chhuak ta. Chutih laiin, an pa ber Pu Dinga erawh a dam tha vak lo thung, I tawngtaipui ang u. $$ Pi Machhuangi a dam zel Kan member, Pi Machhuangi, Rev. Lalawmpuia Hauhnar nupui pawh Dengue fever avanga a dam that loh hnuin, hma a sawn ve zel a. Tin, Pu Awmpuia pawh a dam tha vak lo bawk. Kan tawngtainaah Rev. Awmpuia te chhungkua I hria ang u. $$ Pi Lily Dalpati Mizoramah Kan member Pi Lily Dalpati dam tha lo pawn hma a sawn ve zel a. A nu leh pa (Pi Amawii leh Pu Hmaa) te pawh Bangalore-a lo kalin, November ni 7 hian Aizawl an pan ang.

Hnawmhnawk Khawpui!
Mizo tlemte hian tihtheih kan nei ve lom ni?
Kamkeuna Thufing chuan, Fai hi Pathian kan an teuhna ber a ni a ti mathlawn lovin, hnam leh ram changkang kan tih apiang te hian faina hi an ngaihlu a, an nunpui zel bawk thin. Mizo te hi kan taksa leh incheina kawngah chuan kan theih ang tawkin kan inuluk a, thenkhat phei chu an phak loh hial khawpa incheina duhtui te pawh an awm awm e, mahse chu lam erawh kan sawi tum a ni lo. Garden city Bangalore khawpui, India ram khawpui zinga thangchak leh sik leh sa nuam em em, mi tam takin chenna, zirna leh hnathawhna atan a awh ngawih ngawih, Garden city tih ngat an koh thin chu, tunlaia chanchinthar kan hriat nen chuan a inpersan hle. Khawpui mawi tak nia hriat thin kha Garbage city- Hnawmhnawk khawpui tia larin, India ram chanchinbu hrang hrangah kan hmu ta a nih hi. Tih theih kan nei! Nia, bawlhhlawh paihpui emaw, tuallai phiah faisak emaw kan ti thei lo. Mahse, kan thil eina, keimahni atang hnawk awm tur reng reng hi a paihna tur dik takah paih zel ang u hmiang. Biak In/Hall/hmun engpawh kan hman reng rengin, a neitu te tana hmuh nuam turin kan sulhnu awm thin se. Pasaltha Vana Pan, buk/thlam an riahna an kalsan dawna fai tak leh fel taka a kalsan thin ang khan, midang chuan bawlhhlawh lo paih fimkhur lo mah se, keini kan fimkhur chuan, kawng engemaw talin kan chenna khawpui hian hma a sawn ngei ang. Nangmah, I incheina leh I bul leh a vel a fai em? *******************************************************************

2012Chhinlung Magazine 2012-2013

Bangalore Mizo Association ten, kum tina hmalakna lian tak kan kalpui thin, Mizoram leh hmun danga Mizo awm te hnena kan hmalakna kawng hrang hrang te, Zonunmawi kan chhawmnun dan te kan tarlanna bulpui ber Chhinglung Magazine chhuah turin Editorial Board thar ten hma an la leh tan ta. I thu leh hla thulkhung chu han chhawp chhuak la, Chhinglung magazine-ah hian han tarlang ta che. I vei zawng, ram leh hnam a ni emaw, khawtlang nun leh nangma mimal nun pawh ni se, midangte tana tangkai thei tura I hriat ngei phei kha chu a hlu leh zual ang, rawn che vat rawh le. Tin, naupang te tan pawh lemziak, hla emaw thuziakna remchang a ni bawk. Bangalore Mizo te hian eng ang talent nge kan neih reng reng? tia Mizo hmun hrang hrang te hnena pholang turin member tin ten kan theihtawp I chhuah tlang teh ang u.

Vol. XVIII Issue No. 30 Bangalore Mizo Association Pathianni Nitin Chhuak Chanchinbu Date: 04th Nov., 2012 Phek Hnihna
Editor Dr. Lalhmingmuana Sailo Joint Editors Tv. Lalmuanzuala Tv. MC Zirsangzela Circulation Managers Nl. R. Lalnuntluangi Nl. Laltlankimi Hmar Tv. Samuel Khawlhring Nl. Vanlalnghaki BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

PALAI RINAWM NI TURIN - I

Carey Sailo Duh thuhmun chu an inkawmngeih tlangpui tih leh Mize inang deuh a inkawmngeih theih loh tih tawngkam pahnih hi kei leh ka thianpa chuan kawi khat pawh awm lovin ngil taka zawmin kan in zui chawt hi a ni ber a. Kan pahnih ro roah pawh hian kei a sawitu, ani a ngaithla tu. Kan thurel dun reng reng ah pawh a duh lo zawng pawh ni mah se I tih te chuan ni mai e tih thla diam ang chi hi a ni, ka thianpa chu; thurelpui nuam tak a ni. Kan duhzawng lah nih se tlai nula chhuahpui aia basketball khelh thlang thin leh, zan lama rim chhunzawm a, an hmui leh thil dang khalh kual aia FIFA games-a keyboard leh joypad khalh thlang thin zawk kha kan nia, nula lamah chuan kei hi ka lak tlak zawk fe leh nghal a, a chhan chu vawikhat ka bialnu ni ve tep ka bazaar pui ve tawh a! An va chhe thian dun awm ve te pawh inlo ti maithei a, mahse kan chhiat vang a ni lo, bialnu kan neih loh chhan hi; kan ngaihsak loh mai bakah ka thianpa phei hi chu vawikhat nula chhelo deuh mai hian a bem ve a, ka thianpa lah kha tha deuha hnawlna tawngka lo hman ve mai awm, Mi rawn be tawh suh; mi rawn biak leh chuan ka hnek ang che tiin. Chu nula chhelo deuh chu a thiam ang tawk chuan alo hnawl ve a ni si a. Mi fate chu khup thum hmua an dam laiin keini thian dun zawng kan khup chauh ani kan hmuh dawn tak ni! Mahse thil mak danglam ka thianpa chungah a thleng ta tlat mai! Tlai khat kan basketball khel bang, haw paha meizial kan zuk tur lei pahin kawng sir dawrah kan peng lut zuai a. Chuta nula tleirawl lo thu chuan ka thianpa thinhnunah tak a rawn vit ta. Ka thianpa a che theilo mai pawh a ni lo, a tawng thei ta lo. A chet dan phung a buai! Meizial lei tum berin haw a tum ta. Kei zu chak si pawisa nei si lo chuan ka va man bet! Bawiha, enge ni ta, I at a chhuak leh tawh mi? tiin boruak tih daih ka tum. Ani lah ka hau chungin meizial leina tur pawisa min pe. Meizial ka lei chhungin dawr kawngkhar sirah chuan zum zuihin a lo ding, ava han buaithlak thin teh e! Haw pahin kan sawi chhunzawm nghal. Pitar thu sual hmu ni awm tak maiin a mit chu a meng kak mai a. Aw khur der der chungin ka hnenah, Bawiha, ilo hmu ve em thuthlenga lo thu kha tiin nula tleirawl chhelo ber hmu ni awm tak mai hian a sawi a. Kei lah chu ngaihsam zet hian, Hmu e, mahse mi ta a nih kha tiin a chhiat loh em avangin mi ta ni turah kei pawh chuan kan ngai nghal ngawt a. Ka thianpa chuan ka hnenah a vawikhat na atan, Chhelo ka ti kher mai, ka va han duh em awww tiin a aw thangkhawk mawi an sawi ang zawng zawng hian ka beng ah hian a ri tla vawng vawng a. Kei lah chuan engtin tak nge a duh tih hriat tumin, A chhe em mai, hman ni lawka lo bem tu che kha a chhelo zawk daih tiin a thin tih rim pahin kan fiam zeuh a. Mihring hi kan duh chuan kan lo va inthlak thei tak em tih ti chiang turin ka thianpa chuan ka hnenah, Ka nak ruk bo chu kha ngei kha ani e tiin a vawikhat na atan a nak ruh bo alo hre ve nih tih min hriat tir a, ka lawm kher mai. Haw kawng tluanin a hmel chauh kan hriat, a mizia leh eng chhungkua atanga lo chhuak nge pawh ka hriat loh chu kan han saruh khel phei ta mial mial a. Ani a sawitui si, Bawiha, naktuk ah alo awm leh hlauh chuan a hming leh number min dil sak rawh aw, khawngaihin tiin nau te chaw ngen ang tak tak hian kei a thianpa, chunglam leh hnuai lam thankin vek tawh hnenah chuan ngen tak te hian min ngen a. Kei chuan aw dam dap leh tawng hnem tawh ang takin Ka dil sak ang che, mahse a lo awm loh chuan bialpa a nei tihna a ni mai tiin a hlim lutuk thawi kian deuh nan a rilru tlem kan tih hah sak a Phek thumnaah chhunzawm a ni

E-mail: bmanews@gmail.com Website: www.bangaloremizo.info

Xw||t Xw||t
ten Pathian zarah dam ten Sahmulphah thla reng kan chuangkai leh ta reng mai. Bangalore Mizo zingah natna tawrh avanga damdawi in lut hial an awm nual a. Kan hriselna theuh kan uluk a, ei leh in, khawsak phung kan fimkhur theuh a tul hle mai. Kan khawpui chenna hi khawpui nuam leh changkang ni mah se, bawlhhlawh paih fimkhur loh avangin boruak a thianghlim lo va, natna inkaichhawn mai a awlsam hle. Faina lama tan lak zel I tum ang u Tv. Carey Sailo, BMA Asst. Secretary ni nulattawh thin chuan, a nulat-tlangval tawnhriat niawm tak mai rawn luanlampui a, a sei phian nangin, chhiar erawh a inchhirawm lovang. Part II thleng awm tur a ni e. Chhinlung magazine pawh buaipui tan leh a ni e. Bangalore Mizo te hian, eng ang takin ram leh hnam kan vei a, Mizo kan nihna kan tarlan a, kan nunpui, enge kan vei.. tih thawhkhawm hre turin thu leh hla I thawhkhawm ang u. Kawng engemaw talin kan ram leh hnam tan kan thawk thei asin. BMA AW hi kan aw a ni kan tih thin ang khan, Bangalore Mizo te chanchin kan inriattawnna tura siam a nih angin, thu leh hla, thenleh rual te chanchin thar, vei zawng engpawh engpawh I ziak thin ang u. Kan tan vek a ni e.

Vol. XVIII Issue No. 30 Bangalore Mizo Association Pathianni Nitin Chhuak Chanchinbu Date: 04th Nov., 2012 Phek Thumna

Article chhunzawmna
Mahse a hah thei tawh lo ka thianpa rilru chu! A sawi pahin a ball a tisawt a, a changin amah a sawt tel bawk a. Kan tan zawng tlai khaw thim dawnah kan khawvel ni a thar chauh mai si a le. Tuktin zingin ni thar a rawn her chhuah pui leh ta. Ngaite bawkin college-ah nileng chu ka hmang leh chu a nia, hmasawnna em em nei lovin. Ka thianpa ve thung erawh kan college ban atan ni tharah a chang dawn chauh a ni si a. Tlai inkhel turin kan chhuak phei leh ta. Inkhelh hmain kawng sir dawr ah chuan chak em em vang pawh ni lovin thil dang beisei vang zawkin inkhelh laia thial tur gum kan lei phei a. Kan beisei ber nimin lama hmeichhia lo thutna thuthleng ber chu a lo ruak huai a. Mahse kal lam chauh kan nih vangin ngui lem lovin basketball court lam kan pan ta a. Ka thianpa chu ka en reng a, a duh tak hmeichhia ala hmuh loh avangin a nguiin a inkhel pawh a phur ka ring lova. Mahse maw ka va ring sual tak em! A duh ber hmu niawm tak mai hian a lim leh ta puat puat a. Ngaihtuah leh ngaihsak engmah nei lo angin a zuang leh ta vak vak lawi si a. Ka thianpa tak hi chu aw! Tiin ka thianpa ka kawmngaih ber awm dan chuan ka va awm chhunzawm ve leh ta nghal a. Tlai inkhel kan bang ta. Kan nghahhlelh leh kan inkhelh chhan hmeichhia chu hmuh beiseiin chu dawr bawkah chuan meizial chu kan lei kawi leh a. A lo thu ta ngei mai. Ka thiam ang tawkin kan vei nuih deuh saih a. Ani pawh chuan na lo thei ang ber hian min lo chhawn a. Ka thianpa tana ka dah chu ka ui ta lek lek zawk mai a, mahse ka thianpa ve ber anih vangin leh a vawikhat tawnna anih vangin ka phal ta mai zawk ani e. Tichuan meizial lei pah chuan a nghaktu nu hnenah chuan, A sirah nula chhelo deuh in thut tir reng fo chuan keini zawng kan hek dawn teh e tiin chu nula chu kan melh deuh saih a. A nui hmel kha a va na lo tak em he ka mit tan hi chuan, mahse ka thianpa la chhawn tur vek anih vangin ka haider lui tlat a. Kan inkhelh hah chhuanlamin an dawr ah chuan rei lo te kan thu ho ta a. Kei a tawng duh leh ka thianpa eng anih bik loh avangin a tawng berah chuan ka tang ta a. Keimah ngei pawn ka khawrh chhuah ve fo tawh avangin thian te tan tiin theihpatawp tiin thu leh mizia ah pawh ka tang hle mai a. Haw dawn tepah chuan a number leh a hming chu ka phone nung ve tawk tawkah chuan ka save ta keuh a. Kan tlai hnathawh bawhzui nghal vatin zanah chuan leng turin kan inbuatsaih dun ta. Ka thianpa hi nula a rim ka la hriat loh avangin a zan khatna chu pui turin ka rilru ka siam fel a, a zan dangah chuan amah ngeiin ni khawrh chhuah a tum dawn tawh ni! Kawngka kan kik kak kak a. Beisei ang tak leh hmel tha hmu ngailo tana phut zawkna tham hmelthatna putu nu chuan min lo hawn sak ta a. Ka thianpa nen chuan inthlahrung deuhin kan inzui lut dun dan dan a Issue leha chhunzawm tur

Sadbhavna Concert
A Tribute to Peace and Harmony Orgenized By Bangalore City Police in association with North East Welfare Association, KARNATAKA (NEWAK) A hun: The 4th November 2012, Pathian ni A hmun: Audogodi police grounds, Koramangala, Hnam hrang hrang te zingah Remna leh Muanna a awm zel nana he hun hi buatsaih a ni. Hmarchhak mite tana a bik taka buatsaih a nih avangin, Bangalore Mizo te, he hun hi hmang turin kan inhriattir e. He concert hi a thlawn a luh theih a ni dawn a. India rama zaithiam lar Lucky Ali, Joi Barua leh midang lar tak tak an inlar dawn a ni. Hrechiang duh tan BMA President, Pi Lalrinpuii biak theih reng a ni

Lawrkhawm
$$ Sai sualin a beih Roluaha a thi Ratu leh Bukpui inkar Turial luia sangha man tura ramchhuak mi palite chu, puma an chuan laiin sai sualin a bei a, an zinga pakhat ruang chhar a ni a. Thia chhar hi Durtlang Ramthar Veng ami Roluaha nia hriat a ni a, Saiin puma an chuang lai a beihna bulah a ruang hi zirtawp ni chhun dar 12 rik hma deuh khan an hmu a ni. Police hotute sawi danin he sai sual hi Tuirial lui dunga hnathawka hnamdangten an chhawr thin a ni a, a hel tak avangin chhawr theih lohvin a tlan bo mek a. He sai sual hian October ni 31 zan khan heng sangha mana ramriakte hi a bei thut mai nia sawi a ni a. (Vulmawi.com) $$ Central Jail-a tang zinga 13% HIV+ve vei November ni 2-a MSACS leh UNODC meeting-ah SHALOM chuan, Central Jail-a tng mek thisen endik tawh zinga 13% chu HIV hrik pi an nih thu an tarlang. (Vanglaini.org) $$ Inzuar thin dapchhuak Central YMA hnuaia Central Anti Drugs Squad (CADS) leh Synod Social Front tangdun chuan tunhnai khan zanlam a hmeichhe inzuar thin, hmeichhe 28, tuai 2 leh hmeichhe zu rui dapkhawmin, an mahni tanpui theihdan tur ngaihtuahpui an tiam. (The zozamtimes.com) $$ Kum 12 chhungin Tourist 5412 Mizoram sorkar, police department chhinchhiah danin, kum 2000-2012 chhungin Mizoram tlawha zin 5,412 an awm, kum khatah mi 451 velin Mizoram an tlawh thin. (The zozamtimes.com)

Vol. XVIII Issue No.30 Bangalore Mizo Association Pathianni Tin Chhuak Chanchinbu Date: 04th Nov., 2012 Phek Lina

BMA AW HI
BMA AW chhiartu duhawm tak tak te, Pathian ni hmasa (28th October) tlai khan in tum loh leh beisei loh tak BMA AW in dawng niin kan lo hria a. Editorial Board chuan pawi kan tiin, in hriatthiamna kan ngen e. A chang chuan, kan tih theih leh hriatthiam baka harsatna kan tawh zauh thin avangin duh loh leh duh loh ang deuha thiltawn chang a awm thin, khawvel ni tlat hek le. Pathian ni hmasa pawh khan, BMA AW photo copy kan tihna thin dawrah A3 photo copy an ti thei tlat lova. Dawr hnai dangah an tihto avang leh, dawr thenkhatin an tih duh/thiam loh avangin BMA AW te chi a lo chhuah phah a ni. BMA AW te chi dawngtu thenkhat te titi tlem chhiar ang u hmiang. (An tawngkam hi remchan zawk avanga siamrem, belh leh paih a awm mai thei a. An hming kan tarlan te chungah an chhiar hmain ngaihdam kan dil sa bawk. Tin, a hnuaia thu kan tarlan zawng zawng te hi, Editor ngaihdan a ni vek kher lo.. ) 1. Inkhawm ban a ni a, BMA AW Editor tlangval ngat chu nula chhelo takin a rawn pan hlawk hlawk a. Nula: (Lungawi lo hmel tawkin) Vawiin BMA AW hi tu buaipui nge? Eidtor: (Nui ruh ruh pahin) Keimah, enge ni ta? An kap leh tawh che elo? Nula: (Dinglama a lu thle paha ner sakin) Thing lutuk Fimkhur thu hlaah, Nula chhelo tak hming hi thup a ni. 2. Vawiin BMA AW chu a te fel hle mai, font size hi hei ai hian lian hret se. BMA AW ang hi chu vawikhat thleha kawr/kekawr iptea ah daih theih hi a remchang zawk daih Tv. Makima Chawngthu 3. Vawiin BMA AW hi a mak reuh, naupang inkhualtelemna item a ang eee Pi Puii Khiangte. 4. Layout pawimawh rual hian, a chhung thu inziakte hi fel fai se la, typo hi tlem thei ang ber/awmlo thei se. Editorial hian chanchinbu tha/puitling a hriat theih ve khawp mai. Han tang sauh sauh teh u. Tv. Tlankima Jahau 5. BMA AW hi a te lutuk a. Keini ang tar tan chuan chhiar har det! Nl. Mawipuii Chhakchhuak

Look Alike!
(Chawngkhum Dan Tlang Huat loh) Tuikuk thufing chuan Hmeltha apiangin angtu an ngah thin a tih pawh kan hre chuang lo nangin, kan Vice President Tv. Uncle El-a tan hian he thufing hi a dik bik emaw ni le?! Kar hmasa lawkah Uncle El-a hian he hmun ruak hi a luah tawh a, a awmna tur bik emaw in lo ti ang e. Tu tan pawh a ni. Chutih rualin, he hmun luah tur chuan vantlang chunglam nih a ngai tih erawh kan hre theuh dawn nia!

Post of the Week

(Bangalore Mizo, Facebook Group)
Zirlai kan nih lai atang ngei hian kan theih tawk chinah khawtlang tan theihtawp kan chhuah tur a ni a. Chu chu zirna thiltum - Ram leh hnam hruaitu tha ni tura inzirna pawimawh tak a ni. Khawtlang thila inthawh lo zirlaite chu, an zirna kawng bikah lo hlawhtling ta pawh nise, khawtlang mi rawn leh mi langsar an ni ngai lova. Mi thiam tih pawh an hlawh phak ngai hek lo. Post-tu: Fela Ayala