An Official Organ of The Bangalore Mizo Association Registered Under Societies Act of Karnataka No.

BLU-S188-2007-08 Date 7 May 2007 Vol. XVIII Issue No.20 Bangalore Mizo Association Pathianni Tin Chhuak Chanchinbu Date: 12th August 2012 Phek Khatna

BMA AW
ZORAMIN THALAITE MIN AU

Tualchhung Nimin North East Christian Football Tournament khelh zawh takah Manipur 1-0 in kan hneh na in vanduaithlak takin kan champion zo ta lo. Kan player te leh tlawmngaia min tawiawmtu zawng zawngte chungah lawmthu kan sawi a. Eitur tuihnai tak siama stall buaiptuitu Nl.Blessy Sailo te leh team buaipuitu Tv.Ela leh Hriatkima te inpekna a fakawmin BMA hmingin lawmthu kan sawi e. Kan website hneh taka min enkawl sak tu leh administrator ni lai Tv.Benjamin Rualthanzauva chuan Mizoram lamah min haw san dawn ta a, ani hi kum rei tak Bangalore khawtlanga in hmang leh tangkai tak ani a, hetia min pem san mai tur hi kan ui tak zetin a hma hun lo awmzel torah BMA chuan duhsakna kan hlan nghal bawk e. Kan Secretary Dr.Lalhmingmuana Sailo pawh a hna avangin Mumbai ah a zin mek a, kar leh lamah chuan a hna te zova tluang taka a rawn let leh hman beisei ani. Kan Senior Adviser Rev. R. Lalthanmawia Mizoram zin pawh ni 10 khan dam takin alo let leh ta e. BMA league lo awm turah team KLE team Jersie tur chu kan Minister Pu Zodintluangan a rawn sponsor sak a, a chungah lawmthu awm rawh se. ****************************** Mizo nula chhuanawm Kan mizo nula tuna Hyderabad-a awm mek, Ann Rammawii Haokip, kum 22 mi chuan a first attempt-na ah UPSC a inziak tling nghal in IFS nihna a chelh dawn ta. *****************************

Ram nitla seng lo, British sawrkar hotu lu ber pawh lo ni tawh thin, Bristish Prime Minister hlui Benjamin Disraeli chuan, The youth of the nation are the trustees of the posterity tiin thalaite pawimawhzia thu a lo auchhuahpui chiam tawh a. A ni taka thalaite khawvel kan lo tih fo thin pawh hi a lo dik nameuh mai. Thalaite hi ram leh hnam hmelhmang sawi danglam theitu, ram leh hnam nghahfak tak meuh meuh mai kan ni a. Kan pawimawhzia hi kan inhriatchian pawh a tul hle. Kan ram, Zoram hian kiltin kil tang atangin beihna a tawk chho mek a. Kan hriat loh karah thuam chitin reng hmangin min chuk rawn a. Hnamdang sumdawng hausa ten, kan panna lai ber, kan retheihna denchhenin sum leh pain min run a. Bangaldesh raltlan thenkhat ten min run chhen bawk nen. Tin, kan hriat reng tur chu kan thenawm vaite hian kan rama sumdawnna lo bun hi an chak zek zekin, Bengal East Frontier Act 1873 in hnam hnufual kan nihna anga min hungbikna Inner Line Regulation hi hnawk an tiin, hlip thuai thuai tawh se an ti tak meuh meuh a. Chutiang tur pawhin a ruk takin hma an la a. Chumai bakah kan hmalawka rawn inchhawp tur Look East Policy vangin kan ram chu sawinghinin a la awm dawn bawk a. Hetiang karah hian kan ram hian humhumtu leh chhantu tur thlalai mi thiamte hi a au tak meuh meuh a ni. Chanchinbu leh media chi hrang hrang hmangtein kan ram mamawh ni-a kan rin te kan tarlang thin a. Amaherawhchu, heng kan sawi zawng zawng hi kan mamawhlo e tihna ni chuang lovin heng zawng zawng aia mamawh ngawih ngawih kan ram hian a nei a. Chu chu thalai lehkhazir sang satliah ringawt ni lo, kan ram aiawha ding theitu tur mi fing, mi ril leh mi thuk, sap hovin philosopher an tih ang tak tak mite hi an ni. Tin, chu lo lehah pawh ram leh hnam hmangaih tak tak mi, mahni channa tur ni mah se, ka ram leh hnamin a thatpui phawt chuan ti ila ram leh hnam tana inpe ral thak ngam mi, he khawvel ropuina thlahlel thin mite laka a ngam mite kan ram hian a mamawh hle bawk. Tuna kan ram hmasawnna tura thanmawh bawk ber ni-a lang chu mahni tawkah kan fing lutuk hi niin a lang. British Parliament member hlui John Pymad anga, Ka ngawih avanga thudikin a tuar ai chuan, thudik sawi avangin keima`n ka tuar zawk mai ta`nge ti ngam khawpa huaisen leh a ngam mite hi kan ram leh hnam hian a mamawhin a au tak zet zet a ni. Mi tam tak chuan ngawih hi finna emaw tiin an veizawng leh duhzawng pawh chhak chhuak hlei thei lo khawpin an fing a. Ram tana tha nia an hriat ngei ngei thilah pawh fing takin an inthup leh tlat thin a. A chhan chu a sawhkhawk tur an hriat lawk tlat avangin. Chutiang mite chu ngaihnep a hnekin a hun leh hmun hria tiin chawimawina kan hlan letin mi fing tiin kan chhal let leh hlauh thung thin si a. Amaherawhchu he kan Zoram hi chhan tlak a la awmin, siamthat theih tawh rual lova chhe lailet der a ni awzawng lo va. Chutihlai erawh chuan, Zoram hi a thla a phang tanin, he kan saltanna khurpui atanga chhanchhuak theitu tur hi a au tak meuh meuh a. Ka thalaipuite u, a kohna chhangtu kan ni thei dawn em?

He Zoram hian, mi pangngai satliah ni lo, mi pangngai aia danglam, mi bik mi fing, mi ril leh mi thuk hi a mamawh tak zet zet a. Greek mite chuan Plato, Socrates leh Aristotle te an nei a. Tin, hnam ropui English te pawhin John Locke, Thomas Hobbes te an neiin, French hnamte pawhin Voltaire, Jean Jacques Rousseau an nei a. Tin, hnam huaisen German hnamte pawhin Imanuel Kant an nei bawk. Kan Zoram hian heng ka rawn tarchhuah mi hrangte khum zo tur leh el phak tur mi fing, mi ril leh mi thukte hi kan nei ve reng em?
(phek hnihna ah chunnzawmna)

*********************************************************

Vol. XVIII Issue No. 20 Bangalore Mizo Association Pathianni Tin Chhuak Chanchinbu Date: 12th August 2012 Phek Hnihna
Editor Lal Muanzuala Joint Editors Dr.Lalhmingmuana Sailo MC Zirsangzela Circulation Managers Nl.Lalchhanhimi Nl.Lalngaihsaki hnamte BMA AW lak man: Thla khat Rs.20 Thla thum Rs.50 Thla ruk Rs.90 Thla sawmpahnih Rs.180

(phek khatna chhunzawmna..) A chhanna chu, Zofate hla kungpui Pu Rokunga`n, Mizo kan ni kan hmel a tha, kan tum a sang bawk si a lo tih angin Zofate hi tribal satliah mai mai ni lo, hnam ropui leh huaisen tak kan ni a. Chuvangin, Zoram chhan nana ke pen ngam mi fing, mi ril leh mi thuk, he kan ram retheihna ata khaichhuak theitu tur leh aiawhzo tur hi tam tak an la awm ang tih ka ring tlat a ni. Zam tur kan ni lo. Chutihlai erawh chuan, ka thalaipuite u, he kan ram neih chhun, Zoram hian chhantu leh humhalhtu zawngin a vai ruai e tih erawh chu ka hrilh hre nawn leh duh hram che u a. A kohna chhangtu kan ni thei dawn em? -K.Remruatfela K.L.E. Law College, Bangalore

E-mail: bmanews@gmail.com Website: www.bangaloremizo.info

BMA Football Tournament chungchanga hriattur pawimawhte

1. 2. 3. Aug ni 15, 18 leh 25-ah tournament hi khelh a ni ang. A hmun a tan chuan Police ground, Koramangalla a ni ang. He tournament-a khel tur chuan BMA member nih a ngai. Member ni lo chu inhriatthiamna a awm thei lo ang. Dar 9 a tan chat thei tura kal tur a ni. Game a tam dawn avangin kan innghak rei thei dawn lova, mahni khelh huna kal lo te chu minute 10 kan innghak anga, chuta khel tur (player 8 tal) an awm loh chuan chak lo a puan an ni ang. Inkhel tur ve ve pawh kim lo ang ni se, kan innghak chuang lo ang. Kan khelh hun aia hmaa khelh a awm thei a (game hmasa walk over vangin), chuvangin inkhel turten kan khelh hma game an khelh tan dawn chuan kan awmkim thap tawh tur a ni. Kan hun neih hi a tlem deuh avang leh inkhel tur kan tam avangin kan inhrethiam hram hram dawn nia. Team tinin ball neih vek tur a ni. Red card vawi khat hmuh zelah Rs. 100/- chawi tur a ni a, Yellow card vawi khat hmuh zelah Rs 20/- chawi tur a ni. Team tinin game khelh dawn apiangin deposit Rs. 100/- an pe thin tur a ni. Red card hmu apiang chu inkhelh lehah a khel thei lo ang. Match 1 a chawl ngei ngei tur a ni. Walk over hi 3-0 anga pawm a ni ang. Semi final lut tura team dinhmun inang an awmin, head to head en a ni ang a, chumi zawhah a tul a nih chuan goal difference en a ni leh ang a, chumi hnuah a tul chuan penalty shootout hmanga lut tur zawn tur a ni ang. Team tinin match officials tur, Football dan hria mi 2 an nei ngei ngei tur a ni. Match officials hi players te atanga kan insawm mai loh chuan ham tur kan indaih loh vang a ni. Hei hi a tul anga lo bawhzui turin team tin captain-in mawh a phur ang. Team tinin JERSEY No. chuang an ha ngei tur a ni. Jersey no. inang team khatah a awm a thiang lo ang. Team khatah mi 23 aia tam awm a theih dawn loh a. Tin, game khatah substitution 5 zel a siam theih ang. Team-in Professional footballer(s) kan nei a nih pawhin match khatah chutiang mi chu 2 aia tam khelh theih a ni lo ang. Game khelh hun chhung hi Group stage ah chuan minute 20-5-20 a ni ang. Semi finals leh Final chu hun kan neih dan azira la ruahman tur a ni ang. Kan inkhelhna tur atana line rin a ngaih thin dawn avangin team tin captain-te mawhphur tura ruat an ni. BMA member ni thei lo chu Tournament an khel ve thei lo ang. Team Squad-a kan telh a nih pawhin a khelh niah khelh ve phal a ni lo ang. (Mizo hnahthlak ni lo BMA member ni ve thei lo zawng zawng a huam ang. Football Tournament khelh duh vang ringawta member-a inziak lut pawm a ni lo ang. Hei hian hnam dang, mizo nupui/pasal nei erawh a huam lo). Chuvangin hetiang mi kan awm a nih a, complaint a luhin kan sawibuai thei lo ang. Harsatna siam zawnga khawsak loh hram kan tum dawn nia. A bik takin kan inpumkhatna tichhe thei zawnga boruak siam kan awm chuan Club pumpuiin a tuar ang a, tournament atanga disqualified thlengin action lak theih a ni ang. Club/Team tin te kan fimkhur hram hram dawn nia. Team tinin first aid kit neih vek theih nise. Eng thilah pawh thubuai emaw thil chiang lo a awm a nih chuan Football Tournament sub-committee in thu tawp a siam ang a, chu chu thutawp anga ngaih tur a ni.

Editorial
Tunlai Olympic boruakin khawvel a tuam mek a, sports lam ti thei ve lemlo tan pawh a hmuhnawmin en a manhla thin ngei mai, ngaihtuah thui pheichuan rual awh a ti na thei viau mai. Kan ram mi ngei pawh khawvel huap a hming lang pha an awm ve zeuh tawh te hian mi a ti phurin an va chhuanawm thin tak em! Ram leh hnam khawvel hriata min tarlang tu, khua leh tui nih ti nuamtu, ti hmasawntu leh thangthar lo la awm turte tana hmahruaitu pawimawh tak anni thin. Mizote hi a hnam ang pawhin infiam ngaina mi tak kanni a, tun hma kan pi leh pute hunlai atang tawhin naupang infiamna chenin kan hausa a, a tam zawk chu thangthar ten chhawm zel lemlo mahila tunlai khawvel infiamna boruakin a rawn ken chhoh tamtak chu kan tuipuiin thiam tak tak te kan nei chho ve zel hi a lawmawm thin hle mai. A bikin football, boxing, basketball, volleyball, tennis, etc. ah te hian mizo infiammi duailo tak tak te kan nei hlawm. Heng kan infiammi thiam leh lar ni lemlo zingah pawh hian potential nei tha tak tak kan awm teuhin a rinawm. Chung talent nei tha tak tak te hai chhuak tur hian khawtlang leh sawrkar ang zawnga kan tan rual a pawimawh hle a, facilities tha leh training tha te kan infiammi ten an neih theihnana tan kan lak nasat a ngaih zia te ngaihtuah chuan rual awh a na thin teh e. Ram chu Lalpa ta a ni a; Hnamtin chunga roreltu a ni si a.Sam 22: 28 *****************************

4.

5. 6. 7. 8. 9. 10.

11.

12. 13. 14. 15. 16. 17.

18.

19.

20.